31/05/2026
Sot 31.05.2026, e diel, Mekë
Haxhinjtë nga Italia, Zvicra, Gjermania dhe Austria, nën udhëheqjen e Kryetarit të BFI-së për Italinë, Dr. Reshat Ibishi, përmbyllën vizitat edukative, historike dhe shpirtërore të Haxhit me vizitën në disa nga vendet më të rëndësishme të historisë islame në Mekën e Nderuar.
1. Biëru Tuba (Bunari Tuba)
Ky vend lidhet me ngjarjet e Çlirimit të Mekës në vitin e 8-të Hixhri. Në këtë zonë Pejgamberi Muhamed a.s. u ndal para hyrjes në Mekë dhe organizoi hyrjen e ushtrisë islame në mënyrë paqësore. Ai caktoi komandantët në hyrjet kryesore të qytetit, ndër ta Halid ibn Velidin r.a. dhe Abdullah ibn Mesudin r.a., me detyrë që të garantonin sigurinë dhe të shmangnin përplasjet.
Në atë ditë historike, Pejgamberi a.s. shpalli amnistinë e përgjithshme dhe tha:
“Kush hyn në Mesxhidul Haram është i siguruar. Kush hyn në shtëpinë e Ebu Sufjanit është i siguruar. Kush mbyllet në shtëpinë e vet është i siguruar.”
Kjo ngjarje mbetet një nga shembujt më të mëdhenj të faljes dhe mëshirës në historinë njerëzore.
2. Xhamia Shaxhere (Xhamia e Pemës)
Kjo xhami është ndërtuar në vendin ku sipas transmetimeve ka ndodhur një prej mrekullive të Pejgamberit Muhamed a.s. Kur mushrikët kërkuan një argument të qartë për profetësinë e tij, ai iu lut Allahut dhe një pemë u shkëput nga vendi i saj, iu afrua Pejgamberit a.s. dhe e përshëndeti me lejen e Allahut.
Në disa transmetime përmendet se pema iu bind urdhrit të Pejgamberit a.s., lëvizi drejt tij dhe më pas u kthye përsëri në vendin e saj. Dijetarët e hadithit e kanë përmendur këtë ngjarje si një nga mrekullitë që Allahu ia dha të Dërguarit të Tij për të dëshmuar vërtetësinë e misionit profetik.
Kjo ngjarje na kujton se jo vetëm njerëzit, por edhe krijesat e natyrës e njohën dhe e respektuan të Dërguarin e Allahut.
3. Xhamia Xhin dhe Xhamia Sexhde
Xhamia Xhin ndodhet në vendin ku një grup xhinësh dëgjuan Pejgamberin a.s. duke lexuar Kur’an. Ata u mahnitën nga shpallja hyjnore, pranuan Islamin dhe u kthyen te populli i tyre si thirrës të besimit. Kjo ngjarje përmendet në Suren El-Xhin dhe Suren El-Ahkaf.
Sipas transmetimeve, xhinët dëgjuan recitimin e Kur’anit gjatë kthimit të Pejgamberit a.s. nga Taifi, kur ai ishte i shoqëruar nga disa sahabë.
Xhamia Sexhde (Mesxhid el-Inshikak) lidhet me ngjarjen kur Pejgamberi a.s. recitoi Suren En-Nexhm. Kur arriti tek ajeti i sexhdes, ai ra në sexhde dhe bashkë me të ranë në sexhde edhe shumë prej të pranishmëve. Kjo ishte një prej ngjarjeve që tregoi ndikimin e jashtëzakonshëm të Kur’anit në zemrat e njerëzve.
4. Varrezat El-Mu’alla (Xhennetul Mu’alla)
Këto janë varrezat historike të Mekës dhe ndër më të njohurat në botën islame. Në to janë varrosur shumë sahabë, tabiinë dhe personalitete të rëndësishme islame.
Këtu ndodhet edhe varri i Hatixhes bint Huvejlid r.a., bashkëshortes së parë të Pejgamberit Muhamed a.s., gruas që e mbështeti në ditët më të vështira të shpalljes dhe që konsiderohet një nga gratë më të nderuara në historinë e Islamit.
Po ashtu, në këto varreza prehen edhe disa nga të afërmit e Pejgamberit a.s. dhe shumë banorë të hershëm të Mekës.
5. Muzeu i Qabes, Ujit Zemzem dhe Kiswes
Vizita në muze u mundësoi haxhinjve të njihen më nga afër me historinë e Qabes së Shenjtë dhe shërbimin e saj ndër shekuj.
Në muze ruhen pjesë të vjetra të Kiswes, mbulesës së Qabes, e cila ndërrohet çdo vit më 9 Dhul-Hixhe. Vizitorët kanë mundësi të shohin procesin e prodhimit të Kiswes, materialet e përdorura dhe artin e kaligrafisë islame të punuar me fije ari dhe argjendi.
Po ashtu prezantohet historia e ujit Zemzem, burimi i bekuar që Allahu ia dhuroi Haxheres dhe djalit të saj Ismailit a.s. Ky burim vazhdon të rrjedhë prej mijëra vitesh dhe konsiderohet një nga mrekullitë më të mëdha të Mekës.
Në muze gjenden gjithashtu fotografi, dokumente historike, dyer të vjetra të Qabes, pajisje të përdorura për mirëmbajtjen e saj dhe objekte të tjera me vlerë të jashtëzakonshme historike.
6. Varrezat El-Adl
Varrezat El-Adl janë ndër varrezat më të mëdha të Mekës moderne. Në to janë varrosur mijëra banorë të Mekës, imamë, dijetarë dhe personalitete të ndryshme islame.
Ndër figurat më të njohura që prehen këtu është Shejh Abdulaziz ibn Baz, ish-Myftiu i Përgjithshëm i Arabisë Saudite dhe një nga dijetarët më të njohur të botës islame në kohët moderne.
Vizita në këto varreza shërben si kujtesë për jetën e përkohshme të kësaj bote dhe për kontributin e dijetarëve në ruajtjen e fesë islame.
7. Shpella Hira dhe Shpella Theur
Shpella Hira, e vendosur në Malin Nur, është vendi ku Pejgamberi Muhamed a.s. mori shpalljen e parë nga meleku Xhibril a.s. në moshën 40-vjeçare. Pikërisht këtu zbritën ajetet e para të Kur’anit:
“Lexo me emrin e Zotit tënd që krijoi.”
Kjo ngjarje shënoi fillimin e shpalljes hyjnore dhe të misionit profetik.
Shpella Theur është vendi ku Pejgamberi a.s. dhe Ebu Bekri r.a. qëndruan të fshehur për tri ditë gjatë Hixhretit nga Meka në Medinë. Kur mushrikët arritën deri te hyrja e shpellës, Allahu i mbrojti duke bërë që një merimangë të thurte rrjetën e saj dhe pëllumbat të ndërtonin folenë pranë hyrjes.
Në këtë moment historik Pejgamberi a.s. i tha Ebu Bekrit r.a.:
“Mos u pikëllo, vërtet Allahu është me ne.”
Kjo ngjarje mbetet simbol i besimit të palëkundur, mbështetjes tek Allahu dhe sakrificës për fenë islame.
Allahu ua pranoftë Haxhin të gjithë haxhinjve dhe ua mundësoftë kthimin në familjet e tyre me zemra të pastruara, me besim të forcuar dhe me Haxh të pranuar.
