27/11/2014
ដំណឹងស្តីពីការសូត្រព្រះត្រៃបិដកអន្តរជាតិ ឆ្នាំ ២០១៤
គណៈសង្ឃព្រះពុទ្ធសាសនាកម្ពុជា នឹងទទួលធ្វើជាប្រធានរៀបចំ ឬ ជាម្ចាស់ដឹកនាំ កម្មវិធីសូត្រព្រះត្រៃបិដក អន្តរជាតិលើកទី១០ និងទី១១ នៅឆ្នាំ២០១៤ និង ២០១៥ ខាងមុខនេះ ។
ការទទួលធ្វើជាប្រធានរៀបចំ ឬ ជាម្ចាស់ដឹកនាំ កម្មវិធីសូត្រព្រះត្រៃបិដកអន្តរជាតិនេះ បានចុះហត្ថលេខាជា ផ្លូវការដោយ ព្រះទេវសត្ថា ពឿយ មេត្តា តំណាងគណៈសង្ឃព្រះពុទ្ធសាសនាកម្ពុជា ជាមួយនឹងគណៈកម្មការសូត្រ ព្រះត្រៃបិដកអន្តរជាតិ នៅថ្ងៃទី ១២ ខែធ្នូ ឆ្នាំ ២០១៣ វេលាម៉ោង១០ និង២០ នាទី ព្រឹក ក្នុងពិធីបិទវគ្គសូត្រព្រះ ត្រៃបិដក អន្តរជាតិលើកទី០៩ បន្តពីគណៈសង្ឃនៃប្រទេសភូមា ដែលបានទទួលធ្វើជាប្រធានរៀបចំ ឬ ម្ចាស់ដឹកនាំ ក្នុងឆ្នាំ២០១៣ កន្លងទៅ ។ នេះជាសក្ខីភាពមួយសម្រាប់កម្ពុជា ក្នុងនាមជាម្ចាស់រៀបចំកម្មវិធីដ៏មហាអស្ចារ្យ ដែលនឹងកត់ត្រា ទុកក្នុងប្រវត្តិសាស្ត្រ នៃព្រះពុទ្ធសាសនាជាតិ និងអន្តរជាតិ ។
កាលបរិច្ឆេទៈ កម្មវិធីសូត្រលើកទី១០ ចាប់ពីថ្ងៃទី០២ ដល់ ថ្ងៃទី១២ ខែធ្នូ ឆ្នាំ២០១៤ និង លើកទី១១ ចាប់ពីថ្ងៃទី០២ ដល់ ថ្ងៃទី១២ ខែធ្នូ ឆ្នាំ២០១៥ មានរយៈពេល ១០ថ្ងៃដូចគ្នា ។
កន្លែងប្រារព្ធៈ នៅព្រះចេតិយពោធិមហាវិហារ ទៀបគល់ព្រះមហាពោធិព្រឹក្ស ជាទីដែលព្រះពុទ្ធអង្គទ្រង់បានត្រាស់ ដឹងនូវអនុត្តរសម្មាសម្ពោធិញ្ញាណ ស្ថិតនៅក្នុងតំបន់ពុទ្ធគយា ស្រុកគយា រដ្ឋប៊ីហារ ប្រទេសឥណ្ឌា ។
ការបានធ្វើជាប្រធាន ឬ ជាម្ចាស់ដឹកនាំ រៀបចំកម្មវិធីសូត្រព្រះត្រៃបិដកអន្តរជាតិ លើកទី១០ និងលើកទី១១ ជាមហាកិត្តិយសដ៏ធំធេងនិងជាឱកាសដ៏វិសេសវិសាលសម្រាប់ព្រះរាជាណាចក្រកម្ពុជាក៏ដូចជា ខេមរជនគ្រប់រូបក្នុង ការបង្ហាញមុខដល់ពិភពលោក ជាពិសេស មជ្ឈដ្ឋានអ្នកកាន់ព្រះពុទ្ធសាសនាអន្តរជាតិ ឲ្យបានឃើញបានស្គាល់អំពី អរិយធម៌ វប្បធម៌ សិល្បៈ ប្រពៃណី ដ៏រស់រវើក និងសម្បូរបែប នៃកម្ពុជា ព្រះរាជាណាចក្រអច្ឆរិយៈ របស់យើង ។
ការបានធ្វើជាប្រធាន ឬ ជាម្ចាស់ដឹកនាំ រៀបចំកម្មវិធីសូត្រព្រះត្រៃបិដកអន្តរជាតិ លើក ទី១០ និងលើកទី១១ ជាមហាកិត្តិយសដ៏ធំធេង និងជាឱកាសដ៏វិសេសវិសាល សម្រាប់ ព្រះរាជាណាចក្រកម្ពុជា ក៏ដូចជា ខេមរជនគ្រប់រូបក្នុងការបង្ហាញមុខដល់ពិភពលោក ជា ពិសេស មជ្ឈដ្ឋានអ្នកកាន់ព្រះពុទ្ធសាសនាអន្តរជាតិ ឱ្យបានឃើញបានស្គាល់អំពីអរិយធម៌ វប្បធម៌ សិល្ប: ប្រពៃណី ដ៏រស់រវើក និងសម្បូរបែប នៃកម្ពុជា ព្រះរាជាណាចក្រអច្ឆរិយ:របស់ យើង ។
ការស្វាធ្យាយព្រះត្រៃបិដកនេះ ប្រៀបបាននឹងការប្រារព្ធធ្វើសង្គាយនាដែលព្រះអរហន្ត ទាំងឡាយបានប្រារព្ធធ្វើដើម្បីរំលឹកនូវ ព្រះធម៌វិន័យរបស់ព្រះដ៏មានព្រះភាគក្នុងបូរាណកាល ដូច្នេះ ការឧបត្ថម្ភកម្មវិធីនេះ ឈ្មោះថាបានជួយទំនុកបំរុងព្រះពុទ្ធសាសនាឱ្យបានគង់វង្ស ស្ថិតស្ថេរអស់កាលដ៏យូរផង បានឧបត្ថម្ភសង្គាយនាផង និងបានបំពេញនូវធម្មទានដ៏ឧត្តុង ឧត្តមផង ។ សេចក្តីពិត រមែងនឹងបានទទួលនូវផលានិសង្សដ៏ច្រើនប្រមាណមិនបាន សមដូច ព្រះពុទ្ធដីកាត្រាស់សំដែងថា៖ សព្វទានំ ធម្មទានំ ជិនាតិ ធម្មទានឈ្នះអស់ទានទាំងពួង ។ ធម្មទានដែលបានពោលមកនេះជាធម្មទានដ៏មានកំលាំង ហើយមានសភាពធំទូលាយ ជា គុណប្រយោជន៍ធំដល់ពុទ្ធបរិស័ទអ្នកមានសទ្ធាជ្រះថ្លា ។
អាស្រ័យដូចបានក្រាបបង្គំទូលថ្វាយ ប្រគេន និងចម្រើនពរខាងលើ សូមសម្តេច ព្រះតេជគុណ ព្រះថេរានុត្ថេរ: គ្រប់ព្រះអង្គទ្រង់ ឯកឧត្តម លោកជំទាវ អ្នកឧកញ៉ា លោក លោកស្រី អ្នកនាងកញ្ញា ព្រមទាំងពុទ្ធបរិស័ទទាំងក្នុង និងក្រៅប្រទេស ព្រះមេត្តា និងមេត្តា យាង និមន្ត និងអញ្ជើញចូលរួមឧបត្ថម្ភគាំទ្រក្នុងកម្មវិធីសូត្រព្រះត្រៃបិដកនេះ តាមកំលាំង សទ្ធាជ្រះថ្លារៀងៗខ្លួន ហើយអនុមោទនាយក ផល្លានិសង្សដ៏ធំធេង ក្នុងឋាន:ជាម្ចាស់រៀបចំ និងឧបត្ថម្ភកម្មវិធីសូត្រព្រះត្រៃបិដកអន្តរជាតិទាំងអស់គ្នា និងសូមឱ្យទទូលបាននូវចំណែក បុណ្យស្មើៗគ្នា ។
វត្តខ្មែរពុទ្ធគឃា, ឥណ្ឌា ថ្ងៃទី ១២ ខែ មករា ឆ្នាំ ២០១៥
តំណាងគណ:សង្ឈព្រះពុទ្ធសាសនាកម្ពុជា
ព្រះទេវសត្ថា ពឿយមេត្តា
ប្រធានពុទ្ធិកសមាគមសមណនិស្សិត និងជាព្រះចៅអធិការ
វត្តខ្មែរទាំង៦ នៅដែនដីពុទ្ធភូមិ ឥណ្ឌា-នេប៉ាល់
