14/01/2026
مناسك العمرة كامله 🥰
لو هتسافرى على مكه الاول 🕋
بتنوى تطهر للعمرة بتاخدى شاور
فى بيتك هنا قبل السفر و تلبسى كل اللبس نضيف و مغسول بدون تعطر لو مش عارفه تستخدمى ايه للنضافه ديودرنت ستارفيل الابيض بدون ريحه و لازم نستخدم ديودرنت المسلم لازم يبقى نضيف و محدش يتأذى من ريحته و بالنسبه للجسم صابون ايفا جلسرين بدون ريحه
اثناء الطيران هنعدى على الميقات فى الطيارة هيقولو قبلها و من هنا بنبدء اركان العمرة اولا ( الإحرام ) و فى محظورات الإحرام ❌ منع التعطر و قص و نتف الشعر و قص الاظافر و الجماع و مافيش نقاب المنتقبه بنظهر وجه و كفين
ميقات أهل المدينه او المسافرين من المدينه لمكه 🕋 بيكون من ابيار على
الدعاء عند الميقات🟢 بنقول ( نويت عمرة عن نفسى فأن حبسنى حابس فمحلى حيث حبستنى ) اول عمرة لازم تبقى لنفسك بعد كدة نبدء تلبيه للنساء بصوت عادى منخفض( لبيك اللهم لبيك لبيك لا شريك لك لبيك ان الحمد و النعمه لك و الملك لا شريك لك ) تفضلى تقولى تلبيه لحد ما توصلى للحرم
بندخل المسجد برجلنا اليمين و ندعى 🟢 بسم الله و الصلاة و السلام على رسول الله اعوذ بالله العظيم و بوجهه الكريم و سلطانه القديم من الشيطان الرجيم اللهم افتح لى ابواب رحمتك و نكمل تلبيه اول ما نشوف الكعبه 😍🕋 بنقول اللهم زد هذا البيت تعظيما و تشريفا و مهابه و تكريما و زد كل من زارة تعظيما و تكريما و برا . و تدعى لنفسك الدعاء مستجاب مع أول نظرة للكعبه أن شاء الله ❤️
بعد كدة هنبدء فى الطواف بيكون 7 أشواط البدايه من عند الحجر الأسود لو مش شايفه من الزحمه ستار الكعبه مكتوب فوق الحجر الأسود الله اكبر بطول الستار من فوق لتحت برفع ايدى اليمين بشير اتجاة الحجر و بقول بسم الله الله أكبر 3 مرات و تدعى بقى باى دعاء براحتك و كل مرة بتوصلى عند الحجر الاسود بدايه شوط جديد و قبله علطول الجنب دة اسمه الركن اليمانى عندة بتدعى اللهم اتنا فى الدنيا حسنه وفي الاخره حسنه وقنا عذاب النار و خلى فى ايدك سبحه عداد عشان متتلخبطيش و طبعا طول الطواف لازم تفضلى على وضوءك لو حصل اى حاجه تطلعى تجددى وضوء و ترجعى تكملى من مكان ما وقفتى و طواف كانك فى صلاة بلاش رغى و ركزى فى عبادتك و معلومه ممنوع ❌ لمس الكعبه أثناء العمرة عشان فيها مسك تعطر اى وقت تانى زى طواف التطوع براحتك و أثناء العمرة البسى شنطه باك تحمى ضهرك من تزاحم و الرجاله ومتحطيش فيها فلوس أو موبايل خليها للشوز و المياة و المصليه
خلصنا طواف هنصلى ورا مقام سيدنا ابراهيم( ركعتين ) الاولى بالكافرون و التانيه الاخلاص لو معرفتيش من الزحمه تلاقى مكان خلف المقام ينفع فى صحن الكعبه اى مكان عادى
بعد كدة هنروح نشرب من زمزم لحد التضلع يعنى الشبع و طبعا بسم الله الاول نسمى و نشرب و ندعى كتير زمزم لما شرب له ربنا يستجيب منكم ❤️😍
بعد كدة السعى 🟢 بنروح ( الصفا و المروه ) المكان اللى كانت بتسعى فى السيدة هاجر وهى معاها سيدنا اسماعيل طفل رضيع و حصل فى معجزة زمزم و يكون 7 أشواط بتبدء من الصفا و بنقول الايه ( أن الصفا والمروة من شعائر الله فمن حج البيت أو اعتمر فلا جناح عليه أن يطوف بهما و من تطوع خيرا فأن الله شاكر عليم ) و نقول نبدء بما بدء الله به و نستقبل القبله اتجاة الكعبه و هنقول الدعاء الله اكبر الله اكبر الله اكبر لا اله الا الله وحدة لا شريك له الملك و له الحمد يحيى و يميت وهو على كل شيء قدير لا اله الا الله أنجز وعدة و نصر عبدة وهزم الأحزاب وحدة
و بنكرر الدعاء 3 مرات و تدعى بعدة باللى عايزينه و نبدء السعى الصفا شوط و المروة شوط و كل شوط بنكرر نفس الدعاء 3 مرات اتجاة القبله فى السعى البسى كروكس أو شوز نضيف أو شراب تقيل عشان متتعبيش و فى السعى غير واجب الوضوء مش محتاجه تكررى وضوءك و أثناء السعى هتلاقى فى ضوء أخضر عندة الرجاله بتهرول بتمد أو بتجرى يعنى لكن النساء تمشى عادى و تدعى عندة ربى اغفر و ارحم و تجاوز عن ما تعلم انك انت الاعز الاكرم
خلصنا السعى نتحلل من الإحرام اخر خطوة مهمه اوعى تنسى انك تقصى قدر عقله من أطراف شعرك وبلاش قدام الرجاله برة دة تصرف غلط فى ناس بتعمل كدة مالناش دعوة بيهم و كدة اتممتى عمرتك كامله ربنا يرزقكم 😍❤️
لما تحبى تعملى عمرة تانى هتكررى خطوات و انتى فى مكه بناخد شاور فى الفندق و نروح مسجد التنعيم و اسمه بردوة مسجد السيدة عائشه هناك بنتوضى و نصلى ركعتين و نروح للحرم ولو رايحه مزرات ممكن نحرم من عرفه نكون على وضوء و نيه للعمرة و هناك نحرم عادى
اى عبادات تانيه ثوابها عظيم بيتحسب 100 الف متخيله الجمال 😍كترى من الاطعام و صوم اثنين و خميس و اختمى القرآن هناك و متنسيش دوامى صلاة قيام الليل و استنى بعد الفجر اذكرى ربنا و أقرى قرآن لحد الشروق و صلى ركعتين الضحى ثوابها من صلى الفجر فى جماعه و صلى بعدها ركعتين الضحى له أجر حجه وعمرة تامه 🥰
(صلاة الجنازة 🟢)
احرصى عليها بتكون بعد كل فرض و ثوابها بحجم جبل احد طريقه صلاة الجنازة 4 تكبيرات بدون سجود ولا ركوع الاولى 🌸 الفاتحه فقط التانيه 🌸 الصلاة على الرسول اللهم صل على محمد و آل محمد كما صليت على ابراهيم و آل ابراهيم انك حميد مجيد و بارك على محمد و آل محمد كما باركت على ابراهيم وعلى آل ابراهيم 🌸 التالته الدعاء للمتوفى 🌸 الرابعه الدعاء لنفسك أن ربنا يرحمك يوم يبعث عبادة و نسلم مرة واحدة اتجاة اليمين
طواف التطوع ثوابه عتق رقبه و بيكون 7 أشواط حول الكعبه و صلاة ركعتين خلف مقام ابراهيم فقط لاغير و تقدرى تلمسى الكعبه براحتك مش زى العمرة ممنوع
الصلاة فى حجر اسماعيل كأنك صليتى جوا الكعبه المشرفه و يقال إن كل دعوات بتكون مستجابه و عشان تعرفى تدخلى معاد السيدات من عند باب الفتح بعد الفجر فى طابور و بيبدء دخول السيدات بدايه من الساعه 7 الصبح
و بالنسبه للحجر الأسود لمسه اوعى تدخلى فى زحمه وسط الرجاله فى للسيدات وقت فى الأذان الأول للفجر بيقعدو الرجاله استعداد للصلاة و يدخلو مجموعه من السيدات اللى قريبين من الحجر فى الطواف غير كدة متحاوليش ابدا تتزحمى وسط الرجاله
لو قريت كله ادعيلى ربنا يرزقك بعمرة ف2026 و و يستجيب دعواتك 😍
