28/10/2026
"O/L ඉංග්‍රීසි F සාමාර්ථයක් තිබ්බ කෙල්ලෙක් ඉස්සරහා සුද්දෝ කට ඇරගෙන ගල් ගැහිලා බලන් ඉන්න හැටි."
"අනේ මට ඉංග්‍රීසි බෑ...", "මට ඉංග්‍රීසි කතා කරන්න ලැජ්ජයි, බයයි.", "O/L වලට ඉංග්‍රීසි ෆේල් වෙච්ච මම කොහොමද ඉංග්‍රීසි කතා කරන්නේ."
අපේ රටේ තාරුණ්‍යය අතරින් නිතරම ඇහෙන මේ නිදහසට කාරණා හැම එකක්ම කුඩුපට්ටම් කරලා, තමන්ගේම උත්සාහයෙන් සහ නොසැලෙන ධෛර්යයෙන් සුද්දන්ගේම බසින් සුද්දන්ව වශී කරගත්තු දකුණේ අපූරු කෙල්ලෙක් ගැනයි මේ කතාව.
නමින් ඇය ඩී.එච්. සුදේශිකා ප්‍රියානි. වයස තාම අවුරුදු 25යි. ළඟකදී සමාජ මාධ්‍යවල සැරිසැරූ කෙනෙක් නම්, චීත්තයක් හැඳගෙන, සංචාරක සුද්දෝ පිරිවරාගෙන, බ්‍රිතාන්‍ය ආරයේ සුපිරි ඉංග්‍රීසියකින් කුරුඳු තලන හැටි විස්තර කරන මේ කෙල්ලව අනිවාර්යයෙන්ම දැකලා ඇති.
"ඔයා පිටරට කැම්පස් එකක ඉගෙන ගත්ත කෙනෙක්ද?"
සුද්දෝ එහෙම අහද්දි සුදේශිකා හිනාවෙලා දෙන උත්තරය ඇහුවම ඕනෑම කෙනෙක් පුදුම වෙනවා. මොකද ඇය ඉස්කෝලේ ගියේ සාමාන්‍ය පෙළ වෙනකම් විතරයි. O/L විභාගයේදී ඉංග්‍රීසි විෂය සම්පූර්ණයෙන්ම අසමත් (F) වුණු කෙනෙක්.
පුංචි කාලෙම දෙමව්පිය සෙනෙහස අහිමි වෙලා, අවුරුදු 32ක් තිස්සේ කුරුඳු තලපු සීයා සහ අත්තම්මා ළඟ හැදුණු සුදේශිකා, වයස අවුරුදු 12 ඉඳන්ම සීයාට උදව්වට කුරුඳු තලන්න හුරු වුණා. විවාහයෙන් පස්සේ නුවර පදිංචියට ගියත්, වයසක සීයා තනියම දුක් විඳිනවා දැකලා ඇය මහත්තයත් එක්ක ආයෙමත් බලපිටියට ආවේ සීයාගේ අතපය වෙන්න.
බලපිටියේ කුඩා දූපතක කුරුඳු තලද්දී ඇයට තේරුණා ලොකු දෙයක්.
"අපි කොච්චර මහන්සි වෙලා කුරුඳු තැලුවත් වැඩක් නෑ, මාදු ගඟ බලන්න එන සංචාරකයන්ට මේවා විකුණගන්න බැරි වුණොත්."
බෝට්ටු පදින ගයිඩ්ලා සුද්දන්ට කුරුඳු ගැන විස්තර කරන විදිහ ඇය අහගෙන හිටියා. Grammar වරදියි කියලා බය වුණේ නෑ. වැරදි වැරදි හරි කතා කළා. ගයිඩ්ලා වැරදි හදලා දුන්නා. බය නැතුව, ලැජ්ජාව පැත්තකින් තියලා, දිනපතාම ප්‍රායෝගිකව වචන ගලපන්න පටන් ගත්තා.
අන්තිමේදී මොකද වුණේ? අද ඇය වියළි පොල් අත්තක් උඩ ඉඳගෙන, කුරුඳු පොත්ත ගලවන හැටි, කුරුඳු තෙල් සහ කුරුඳු හඳුන්කූරුවල ගුණාගුණ ඉංග්‍රීසියෙන් විස්තර කරන්නේ කිසිම විශ්වවිද්‍යාල මහාචාර්යවරයෙකුට නොදෙවෙනි චතුර බවකින්.
පිටින් බලන කෙනෙකුට මේක හරිම ආකර්ෂණීය කතාවක් වුණත්, මේ කෙල්ලගේ ඇත්ත ජීවිතය පිරී තිබෙන්නේ දැඩි කැපකිරීම්වලින්.
* උදේ 8.30 සිට හවස 5.30 දක්වා, දූපතට වී සංචාරකයන්ට කුරුඳු විස්තර කරමින් වෙළඳාමේ යෙදීම.
* රාත්‍රියේ සිට පාන්දර 2.00 දක්වා: ගෙදර ඇවිත්, ඊළඟ දවසේ විකිණීම සඳහා සීයා සමඟ නොනවත්වා කුරුඳු තැලීම.
අවුරුදු 3ක පුංචි දියණියකගේ මවක් වන සුදේශිකාගේ එකම බලාපොරොත්තුව දුවට හොඳින් උගන්වන එක සහ තමන් උපයාගත් මේ ඉංග්‍රීසි දැනුමෙන් ප්‍රයෝජන අරන් අනාගතයේදී උසස් පෙළ විභාගයට පෙනී සිටීමයි.
"ඉංග්‍රීසි කතා කරන්න ලොකු ලොකු කෝස් කරන්නම ඕනෙ නෑ. ඕනෙ කරන්නේ අනෙක් අය හිනාවෙයි කියන බය නැති කරගෙන, නොනවත්වා උත්සාහ කරන එක විතරයි!"
අතේ සතේ නැතුව පටන්ගෙන, සමාජයේ සම්ප්‍රදායික බාධක සහ භාෂා බිය පරදවමින් තමන්ගේ දෙපයින් නැගී හිටින මේ වගේ දිරිය කෙල්ලන් සැබවින්ම මුළු රටේම තාරුණ්‍යයට අමිල ආදර්ශයකි.
ඔබත් කවදාහරි මාදු ගඟේ සවාරියක් ගියොත්, බලපිටියේ කුරුඳු දූපතට ගොඩවෙලා සුදේශිකාගේ ඒ අභිමානවත් ඉංග්‍රීසි කතාව අහලා, ඇගෙන් කුරුඳු ටිකක් අරගෙන එන්න අමතක කරන්න එපා.
ජීවිතය දිනන්න වෙරදරන අපේ දිරිය දියණියට අපේ උණුසුම් සුබපැතුම්! ❤️🇱🇰
