14/06/2020
සැලසුම් නොකල චාරිකා වඩාත් සාර්ථකයි කියනව නේද? මේකත් ඒ වගේ ගමනක්. කලින් දවසේ හවස
කතා වුනේ ඇල්ල යමුද කියලා. ඒවගේම ladies only චාරිකාවක්. තනුජි, ලලී සහ මම තමයි මේ ගමනට සහභාගි වූයේ. ගෑනු අය විතරක් තනියෙන් ගමන් යන්න බයයි වගේ නේද. ඒකත් ලංකාව වගේ රටක. ඒත් පිටරට වල ගැහැනු ලමයි තනියම ඇවිත් අපේ රටේ සුන්දරත්වය විදලා යනවා. පොඩි අවදානමකුත් නැතුව නොවෙයි. කෙසේ නමුත් අප උදේ 5.55 පොඩි මැණිකේ දුමරියට කොලඹින් ගොඩවුනේ හපුතලේ බලා පිටත්වීමට.
කොලඹ සිට බදුල්ල දක්වා දිවෙන දුම්රිය ගමන් මාර්ගය ලෝකයේ සුන්දරම සංචාරක දුම්රිය මාර්ග වලින් එකක්.බොහෝ විදේශීය සංචාරකයන් අනිවාර්යයෙන් උඩරට දුම්රියෙන් ඔවුන්ගේ සිහින පාරාදීසය වන ඇල්ල බලා ගමන්කරයි. විදේශීය මෙන්ම දේශීය සංචාරකයන්ගේද සුන්දර ගමනාන්තයන් වන නුවර,ගම්පොල, ගලබොඩ, හැටන්, ග්ර්ට්වෙස්ටර්න්, නානුඔය, පට්ටිපොල, ඔහිය, ඉදල්ගහින්න, හපුතලේ, බන්ඩාරවෙල, කිතල් ඇල්ල, ඇල්ල,දෙමෝදර හරහා මෙම සුන්දර දුම්රිය ගමන් මාර්ගය බදුල්ල දක්වා වැටී ඇත.කලින් වරක් මා කුඩා කල දෙමාපියන් සමග නානුඔයට ගොස් ඇති අතර එම මාර්ගය ඉතා සුන්දර වටපිටාවකින් යුත් බවට අපැහැදිලි මතකයන් සමග කාලයක් තිස්සේ යෑමට බලාපොරොත්තුවෙන් සිටි ගමනකි. හෙමින් සීරුවේ ලළනා ගමනකින් පොඩි මැණිකේ දුම්රිය කදු හෙල් පසුකරමින් තේවතු මැදින් වංගු ගැසෙමින්, බිංගෙවල් තුලින්, කලෑ පසුකරමින්, නිම්න මතින් වැටුනු පාලම් මතින් මිහිදුම් පිරුනු සීතල පරිසරයක් හරහා ඉදිරියට ඇදුනේ දිව්යලෝකයට යන පාරක්ද කියා අපට සිහිකරමිනි. කලින් අප තරනයකල ග්ර්ට්වෙස්ටර්න් කදුවැටිය මිහිදුම්න් වටවී තිබෙන ඉතා සුන්දර දසුනක්ද අපට දැකගත හැකිවිය.
අප සිටි දුම්රිය මැදිරියේ හරි අඩකට වඩා සිටියේ විදේශීකයන් වන අතර ඔවුන් එම ගමනේ සුන්දරත්වය විදින ආකාරයත් විවිධ වර්ගයේ කැමරා මානාගෙන එකතුකර ගන්නා මතකයන් දුටු මා හට මගේ රටේ සුන්දරත්වය ගැන ආඩම්බරයක් ඇතිවිය. එමෙන්ම ඉවතලන දෑ දුම්රියේ නියමිත ස්ථානයේ බහාලීමට තරම් ඔවුන් විනයගරුකවන අතර ඉවතලනදෑ සිටින
තැන බිමට අතහැරීම මෙන්ම ජනේලයෙන් පිටතටද විසිකරන අප රටේ බොහෝ මිනිසුන්ට එම විදේශිකයන් ආදර්ශයකි. අප ගමනාන්තය හපුතලේ වුවත් බදුල්ල බලා යෑමට තීරනය කලේ කිසි දිනක මා බදුල්ල බලා දුම්රියෙන් ගොස් නොමැති බැවිනි. ඇල්ල දුම්රිය ස්ථානය පසුවූ විට අප ජනෙල් වලින් එබී දෑස් අයා සිටියේ ලෝක ප්රකට ආරුක්කු නවයේ පාලම මතින් දුම්රිය ගමන් ගැනීම නැරඹීමටය. කොහොම නමුත් ඒ වගේ දේවල් කරනවා නම් ඉතින් පරිස්සමින්. සවස 5 ට පමන පොඩි මැණිකේ බදුල්ල දුම්රියපලට ලගා වූ අතර අප ආපසු සවස 5.30 බදුල්ලෙන් කොලඹ බලා පිටත්වන තැපැල් දුම්රියෙන් හපුතලේ බලා පැමිනියේ කලින් වෙන්කරගත් ස්ථානයේ රාත්රිය ගතකිරීමටයි.
පසුවදා උදෑසන අවදිවූ අප කලින් සැලසුම්කර සිටි ඇල්ල ප්රදේශයේ ස්ථාන නැරඹීම වෙනුවට උඩු දියලුම යෑමට තීරයනය කලේ ලලීගේ යෝජනාව මතය. ඉතා කෙටිවෙලාවකින් එම ස්ථානයේ තොරතුරැ රැස්කරගත් අප උදේ අහාර රැගෙන ත්රීරෝදරථයකින්
කොස්ලන්ද බෙරගල ප්රදේශය බලා පිටත්වූයේ කාන්තාවන් තිදෙනෙකුට පමනක් යෑම අනාරක්ෂිත යැයි හැගීමක් ඇතිකරත් උඩුදියලුම නැරඹීමටය.
උඩු දියලුම කියන්නේ ලංකාවේ උසින් දෙවන ස්ථානය හිමිවන දිය ඇල්ල වන දියලුම (220 m) ඇල්ල පහල වැටීම පටන් ගන්නා ස්ථානය හා උඩු දියලුම දිය ඇලි සහ ඒ වට පිහිටි මනස්කාන්ත පරිසරයයි. උඩු දියලුමට යෑමට මාර්ග තුනක් ඇතත් අප තෝරාගත්තේ දියලුම ඇල්ල පසුවී කිලෝමීටරක් පමන කොස්ලන්ද දෙසින් ඇති මාර්ගයයි. රබර් වත්තක් මැදින් දිවෙන මේ පාර දිගේ ගොස් කුඩා ගමක් මැදින් කුඩා කදුගැටයක් නැග පැයක පමන කාලයකින් අපට පූනගල ඔය කදුමුදුනින් පහලට වැටී දියලුම ඇල්ල නිර්මානය වන ස්ථානයට ලගාවීමට හැකිවිය. දියලුම ඇල්ල ඉහල පිහිටි ස්වාභාවික තටාකයට බොහෝ අය බහින නමුත් අප ගියේ වර්ෂාව අධික දිනක බැවින් එයට බැසිම අවදානම සහගත විය. අප එහියන විට අපව පිලිගැනීමට පැමිනියේ සුදුපැහැති කුඩා බලුපැටියෙකි. අපට ඉතා ලෙන්ගතුවූ එම බලු පැටියාට අප සතුවූ අහාර ලබා දුන් අතර ඇගේ කිනිතුල්ලන් පිරීහිටපු නිසා උන් අයින් කිරීමට ඔයේ වතුරින් නෑවීම හැර වෙන විකල්පක් අපට තිබුනේ නෑ. එයා අපිත් එක්කම උඩු දියලුම දිය ඇලි ලගටම ආව. ඇත්තටම එයාව ගෙදර ඇවිල්ලත් මතක් උනා. ඒත් එයා වෙනුවෙන් මුකුත්ම අපට කරගන්න බැරිඋනා කියලා තමයි හිතුනේ.
ඊට පසු අප උඩුදියලුම ඇල්ල (30 m) මුදුනට ගියා. අප එහි යන විටත් විදේශීකයින් කිහිප දෙනෙක් ඇවිත් ඇල්ල මුදුනේ සිට පහල තිබෙන ස්වාභාවික තටාකයට පනිනවා. ඒත් එම තටාක ගැඹුරු බව ඒවායේ අදුරු පැහැහෙන් බැලූබැල්මටම පේනවා. පිහිනීමට නොහැකි අය මෙම ගැඹුර නොදන්න තටාකවලට පැනලා අනවශ්ය ජීවිත අවදානමක් ගන්න එපා. දිය ඇල්ල මුදුනේ සිට මදක් ඉහලට ගිය විට හිතේ හැටියට පැනලා නාගන්න පුලුවන් තැනක් තියෙනවා. ඒකට පැනලා නාගත්ත අපි එතන තියන කඩේට ගිහින් කෝපි එකක් බොන ගමන් කඩේ හියපු සීයා එක්ක කතාවට වැටුනා. සීයා කියනවා එතන හොල්මන් තියනවලු. උඩු දියලුම ඇල්ලට උඩින් තියන කුඩා ඇල්ල, නිසල දිය ගැඹුරුයි කියනවා වගේ එතන නාපු අය මැරිලා තියනවලු. බිලිගන්න තැනක් කියලා තමයි සීයනම් කිවේ. ඒ වගේම ජනප්රවාදයක් තියනවලු දියලුම ඇල්ල සමග තරුන රජ කෙනෙක් හා කුලයෙන් අඩු කාන්තාවක් හා සම්බන්ද ශෝකාන්තයක්. දියලුම ඇල්ල තරනය කරලා වාර්ථාවක් තියන්න ගිය දමින්ද නම් තරුනයෙක් ඇල්ලෙන් වැටිලා මිය ගිහින් තියනවා.
ගොඩක් අනතුරු වුන සහ වෙන්න පුලුවන් තැනක් ඒක නිසා මෙතෙන්ට ගියොත් ඔයාලගේ ආරක්ෂාව ගැන අවදානයෙන් ඉන්න.
පසුව අප පයින්ම දියලුම ඇල්ල පහලට ආවා. අපි මේ දිය ඇල්ල උඩ හිටියා කියනකොට පුදුමත් හිතුනා. මොකද දියලුම කෙල්ල ඒතරම් උසයි. වහින දවස් නිසා පාරටත් වතුර විසිවෙනවා.එතන තියෙන් කඩෙන් කෝපි අරගෙන ඇල්ල ඉස්සරහා තියන පාලම උඩ ඉදන් ඇල්ල දිහා බලාගෙන දිය ඇල්ලෙන් විසිවෙන් වතුරෙ තෙමීගෙන කෝපි කෝප්පයක් බොන එකෙත් අමුතුම ගතියක් තියනවා. ඇත්තටම අපි තුන්දෙනා මේ ගමන තනියම ගියා කියලා හිතෙන කොටත් පුදුම හිතෙනවා. ඒ වගේම කාලෙකින් ගිය නිදහස් ලස්සන ගමනක්.
පව්ලේ සියලු දෙනාම එක්ක උනත් ගිහින් දවස ගතකරලා එන්න පුලුවන් ගමනක්. මග පෙන්වන අය ගමෙන් හොයා ගන්න පුලුවන්. ඒත් යනව නම් ඔබේ ආරක්ෂාව සහ පරිසරයයේ ආරක්ෂාව ගැන සැලකිලිමත් වෙන්න.
✍️ සත්යා ධනුසේකර
📸 අප ලබාගත් ඡායාරූප වලට අමතරව අන්තර්ජාලයෙන් ලබාගත් දියඇලිවල ඡායාරූප කිහිපයට එහි හිමිකරුවන්ට ස්තූතිය හිමිවිය යුතුය.
