06/09/2026
දේශපාලනයේ පෙණ කැටි මොහොතින් මොහොත වෙනස් වෙන්න පුළුවන්. ඒත් මහපොළොව මත ලෙයින් සහ කඳුළින් ලියවුණු යථාර්ථයක් තියෙනවා. ඒක වෙනස් කරන්න අද සමාජ මාධ්‍යවල කෑගසන කිසිම එකෙකුට බෑ.
අද වැලිකඩ ළඟ සිද්ධ වුණු දේකට හිනාවෙන, විහිළු කරන උන්ට මතක නැති වුණාට මේ රටේ ඇත්ත මිනිස්සුන්ට අමතක නැති අතීතයක් තියෙනවා.
මහින්ද කියන්නේ කැමරා ඉස්සරහා හදපු, සෝෂල් මීඩියා සුළඟට ගසාගෙන යන ජාතියේ ලපයි සිපයි වීරයෙක් නෙමෙයි. එයා මේ රටේ මහපොළොවෙන්, ගමේ පීඩිත මිනිසුන්ගේ සුසුම් අතරින් නැගිටපු, අභියෝග හමුවේ නොසැලුණු සැබෑ චරිතයක්.
මඩු පල්ලියේ උත්සවයට යන්න හදද්දී, "ඒක කොටින්ගේ පාලනයේ තියෙන්නේ, හමුදාවට එන්න බෑ, අපි ආරක්ෂාව දෙන්නම්" කියලා කොටි කියද්දී, "මම ඊළඟ අවුරුද්දේ උත්සවයට එන්නේ මෙහෙන් කොටින්ව පන්නලා, මගේ රටේ හමුදාවේ ආරක්ෂාවත් එක්ක" කියලා කියපු, ඒක කරලම පෙන්වපු එකම පොර මහින්ද.
බටහිර බලවත්තු කොළඹට කඩා වදිද්දී, "අපි උඹලගේ යටත් විජිතයක් නෙමෙයි" කියලා මුහුණටම කියන්න තරම් කෙළින් කොඳුනාරටියක් එතුමාට තිබ්බා.
ජාත්‍යන්තරයේ මහ එවුන් "අපි ඔබතුමාගේ මිතුරන්" කියද්දී, "මම මිතුරන් කවුද, සතුරන් කවුද කියලා හොඳට අඳුනනවා" කියලා නොසැලී හිටපු ඒ පෞරුෂය අද කාටද අමතක කරන්න පුළුවන්?
ඉන්දියාව, පාකිස්තානය, චීනය විතරක් නෙමෙයි, පලස්තීනයයි ඊශ්‍රායලයයි දෙකම එකවර යාළු කරන් ගේම ගහපු මහා රාජ්‍ය තාන්ත්‍රිකයෙක්. චාල්ස් කුමාරයා එද්දී අතට අත නොදී "ආයුබෝවන්" කියලා අපේ සංස්කෘතිය ලෝකෙටම පෙන්නපු අභිමානවත් නායකයෙක්.
වැරදි නැතුව නෙමෙයි. ලංකාවේ දේශපාලනය කියන්නේ මල් යහනාවක් නෙමෙයි. ඕනවට වඩා සරල වෙන්න ගියොත් මොකද වෙන්නේ කියලා ගෝඨාගේ කාලේ මුළු රටම දැක්කා. ඒත් ඒ සියල්ලටම වඩා, මහින්ද මේ රටට දුන්නේ මුදලට ගන්න බැරි දෙයක්. ඒ තමයි "අභයදානය".
බෝම්බ පුපුරන පාරවල්වල, මායිම් ගම්මානවල බයෙන් ජීවත් වුණු මිනිස්සුන්ට "ජීවත් වීමේ අයිතිය" දුන්න එක මිල කරන්න පුළුවන්ද? ධනපති පන්තියටයි දුප්පත් පන්තියටයි සීමා වෙලා තිබ්බ රටේ, ගමේ එකාට උඩට එන්න පාලම හදලා මැද පන්තිය හැදුවේ මහින්ද. අද එතුමාට සාප කරන ගොඩක් උන් 2005ට කලින් තමන්ගේ ගම් තිබ්බ හැටි අමතක කරපු උන්.
88/89 කාලේ කොල්ලන්ගේ ජීවිත බේරගන්න ජිනීවා ගිය මහින්දට අද ඉන්න දේශපාලන අංකුරයෝ එක්ක කිසිම තරඟයක් නෑ. එයා ඉන්නේ වෙනම ලෙවල් එකක. දුටුගැමුණු, පරාක්‍රමබාහු, සීතාවක රාජසිංහලා එක්ක එක පෙළේ තියන්න පුළුවන් අපේ කාලේ හිටපු එකම ජනාධිපති.
දැන් එතුමාට වයසයි. කවදා හරි ඒ මහා වෘක්ෂය බිම ඇද වැටෙයි. හැබැයි එදාට ඉතිහාසය ඔහුව තබන්න ඕන තැන හරියටම තියාවි. මහාවංශයේ වෙනමම පරිච්ඡේදයක් මහින්ද වෙනුවෙන් ලියවේවි. ඒක මකන්න ලෝකෙ කාටවත් බෑ!
🙏🙏
Copied
