Malsia E Karadakut-f.Burim-Izvor

03/10/2026

- REAGIM –

TË NDALOJMË HEDHJEN E MBETURINAVE NË HYRJE TË FSHATIT BURIM (IZVOR)

Në hyrje të fshatit Burim (Izvor), në territorin e fshatit Allashec, pikërisht në udhëkryqin e rrugëve Sllupçan–Burim (Izvor) dhe Orizare–Burim (Izvor), vazhdon të hidhen mbeturina në mënyrë të papërgjegjshme.

Kjo nuk është vetëm një çështje e pastërtisë së fshatit. Bëhet fjalë për një rrugë të rëndësishme që lidh këtë zonë edhe me Gjilanin dhe nëpër të cilën qarkullojnë çdo ditë automjete nga të dyja anët. Pamja e mbeturinave në këtë pjesë është e turpshme dhe krijon një imazh shumë të keq për të gjithë zonën dhe për çdo udhëtar që kalon këtu.

Në emër të Këshillit të fshatit Burim (Izvor) dhe Shoqatës “Burimi i Karadakut”, kërkojmë nga Komuna e Likovës dhe organet kompetente që të marrin masa konkrete:

Të pastrohet menjëherë kjo hapësirë;
Të vendosen tabela të qarta “NDALOHET HEDHJA E MBETURINAVE”;
Të vijëzohet dhe të rregullohet hapësira përkatëse;
Të shtohet mbikëqyrja në këtë lokacion;
Dhe ndaj personave që hedhin mbeturina të merren masa ndëshkuese sipas ligjit.

Kjo hapësirë është hyrje e fshatit dhe pjesë e një rruge që frekuentohet çdo ditë. Nuk mund të lejojmë që hyrja e vendbanimit tonë dhe një rrugë kaq e frekuentuar të shndërrohet në deponi.

Kërkojmë reagim dhe veprim konkret nga institucionet kompetente.

Pastërtia dhe kujdesi për mjedisin janë përgjegjësi e të gjithëve, por zbatimi i rregullave dhe ndëshkimi i shkelësve është përgjegjësi e institucioneve.

Këshilli i fshatit Burim (Izvor)
Shoqata “Burimi i Karadakut”

13/08/2026

MIRËNJOHJE DHE FALËNDERIM

Në emër të Këshillit të fshatit Burim(Izvor), shprehim mirënjohjen dhe falënderimin tonë të sinqertë për zjarrfikësit, policinë, banorët e fshatit dhe të gjithë ata që dolën në ndihmë gjatë zjarrit që përfshiu pjesen e quajtur Te Livadhet .

Falë angazhimit, gatishmërisë dhe bashkëpunimit të të gjithëve, zjarri u lokalizua dhe situata u vu nën kontroll.
Një falënderim i veçantë për zjarrfikësit që u përballën drejtpërdrejt me rrezikun, për policinë për sigurimin e vendit dhe për bashkëfshatarët tanë që pa hezitim u bashkuan për të ndihmuar.

Kur jemi bashkë, e kalojmë çdo vështirësi.
Faleminderit nga zemra të gjithëve!

Këshilli i fshatit Burim(Izvor).

12/08/2026

NJOFTIM – THIRRJE PËR BASHKFSHATARËT
Të dashur bashkëfshatarë,
Në fshatin Izvor është përhapë një zjarr te centralla e rrymës, ku përreth ka edhe shtëpi banimi.
Në emër të Këshillit të fshatit, ju bëjmë thirrje të gjithë atyne që kanë mundësi me dalë me ndihmu, e sidomos banorëve që i kanë shtëpitë afër vendit ku asht zjarri.
Çdo dorë ndihme asht e rëndësishme. Ju lutemi, kush ka mundësi, të dalë sa ma shpejt dhe të ndihmojë në koordinim me ekipet që janë në vendngjarje.
Kujdesuni për sigurinë dhe mos u afroni te vendet e rrezikshme.
Me respekt,
Këshilli i fshatitBurim(Izvor)

02/08/2026

TAKIMI I BASHKËFSHATARËVE TË FSHATIT BURIM (IZVOR)

Sot, në fshatin tonë të dashur Burim (Izvor), u mbajt takimi i bashkëfshatarëve, i organizuar nga Këshilli i Fshatit, i cili kishte karakter festiv, shoqëror dhe informues.
Ky takim ishte një mundësi e mirë që bashkëfshatarët të mblidhen, të bisedojnë, të kujtojnë të kaluarën dhe njëkohësisht të shohin përpara, drejt projekteve dhe angazhimeve të reja për të mirën e fshatit tonë.
Gjatë takimit, kryetari i Këshillit të Fshatit, Jeton Abazi, informoi të pranishmit për punën dhe aktivitetet e realizuara deri më tani, si dhe për angazhimet, planet dhe sfidat që e presin Këshillin në periudhën e ardhshme.

U theksua rëndësia e bashkëpunimit, unitetit dhe kontributit të secilit bashkëfshatar në zhvillimin dhe përparimin e Burimit.

Atmosferën festive të këtij takimi e begatoi edhe më shumë prezenca e këngëtarit Arif Murati, i cili me këngët e tij burimore dhe interpretimin e veçantë krijoi një atmosferë të ngrohtë dhe të paharrueshme për të gjithë të pranishmit.

Nuk munguan kënga, vallëzimi, buzëqeshjet dhe shoqërimi mes bashkëfshatarëve. Për të gjithë të pranishmit, Këshilli i Fshatit kishte përgatitur edhe një koktej dhe pritje të përbashkët, duke e bërë këtë ditë edhe më të veçantë.

Një falënderim i veçantë dhe i përzemërt shkon për të gjithë bashkëfshatarët që morën pjesë në këtë takim, e veçanërisht për mërgimtarët tanë, të cilët edhe pse larg vendlindjes, vazhdojnë të jenë të lidhur ngushtë me Burimin dhe të tregojnë interes e përkushtim për vendlindjen e tyre.
Pjesëmarrja juaj është dëshmi se Burimi na bashkon të gjithëve, pavarësisht se ku jetojmë.

Këshilli i Fshatit shpreh mirënjohje për secilin që kontribuoi në organizimin dhe mbarëvajtjen e këtij takimi dhe shpreson që ky aktivitet të shndërrohet në një traditë të përvitshme.
Urojmë që vitin e ardhshëm të takohemi sërish, me edhe më shumë bashkëfshatarë, me një manifestim edhe më të pasur, më madhështor dhe me shumë më tepër aktivitete.

Burimi është shtëpia jonë e përbashkët.
Ta ruajmë, ta zhvillojmë dhe ta bëjmë çdo ditë e më të bukur!

Me respekt,
Këshilli i Fshatit Burim (Izvor)

08/07/2026

❤️ Një ditë për Burimin, një kujtim për gjithë jetën!

Më 2 gusht, në ora 12:00, le të lëmë për disa orë angazhimet dhe të mblidhemi të gjithë në fshatin tonë.

Ejani me familjet tuaja, me fëmijët, me të afërmit dhe miqtë. Le ta kthejmë këtë takim në një festë të unitetit, respektit dhe krenarisë për Burimin.

Mos prit që të tjerët ta bëjnë fshatin më të mirë. Fillimi është prania jote.

🏠 Vendi:Shkolla e fshatit.

Burimi na thërret. Të gjithë së bashku, më 2 gusht, ora 12:00!

05/07/2026

28/06/2026

NJOFTIM PËR BANORËT E FSHATIT BURIM (IZVOR)
Njoftohen të gjithë banorët se në fshatin Burim ka ardhur makineria për gërryerjen (hapjen) e bunarëve.
Të gjithë ata që janë të interesuar për hapjen e bunarit të tyre, mund të paraqiten në fshat dhe të kontaktojnë ekipin sa kohë që makineria ndodhet këtu.
Mos e humbni këtë mundësi! Ju lutemi, njoftoni edhe familjarët, fqinjët dhe miqtë që mund të kenë interes.
Faleminderit!

Keshilli i fshatit

12/06/2026

SHOQATA “BURIMI I KARADAKUT”
THIRRJE PËR ANGAZHIM DHE BASHKËPUNIM
Të nderuar bashkëfshatarë,
Shoqata “Burimi i Karadakut” është duke punuar në realizimin e projekteve dhe aktiviteteve të ndryshme në interes të fshatit tonë. Për të arritur rezultate sa më të mira, kemi nevojë për përfshirjen dhe ndihmën e sa më shumë të rinjve.
Prandaj, ju bëjmë thirrje që secili prej jush të propozojë ose të inkurajojë të paktën një djalë ose vajzë të re nga fshati ynë, që është në studime ose i ka përfunduar studimet, të angazhohet vullnetarisht në aktivitetet e shoqatës.
Veçanërisht kemi nevojë për të rinj që:
Zotërojnë gjuhën angleze;
Kanë njohuri në përdorimin e kompjuterit dhe teknologjisë informative;
Janë të gatshëm të kontribuojnë me njohuritë dhe aftësitë e tyre për të mirën e fshatit.
Angazhimi i të rinjve është një investim për të ardhmen e Burimit (Izvorit). Me energjinë, dijen dhe idetë e tyre, mund të përgatisim projekte më cilësore dhe të sigurojmë më shumë mundësi zhvillimi për vendlindjen tonë.
Ju lutemi ta merrni seriozisht këtë kërkesë dhe të na ndihmoni në identifikimin dhe përfshirjen e të rinjve që mund të japin kontributin e tyre.
Së bashku mund të bëjmë më shumë për Burimin (Izvorin) tonë.
Me respekt,
Shoqata “Burimi i Karadakut”
Burim (Izvor)