Велосипедска Патека - Убавините на Пехчево на велосипед

28/11/2015

http://mk.milieukontakt.mk/?p=5582

25 November 2015 Tweet Завршен настан и промоција на резултатите од проектот „Промовирање на интегриран пристап за одржливо управување со карактеристичните природни ресурси во Пехчево“ спроведен од Милиеуконтакт Македонија На ден 25.11.2015 година, со почеток во 11:00 часот во кафе бар „Square“ во П…

11/11/2015

Велосипедска патека „Убавините на Пехчево на велосипед“

11/11/2015

Почитувани велосипедисти, планинари, љубители на природата...
Со огромно задоволство Ве известуваме дека велосипедската патека „Убавините на Пехчево на велосипед“ која што е направена во рамки на проектот „Промовирање на интегриран пристап за одржливо управување со карактеристичните природни ресурси во Пехчево“,проект кој е дел од Програмата за зачувување на природата во Македонија, а чиј имплементатор е Здружението за одржлив развој Милиеуконтакт Македонија, е подготвена да ве пречека и почести со своите убавини. Патеката е со вкупна должина од 10km и истата го поврзува градот Пехчево со трите локалитети „Вртена скала“, „Делибови кашчи“ и „Јудови ливади“ со инсектојадното растение Drosera rotundifolia. Истата е маркирана, поставени се информативни табли, патокази, канти за отпад долж истата, изготвена е мапа за Ваше олеснато движење. Исто така Ве известуваме дека во рамки на проектот, општина Пехчево и официјално има 7 обучени Локални водичи во природа, кои се секогаш тука за Вас за да ви ги покажат убавините на Пехчево и околината. За било какви информации, ви стоиме на располагање.
Со почит
Ирена Кракутовска - координатор на проектот

16/10/2015

Локалитетот Делибови кашчи се наоѓа на 3,5 км источно од градот Пехчево. Тоа е пештера, висока карпа во која што има отворен дел со димензии од 7м на 8м. Месното население ја раскажува легендата од турско време според која одамна некогаш имало некој турски арамијапо име Дели Ибо кој правел зулуми низ Пехчево и околината. Еден ден жителите се собрале и го протерале арамијата и тој нашол прибежиште во една пештера заедно со неговата дружина. Меѓутоа лошиот Дели Ибо продолжил да прави терор врз локалното население. Со цел да се заштитат, луѓето од Пехчево и околината повторно се собираат и ги убиваат арамијата и дружината токму во оваа пештера која од тогаш го носи името Делибови кашчи.

16/10/2015

Drosera rotundifolia – Инсектојадното растение Drosera rotundifolia (округлолисна муволовка) се наоѓа на сфагнумските тресетишта на локалитетот Јудови ливади, на само 3км од Пехчево, на надморска височина од околу 1200м и е единствено наоѓалиште од овој растителен вид на територијата на Република Македонија. Видовите од родот Drosera се застапени во планинскиот регион на Алпите, во северна Европа, Канада, Азија и др. Растението се исхранува со инсекти, на карниворен начин на исхрана што претставува приспособување кон живеалиштата богати со органска материја каде што неорганските материи се нeдостапни , а рН реакцијата на почвата е кисела. Инсектите се привлечени од црвената боја на растението и светлечките капки желатинозна материја која ја излачува. Понатаму со помош на своите ензими ги разложува прилепените инсекти, користејќи ги од нив хранливите материи кои му недостасуваат. Во сите надземни делови содржи хетерозид розолизен, кој по хидролизата и оксидацијата на агликонот ослободува нафтохинонски дериват плумбигин. Период на вегетација од почеток на јуни до почеток на септември, а цвета во јули.

16/10/2015

Вртена Скала е карпест остаток со карактеристичен изглед, висок околу 5 m. Се наоѓа 4 km источно од Пехчево, во пазувите на Буковик и врвот Орловец Претставува огромна компактна камена целина обликувана низ еден долг временски период под влијание на водата, ветрот, сонцето и мразот. Низ средишниот дел на карпата има отвор широк околу 0,6 m и долг околу 2,5m. Кај месното население постои верување дека протнувањето низ карпата им помага на жените кои немаат деца да добијат пород, а на малите деца им помага од несоница и немир.

16/10/2015

Во рамките на проектот „Промовирање на интегриран пристап за одржливо управување со карактеристичните природни ресурси во Пехчево“, во 2015 година на територијата на општина Пехчево се направи првата велосипедска патека за планински велосипедизам во оваа општина. Должината на патеката е 10 km, има изработено мапа и истата е обележана со табли и патокази.. Оваа патека го поврзува градот Пехчево со трите локалитети „Вртена скала“, „Делибови кашчи“ и „ Јудови ливади со инсектојадното растение – Drosera rotundifolia“ кои што се дел од богатата биоразновидност и георазновидност на општина Пехчево. Инаку проектот е дел од Програмата за зачувување на природата во Македонија. Национален координатор на програмата е Helvetas Swiss Intercooperation од Швајцарија и Фармахем - Скопје, и истата е финасирана од Швајцарската агенција за развој и соработка (SDC) во Македонија. Имплементатор на проектот е Здружението за одржлив развој Милиеуконтакт – Македонија, а истиот е подржан и од Општина Пехчево.