18/04/2026
Allahu i Lartësuar më nderoi me hyrjen në Qaben e Shenjtë një herë, dhe kjo ndodhi në ditën e larjes së saj, në mesin e muajit të shenjtë Muharrem të vitit 1432 H.
Para kësaj, kisha lexuar për vendin ku u fal Profeti ﷺ kur hyri në Qabe ditën e Çlirimit (Mekës), dhe se vendi i faljes së tij ishte drejt murit përballë derës së Qabes. Ky vend është përcaktuar me një pllakë të bardhë që është vendosur aty ku është falur ai ﷺ.
Nuk mund ta përshkruaj ndjesinë time në atë moment; nuk kam përjetuar kurrë më parë dhe as më pas një ndjesi të tillë. Mund të them se humba plotësisht përqendrimin dhe nuk ndjeja më asgjë në mënyrë reale, sikur të isha në ëndërr. Ndjeva një lehtësi të çuditshme në trup, sikur po fluturoja. Edhe pse Qabja — Allahu e nderoftë — është një ndërtesë me kufij të caktuar, unë ndjeja sikur ajo nuk kishte kufij; sa herë që shikoja në një drejtim, ndjeja largësinë dhe madhështinë e saj.
Pyeta një mikun tim — Allahu e mëshiroftë — i cili kishte hyrë disa herë në të, dhe ai më përshkroi të njëjtën ndjesi me fjalë të tjera duke thënë: “Në Qabe ndihesh sikur je në hapësirë dhe nuk ka gravitet”, duke nënkuptuar gravitetin e Tokës. Dhe kjo ishte pikërisht ajo që ndjeva edhe unë.
Kur hyra nga dera, u drejtova menjëherë përpara meje, tek vendi i faljes së të Dërguarit ﷺ, dhe u fala aq sa më ishte caktuar. Nga habia e madhe nuk munda të përqendrohesha në muret e Qabes dhe në pllakat e gdhendura që tregojnë rinovimet e sulltanëve dhe mbretërve. Edhe pse shikoja në çdo drejtim, sapo e kupton se je në shtëpinë që Allahu e ka veçuar për Veten e Tij dhe ia ka atribuar Vetvetes si nderim dhe madhërim, dhe e ka bërë kibël për muslimanët dhe vend pelegrinazhi për ta që nga krijimi i njerëzimit deri në fundin e tij, të kaplon një madhështi e tillë që të humb shqisat. Ndërkohë, shpirti është në një gjendje të çuditshme pranie, e cila nuk mund të përshkruhet me fjalë. Allahu e shpërbleftë me të mira atë që ma lehtësoi hyrjen në të, dhe ju dhëntë të gjithëve mundësinë ta vizitoni dhe të hyni në të.
Pasi dola nga Qabja, tek dera e saj përshëndeta kujdestarin e Qabes në atë kohë, shejhun AbdulKader bin Taha esh-Sheibi — Allahu e mëshiroftë atë dhe paraardhësit e tij. U luta për të dhe ai u lut për mua. I thashë: “I kërkoj Allahut që, ashtu si ju ka nderuar me kujdestarinë e kësaj shtëpie në këtë botë, t’ju nderojë edhe në botën tjetër.” Ai e pranoi duanë dhe u prek prej saj — Allahu e mëshiroftë gjerësisht.
Kujdestarët e Qabes janë nga fisi Kurejsh, nga Beni Shejbe, nga Beni Abdul-Dar bin Kusej bin Kilab, të cilët takohen me Profetin ﷺ tek gjyshi i tij Kusej.
Deri para vitit 1400 H, Qabja hapej shpesh; madje kishte ditë kur hapej vazhdimisht, por njerëzit ishin të paktë dhe numri i muslimanëve që vinin për umre nuk ishte kaq i madh sa sot.
Shejhu ynë, Abdulvekil bin Abdulhakk el-Hashimi — Allahu e mëshiroftë — më tregoi se kishte hyrë shpesh në Qabe dhe se një herë kishte përfunduar një hatme të plotë të Kuranit brenda saj, duke qëndruar nga pas sabahut deri në ezanin e drekës.
Nga urtësia e Allahut është që një pjesë e Qabes ka mbetur jashtë ndërtimit të saj, në mënyrë që çdo vizitor të mund të falet në të duke u falur në Hixhr. Pjesa që konsiderohet nga Qabja është rreth gjashtë ose shtatë krahë (masë), e cila përcaktohet mes dy shtyllave të ndriçimit në të djathtë dhe të majtë të Hixhrit; kjo pjesë është brenda kufijve të Qabes, ndërsa pjesa e harkuar që tejkalon këtë nuk është pjesë e saj.
I Dërguari i Allahut ﷺ do të kishte dashur të mos falej brenda Qabes, nga frika se mos kjo do t’i vështirësonte umetit të tij pas tij, të cilët do të dëshironin ta ndiqnin shembullin e tij, por nuk do të mundnin për shkak të vështirësisë. Aisheja رضي الله عنها transmeton se Profeti ﷺ doli prej saj i gëzuar dhe i qetë, por u kthye i mërzitur. Kur ajo e pyeti, ai tha: “Unë hyra në Qabe dhe do të doja të mos e kisha bërë këtë, sepse kam frikë se mos e kam lodhur umetin tim pas meje.” Paqja dhe bekimi i Allahut qofshin mbi të.
Allahu u solli shumë mirësi muslimanëve përmes kërkesës së Aishes رضي الله عنها për të hyrë në Qabe. Ajo kërkoi të hynte natën, por i Dërguari ﷺ i tha: “Dërgo dikë tek Shejbe që ta hapë derën.” Ai tha: “Nuk kemi mundur ta hapim natën as në kohën e injorancës dhe as në Islam.” Atëherë Profeti ﷺ e mori për dore dhe e futi në Hixhr, duke i thënë: “Falu në Hixhr nëse dëshiron të hysh në shtëpi, sepse ai është pjesë e saj, por populli yt e ka lënë jashtë kur e rindërtuan Qaben.”
Që atëherë, Aisheja رضي الله عنها thoshte: “Për mua është njësoj nëse falem në Hixhr apo në Qabe.” Allahu qoftë i kënaqur me të.
Në foton e parë shihet Qabja, dera e saj dhe dy nga tre shtyllat e brendshme, si dhe pjesa e veshur me mermer dhe sipër saj mbulesa e brendshme e gjelbër. Mes shtyllave ka llamba nga dhuratat e vjetra të Qabes dhe një kuti lëvizëse për mjetet e larjes.
Në foton e dytë, ashtu si edhe në të parën, pllaka e bardhë tregon vendin ku është falur i Dërguari i Allahut ﷺ.
O Allah, dërgo salavate, paqe dhe bekime mbi zotërinë tonë, Profetin tonë, të dashurin tonë dhe dritën e syve tanë, Muhamedin ﷺ, dhe shtoje nderin, madhështinë dhe respektin e Shtëpisë Tënde.
Shejh Sa'ad El-Gamidi
(Nga arabishtja)
Hixhaz Tours
