28/01/2026
"ဘုရားမတင်၊နတ်မဝင်၊လူတွင်ဆယ်ပွင့်ပန်း”
မြန်မာ့ယဉ်ကျေးမှုအနုပညာများရဲ့ ဂုဏ်ရောင်ထွန်းပြောင်မှုကိုထင်ဟပ်စေတဲ့ ရိုးရာလက်မှုပညာများဖြစ်တဲ့ ပန်းဆယ်မျိုးဟာ ရာစုနှစ်ပေါင်းများစွာထိ သက်တမ်းကြာရှည် တည်တံ့နေရုံသာမက ယနေ့ခေတ်အချိန်ထိပါ အသက်ဝင်လျက်ရှိနေပါတယ်။ ပန်းဆယ်မျိုး ဆိုတာကတော့ ပန်းပဲ၊ ပန်းထိမ်၊ ပန်းတဉ်း၊ ပန်းတော့၊ ပန်းရန်၊ ပန်းပဲ၊ ပန်းတမော့၊ ပန်းပွတ်၊ ပန်းချီ၊ ပန်းယွန်း စတဲ့ရိုးရာလက်မှုအနုပညာများဖြစ်ပါတယ်။ "ပဲ၊ထိမ်၊တဉ်း၊တော့၊ရန်၊ပဲ၊မော့၊ မှတ်လော့ ပွတ်၊ချီ၊ယွန်း”ဟူ၍ အတိုကောက်မှတ်သားနိုင်တဲ့ ပန်းဆယ်မျိုးဟာ မြန်မာလူမျိုးတို့ရဲ့ဖန်တီးမှုအနုပညာ၊ စိတ်ကူးဉာဏ်နဲ့ လက်မှုပညာကျွမ်းကျင်မှုတို့ကို ပြသပေးနိုင်တဲ့ ယဉ်ကျေးမှုအမွေအနှစ်တစ်ခုပဲဖြစ်ပါတယ်။ဒီနေ့မှာတော့ လက်ရှိအချိန်အထိ အသုံးပြုနေဆဲဖြစ်တဲ့ မြန်မာ့ရိုးရာလက်မှုအနုပညာများဖြစ်တဲ့ ပန်းဆယ်မျိုးထဲမှ (၂)မျိုးအကြောင်းကို ပြောပြသွားမှာပဲဖြစ်ပါတယ်။
“ပန်းထိမ်”
ပန်းထိမ်ဆိုတာကတော့ ရွှေ၊ငွေ၊ကြေး စတဲ့သတ္ထုများကို လှပတဲ့ အဆင်တန်ဆာများ၊ အသုံးအဆောင်ပစ္စည်းများအဖြစ် ပြောင်းလဲဖန်တီးတဲ့ မြန်မာ့ရိုးရာ လက်မှုပညာတစ်ရပ်ဖြစ်ပါတယ်။ သမိုင်းသုတေသနအထောက်အထားများဖြစ်တဲ့ ဗိဿနိုး၊ သရေခေတ္တရာ စတဲ့ ပျူမြို့ပြနိုင်ငံများမှ တူးဖော်ရရှိခဲ့သော ကြေးပစ္စည်း၊ ရွှေ၊ငွေဒင်္ဂါးများမှ တစ်ဆင့် မြန်မာ့ပန်းထိမ်ပညာဟာ ပျူခေတ်ကတည်းကစတင်ခဲ့တယ်လို့ ယူဆနိုင်ပါတယ်။
“ပန်းချီ”
ပန်းချီအနုပညာကတော့ စိတ်ကူးစိတ်သန်း၊ သဘာဝ၊ အတွေးအမြင်များကို အရောင်၊ လိုင်း၊ ပုံသဏ္ဍာန်၊ ဖွဲ့စည်းပုံတို့ကို အသုံးပြုဖန်တီးတဲ့အနုပညာတစ်ခုပဲဖြစ်ပါတယ်။ မြန်မာ့ပန်းချီပညာဟာ ပုရပိုက်ပေါ်မှာ ဇာတ်ကြီးဆယ်ဘွဲ့ကို ရေးဆွဲတဲ့ ခေတ်ဟောင်းပုံစံကနေ ခေတ်သစ်ပန်းချီပညာအထိ အမျိုးမျိုးပြောင်းလဲတိုးတက်လာတာကို မြင်တွေ့နိုင်ပါတယ်။ ပုဂံမှာရှိတဲ့ အာနန္ဒာ၊ ရွှေစည်းခုံ၊ ဂူပြောက်ကြီးဘုရားတို့ရဲ့ နံရံဆေးရေးပန်းချီလက်ရာတွေဟာဆိုရင် ရှေးခေတ်မြန်မာတို့ရဲ့ အနုပညာအဆင့်အတန်းကိုထင်ဟပ်စေတဲ့ ပြယုဂ်တွေပဲဖြစ်ပါတယ်။
မြန်မာ့ရိုးရာလက်မှုအနုပညာတို့ရဲ့သင်္ကေတဖြစ်တဲ့ ပန်းဆယ်မျိုးဟာဆိုရင် မျိုးဆက်သစ်တို့ထံ လက်ဆင့်ကမ်းလွှဲပြောင်းပေးရမဲ့ တန်ဖိုးကြီးအမွေအနှစ်ဖြစ်ရုံသာမက စီးပွားရေး၊ယဉ်ကျေးမှုနဲ့ ခရီးသွားလုပ်ငန်းတို့အတွက်လည်း အရေးကြီးတဲ့ အခန်းကဏ္ဍမှာပါဝင်နေတာကြောင့် ထိန်းသိမ်းစောင့်ရှောက်ရမဲ့ ယဉ်ကျေးမှုအမွေအနှစ်တွေပဲဖြစ်ပါတယ်ရှင်။
#စွဲမက်ဖွယ်ရာပြည်မြန်မာ #ပန်းဆယ်မျိုး #ရိုးရာလက်မှုပညာ
