16/07/2026
Covid-19 ကြောင့် (၆) နှစ်ကျော်ရပ်နားခဲ့သည့် ဝမ်ပုံ–မိန်းမော နယ်စပ်ဖြတ်ကျော်သွားလာမှု ပြန်လည်စတင်
Shan East News
တာချီလိတ်၊ ၂၀၂၆ ဇူလိုင် ၁၆
ရှမ်းပြည်နယ်(အရှေ့ပိုင်း) တာချီလိတ်မြို့နယ်၊ မိုင်းဖုန်း(က)အုပ်စုရှိ ဝမ်ပုံဆိပ်ကမ်းမှ လာအိုနိုင်ငံ ဘိုကီယိုပြည်နယ်၊ ဟွေဆိုင်းခရိုင် မိန်းမောဆိပ်ကမ်းသို့ ယာယီနယ်စပ်ဖြတ်ကျော်ခွင့်လက်မှတ် (TBP) ဖြင့် သွားလာမှုကို Covid-19 ကာလအတွင်း ရပ်နားထားရာမှ ဇူလိုင် ၁၆ ရက်တွင် ပြန်လည်စတင်ခဲ့ကြောင်း သိရသည်။
ဝမ်ပုံဆိပ်ကမ်း လူဝင်မှုကြီးကြပ်ရေးဌာနက ယင်းနေ့တွင် အမျိုးသား(၁)ဦးနှင့် အမျိုးသမီး(၄)ဦး စုစုပေါင်း (၅)ဦးအား ယာယီနယ်စပ်ဖြတ်ကျော်ခွင့်လက်မှတ် (TBP) ထုတ်ပေးခဲ့ပြီး လာအိုနိုင်ငံဘက်သို့ စက်လှေဖြင့် ထွက်ခွာသွားခဲ့ကြောင်း၊ လာအိုနိုင်ငံဘက်မှ မြန်မာနိုင်ငံသို့ ဝင်ရောက်လာသူ မရှိသေးကြောင်း သိရသည်။
ဝမ်ပုံ–မိန်းမော နယ်စပ်ဖြတ်ကျော်သွားလာမှုကို Covid-19 ကူးစက်ရောဂါ ကာကွယ်ထိန်းချုပ်ရေးအတွက် ၂၀၂၀ ပြည့်နှစ် မတ်လ ၂၉ ရက်မှစတင်ကာ ယာယီရပ်နားထားခဲ့ခြင်းဖြစ်ပြီး ယခုအခါ (၆) နှစ်ကျော်အကြာတွင် ပြန်လည်ဖွင့်လှစ်နိုင်ခဲ့ခြင်းဖြစ်သည်။
သမိုင်းမှတ်တမ်းများအရ မြန်မာ–လာအို နယ်စပ်ဒေသ စီမံခန့်ခွဲမှုနှင့် ပူးပေါင်းဆောင်ရွက်ရေး သဘောတူစာချုပ်အရ ၁၉၉၇ ခုနှစ်တွင် တာချီလိတ်မြို့နယ်ရှိ ဝမ်ပုံဆိပ်ကမ်းနှင့် လာအိုနိုင်ငံဘက်ရှိ ဘန်ခေါ်အန်းဆိပ်ကမ်း၊ ဘန်မိန်းမောဆိပ်ကမ်းတို့ကို လူဝင်/လူထွက်စစ်ဆေးရေးနေရာများအဖြစ် သတ်မှတ်ခဲ့သည်။
၂၀၀၇ ခုနှစ်တွင် လာအိုနိုင်ငံ ရွှေတြိဂံအထူးစီးပွားရေးဇုန် စတင်ဖွံ့ဖြိုးလာပြီးနောက် မြန်မာရွှေ့ပြောင်းအလုပ်သမား အများအပြား လာအိုနိုင်ငံသို့ သွားရောက်လုပ်ကိုင်ခဲ့ကြောင်းနှင့် Covid-19 မတိုင်မီကာလတွင် နေ့စဉ် လူဝင်/လူထွက် ပျမ်းမျှ (၃၀) ဦးခန့် ရှိခဲ့ကြောင်း သိရသည်။
ယာယီနယ်စပ်ဖြတ်ကျော်ခွင့်လက်မှတ် (TBP) ဖြင့် သွားရောက်လိုသူများသည် နိုင်ငံသားစိစစ်ရေးကတ် (သို့မဟုတ်) စမတ်ကတ် ကိုင်ဆောင်ထားရမည်ဖြစ်ပြီး လက်မှတ်ကြေး ကျပ်(၁,၀၀၀) ပေးဆောင်ရမည်ဖြစ်သည်။ ထို့နောက် စက်လှေဖြင့် လာအိုနိုင်ငံ မိန်းမောဆိပ်ကမ်းသို့ ဖြတ်ကူးကာ လာအို လူဝင်မှုကြီးကြပ်ရေးရုံးတွင် သတင်းပို့ဝင်ရောက်ရမည်ဖြစ်ကြောင်း သိရသည်။
တာဝန်ရှိသူများ၏ ပြောကြားချက်အရ ယခုမှစတင်၍ မြန်မာ–လာအို နှစ်နိုင်ငံအကြား ယာယီနယ်စပ်ဖြတ်ကျော်ခွင့်လက်မှတ် (TBP) ဖြင့် လူဝင်/လူထွက်သွားလာမှုများကို နေ့စဉ်ပုံမှန် ဆောင်ရွက်သွားမည်ဖြစ်ကြောင်း သိရသည်။
SENA-411
#ရှမ်းပြည်နယ် #တာချီလိတ်
