19/07/2020
အာဇာနည်ခေါင်းဆောင်တွေ အတွက် ဂျက်လီ ဖြစ်ချင်ခဲ့ဖူးတယ်။
ငယ်ငယ်တုန်းက ကျောင်းမှာ အာဇာနည်တွေအကြောင်း သင်ရတော့ သင်ပေးတဲ့ ဆရာက ကျက်ပဲကျက်ခိုင်းတာမဟုတ်ဘူး။ အဖြစ်အပျက်တွေကို အကုန်စုပြီး ဇာတ်လမ်းသဘောမျိုး သုံးချိန် လေးချိန်လောက်ကို စုစုစည်းစည်း ပြောပြတယ်။ ကြားဖူးတာတွေဖြစ်နေပေမယ့် ရင်ထဲမှာ ခံစားမှုတွေပိုတိုး၊ အားမလို အားမရတွေဖြစ်ပြီး တော်တော်လည်း စိတ်မကောင်းဖြစ်မိတယ်။ ကလေးတွေ ဆိုတော့ ဆရာက နားလည်လွယ်တဲ့ စကားလုံးတွေနဲ့လည်း ရှင်းပြခဲ့တယ်။ မြွေဘယ်လောက်ရှည်ရှည် ခေါင်းကိုရိုက်လိုက်ရင် သေတာပဲဆိုတာမျိုး ၊ ရထားတွဲအရှည်ကြီးကို ရထား ခေါင်းကသေးသေးက ဆွဲရတယ်ဆိုတာမျိုး၊ ဆရာ မရှိရင် မင်းတို့တစ်ယောက်တစ်မျိုး ဆော့ကြတယ်မလား။ အဲဒီလိုပဲ မတည်ငြိမ်သေးတဲ့ နိုင်ငံကို ထိန်းနိုင်တဲ့ ခေါင်းဆောင်ကောင်းတွေ ဆုံးရှူံးတော့ အကျိုးဆက်တွေ အများကြီးဖြစ်တယ်ပေါ့။ နိုင်ငံအတွက် အစားထိုးမရတဲ့ ဆုံးရှူံးမှုလို့ ရှင်းပြပေးခဲ့တယ်။
ဆုံးသွားပြီးတာတောင် အေးအေးမနေရဘူး။ တောင် နဲ့ မြောက် ကိုရီးယားအရှုပ်အထွေးကြောင့် အုတ်ဂူတွေက ကြားထဲက မဆီမဆိုင် ဗုံးခွဲတာ ခံရပြန်တယ်ဆိုတော့ ပိုသနားပြီး စိတ်ထဲစွဲနေခဲ့တယ်။ ဆရာက ရှင်းပြအပြီးမှာ ဗိုလ်ချုပ်တို့အတွက် ဘာလုပ်ပေးချင်ကြလဲမေးပြီး ထထ ဖြေခိုင်းတယ်။ နိုင်ငံအတွက် သူတို့လို ကြိုးစားဖို့ အတုယူဖို့ ပြောဖို့ထင်ပါရဲ့။ ဒါပေမဲ့ ဗိုလ်ချုပ်တို့အတွက် ဂျက်လီလို ကိုယ်ရံတော်ဖြစ်ချင်တယ်လို့ ကိုယ် ထဖြေတယ်။ ကျန်တဲ့သူတွေက သဘောတွေကျပြီး ဝိုင်းရယ်ကြတာပေါ့။
အဲဒီအချိန်မှာ ကိုယ့် idol က ဂျက်လီပဲ။ ဂျက်လီရဲ့ ကိုယ်ရံတော် ဇာတ်လမ်း ကို အသည်းစွဲပဲကိုး။ အဲဒီလောက်စွမ်းရင် ကာကွယ်နိုင်မယ်ပဲ တွေးမိတယ်။ ဆရာက ဘာမှမပြောဘူး တခြားသူတွေကို ထထ ပြောခိုင်းတယ်။ ကိုယ်က ဂျက်လီလို့ စပြောလိုက်တော့ နောက်ကကျောင်းသားတွေလည်း အာနိုးလို စက်ရုပ်ဖြစ်ချင်တဲ့သူ။ ပါဝါရိန်းဂျား ဖြစ်ချင်တဲ့သူ၊ စင်ဒရဲလား ပုံပြင်ထဲက နှင်တံလေးနဲ့ နတ်သမီးဖြစ်ချင်တဲ့သူ ၊ ဝူခုန်းဖြစ်ချင်တဲ့သူ ... အိုး... အမျိုးကို စုံလို့။ ကလေးအတွေးတွေ နဲ့ စိတ်ကူးယဉ်တာတွေ ထွက်ကျလာတယ်။ အားလုံး အားလုံးရဲ့ မတူညီတဲ့ စိတ်ကူးယဉ်မှုနဲ့ အစွမ်းတွေရဲ့ တူညီတဲ့ ရည်ရွယ်ချက်က ဗိုလ်ချုပ်တို့ကို အကာအကွယ်ပေးနိုင်ဖို့ပဲ။ ကြီးလာတော့လည်း time travel လို အချိန်နောက်ပြန်သွားတဲ့ဇာတ်လမ်းတွေ ကြည့်ရင် အဲဒီလိုအတွေးက ဝင်မိသေးတယ်။
ကိုယ်ယုံပါတယ်... ကိုယ့်လိုပဲ စိတ်ကူးယဉ်မှန်း သိသိကြီးနဲ့ အဲဒီအတွေးခဏတာမှာ ပျော်ရွှင်အားရပြီး စိတ်ကူးယဉ်တဲ့သူတွေ အများကြီးရှိနေမယ်လို့။
(ဗိုလ်ချုပ်နဲ့ပတ်သက်လို့ တစ်ခုခု စိတ်ကူးယဉ်ဖူးတာများရှိရင် comment လေးဝင်ရေးပေးလို့ရပါတယ်။)
