11/08/2020
သရေခေတ္တရာမြို့ဟောင်း (ပြည်) ပျူဘုရားစုံဖူး နဲ့ တညအိပ် (၂)ရက် အပန်းဖြေခရီးလေး လာပြီနော်။
ပျူမြို့တော်တွေထဲမှာ အဆောက်အဦတွေ အထင်အရှား အများအပြားကျန်ခဒ့တာ သရေခေတ္တရာမြို့ဟောင်းပဲ။ ပြည်မြို့အထွက် မှာရှိတယ်။ မြို့တံခါးပေါက်တွေ အထင်အရှားပြန်လည်တူးဖော် တွေ့ရှိပြီး အဝိုင်းပုံပတ်ထားတဲ့ မြို့ရိုးတွေလည်း အထင်ရှားကျန်ခဲ့တယ်။ ကမ္ဘာ့အမွေအနှစ်အဖြစ်အစောဆုံးရတဲ့ ရှေးဟောင်းမြို့တော်တခုပဲ။
လွမ်းစရာအမှတ်တရတွေ ဒဏ္ဍာရီတွေ သမိုင်းအထောက်အထားအစုံနဲ့ကျန်ခဲ့တဲ့ ခေတ္တရာမြို့ဟောင်း လေ့လာရေးနဲ့ ဓါတ်ဖမ်းဖို့အကောင်းဆုံးနေရာလေးတွေကို ကိုဗစ်ငြိမ်နေတဲ့ကာလမှာ အန္တရာယ်မရှိ လွတ်လွတ်လပ်လပ် လည်နိုင်အောင် ပို့ပေးမယ်။
မင်မင်တို့တော့ ပြည်တပတ် နှစ်ညအိပ်နဲ့ ရွှေတောင်တဝိုက် ပြည်တောင်တန်းတဝိုက် (၅)ရက်လောက်ဒိုးလိုက်တာ ကိုဗစ်ကာလ ထိန်းချုပ်ထားသမျှ တင်းကြပ်မှုတွေလျော့သွားတာပဲ။
ပျူမြို့ဟောင်း တဝိုက်မှာ ဓါတ်ဖမ်းမလား၊ ဒွတ္တဘောင်မင်းနဲ့ ပျူမင်းဆက် (၂၇ )ဆက်တို့ရဲ့ ခြေရာလက်ရာတွေဆီမှာ ဓါတ်ဖမ်းမလား။ မိသားစုလိုက်ဆိုလည်း ပျော်စရာပါ။ ကလေးတွေဆို ပျော်လွန်းလို့အိမ်မပြန်ချင်ဖြစ်နေပါရော။ ဧရာဝတီမြစ်ကမ်းစပ်က စားသောက်ဆိုင်မှာ River View ကိုခံစားမလား။ နဝဒေးတံတားကိုဖြတ်ဖြတ်ပြီး တောရိပ်တောင်ရိပ်တွေနဲ့ အနောက်ဖက်ကမ်း မုနိလေးဆူထဲက ရွှေဘုံသာမုနိဘုရားကြီးဖူးမလား။ ရခိုင်မုနိဘုရားကြီးပင့်လာတဲ့ ဘိုးတော်ဘုရားသားတော်အိမ်ရှေ့မင်းရဲ့ ခရီးနဲ့ ပန်းတောင်းမြို့ပေါ်က ရပ်ကွက်အမည်တွေဆက်စပ်ချက် စိတ်ဝင်စားစရာပေါ့။ ပျူဘုရားတဆူခြင်းစီမှာ ထူးခြားတဲ့သမိုင်းတွေ တည်ထားပုံတွေရှိတယ်။
ပြည်မြို့ရဲ့ ဟိုတယ်တွေ Resort တွေလည်း ထင်မထားရလောက်အောင် ဝန်ဆောင်မှုကောင်းတယ်။ သန့်ပြန့်ပြီး ဒေသထွက်အစားအစာတွေလည်း မြည်းစမ်းဖို့အခွင့်အရေးရမယ်။
တကောင်းထက် နှစ်အနည်းငယ်သာနောက်ကျပြီး ရှေးလက်ရာတွေ အထင်အရှားကျန်တဲ့ သရေခေတ္တရာဟာ ပုဂံထက်နှစ်တော်တော်စောပြီး ဂုဏ်ယူစရာ မြန်မာရဲ့အစ ရှေးလက်ရာတွေရှိတယ်။ ဗေဒါရီဇာတ်လမ်း၊ မဟာသမ္ဘဝ၊စူဠာသမ္ဘဝ ညီနောင်တို့ရဲ့ဇာတ်လမ်းဟာ ပုံပြင်မဟုတ်ဘူး တကယ်ပါ။ တောင်တွင်းကြီးဒေသက ဗိဿနိုးဘုရင်မကိုကြင်ယာတော်အဖြစ်သိမ်းပိုက်နိုင်ခဲ့ပြီး ရာသက်ပန် သရေခေတ္တရာနေပြည်တော်မှာပဲနေထိုင်သွားရတဲ့ ဗိဿနိုးဘုရင်မနဲ့ဆွေတော်မျိုးတော်တွေသချိုင်းဟာလည်း သရေခေတ္တရာမြို့ဟောင်းမှာ အထင်အရှားရှိတယ်။
မဟာသမ္ဘဝမင်းနတ်ရွာစံတော့ ကိုယ်ဝန်သုံးလနဲ့ကျန်ခဲ့ပြီး မိဖုရားအရာနဲ့ဆက်လက်ရှိစေတဲ့ နောက်မင်းပြုခဲ့တဲ့ စူဠာသမ္ဘဝ ညီတော်မင်း အဖေနှစ်ယောက်မေတ္တာခံယူခဲ့တဲ့ ဒွတ္တဘောင်မင်းရဲ့ ဘုန်းကံဟာ ပျူမင်းဆက်တွေထဲမှာ အကျော်ကြားဆုံးပဲ။ ပျူမင်းဆက်ရဲ့ နောက်ဆုံးမင်း သုပညာနဂရဆိန္ဒ ဘုရင်ဟာ ဘုရင့်အမျိုးအဆွေမဟုတ်ပဲ ငတပါးမင်းမျိုးဖြစ်ပြီး ခေါင်းစားမင်းဖြစ်ဆိုတာ အဲဒီကတည်းကပေါ်ခဲ့တဲ့ရှေးစကားဖြစ်တယ်။ သူ့အလှူတော် ကြက်ခေါင်းစားစေတီရှိတယ်။ ပျူမင်းဆက် ၂၇ဆက်တည်ခဲ့တဲ့ စေတီ ပုထိုးတွေဟာ အခုခေတ်ထိမပျက်မစီးရှိနေနိုင်တာ အံ့ဩစရာ ရှေးပန်ရံ ဗိသုကာပညာပါ။ ဂုဏ်ယူစရာနော်။
နိုင်ငံတကာ သမိုင်းပညာရှင်တွေထဲ ထင်ရှားခဲ့တဲ့ မြန်မာ့သမိုင်းပညာရှင် ဒေါက်တာသန်းထွန်းကပြောတယ် သမိုင်းသင်တာ မအအောင်လို့တဲ့။ မြန်မာ့ဘိုးဘေးတွေရဲ့ ဂုဏ်ယူစရာ မြို့ပြနိုင်ငံတွေအကြောင်း လေ့လာရေးခရီးလည်း ဖြစ်တယ်နော်။
