13/08/2026
လူမှုဆက်ဆံရေး ယုံကြည်မှုဆိုတာ
▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎▪︎
လူမှုဆက်ဆံရေးတစ်ခုမှာ ယုံကြည်မှုဆိုတာ ခိုင်မာသော အုတ်မြစ်နဲ့တူပါတယ်။ အိမ်တစ်အိမ် တည်ဆောက်တဲ့အခါ အုတ်မြစ်ခိုင်မှ အပေါ်က အဆောက်အအုံ မြင့်မြင့်မားမား ရပ်တည်နိုင်သလို... ဆက်ဆံရေးမှာလည်း ယုံကြည်မှုမရှိရင် အချစ်ရော လုပ်ငန်းမှာပါ အရာရာ အဆင်ပြေနေပုံရှိရင်တောင် အတွင်းထဲက ကွဲနေတတ်ပါတယ်...။
ယုံကြည်မှုဆိုတာ မျက်စိနဲ့မြင်လို့မရပေမယ့် လက်တွေ့ဘဝမှာ ခံစားရတဲ့အရာဖြစ်ပြီး အတူတူလမ်းလျှောက်တဲ့အခါ ခြေလှမ်းတစ်ခုစီမှာ အရေးပါလာတတ်ပါတယ်...။
လုပ်ငန်းခွင်မှာဆိုရင် ယုံကြည်မှုမရှိဘူးဆိုရင် အဖွဲ့အစည်းတစ်ခုလုံး လှုပ်ရှားရခက်တတ်ပါတယ်။ တစ်ယောက်နဲ့တစ်ယောက် စကားပြောတိုင်း သံသယတွေ၊ အာဃာတတွေ၊ မနာလိုမှုတွေ ကြားထဲမှာနေရတဲ့အခါ... ဘယ်လိုပဲ ကျွမ်းကျင်တဲ့သူတွေဖြစ်နေပါစေ၊ အလုပ်ကောင်းကောင်းမတိုးတော့ပါဘူး။ လုပ်ဖော်ကိုင်ဖက်တွေအကြား အပြန်အလှန်ယုံကြည်မှုရှိမှသာ စိတ်ချလက်ချနဲ့ တာဝန်တွေကို ခွဲဝေလုပ်ကိုင်နိုင်မှာဖြစ်ပါတယ်...။
ဥပမာ- မန်နေဂျာတစ်ယောက်က အလုပ်သမားတွေကို မယုံဘူးဆိုရင် အသေးစိတ်အလုပ်တိုင်းကို ထိန်းချုပ်ချင်စိတ်ဖြစ်လာပြီး အလုပ်သမားတွေကလည်း စိတ်ဓာတ်ကျကာ ဖန်တီးနိုင်စွမ်းတွေ လျော့ကျသွားတတ်ပါတယ်...။
အချစ်ရေးမှာဆိုရင်လည်း ယုံကြည်မှုဟာ အသက်ပါပဲ။ ချစ်သူနှစ်ယောက်ကြား သံသယတွေ၊ လျှို့ဝှက်ချက်တွေ များလာတဲ့အခါ ဘယ်လောက်ပဲ ချစ်ချစ် ဆက်ဆံရေးဟာ... တဖြည်းဖြည်းယိုယွင်းလာတတ်ပါတယ်...။
ယုံကြည်မှုဆိုတာ တစ်ယောက်ကိုတစ်ယောက် လုံးဝပွင့်လင်းစွာ ရှိနိုင်ဖို့၊ အမှားလုပ်မိရင် ဝန်ခံပြောရဲဖို့၊ စိတ်ထဲမှာရှိတာကို ဖုံးကွယ်စရာမလိုဖို့ အရေးကြီးပါတယ်။ ဒီလိုမဟုတ်ဘဲ ဖုန်းကိုတစ်ယောက်တစ်ယောက်က လှန်ကြည့်နေရတယ်၊ ဘယ်သွားသွား အစစ်ခံနေရတယ်ဆိုရင် ဆက်ဆံရေးဟာ ထောင်ထဲက ခြေချင်းခြစ်သံတွေလို ကြပ်မြည်နေတတ်ပါတယ်...။
တကယ်တော့ ယုံကြည်မှုဆိုတာ တည်ဆောက်ရတာ နှစ်ပေါင်းများစွာကြာပေမယ့် ပြိုလဲဖို့ကတော့ စက္ကန့်ပိုင်းပါပဲ။ ဒါကြောင့်... လုပ်ငန်းခွင်မှာပဲဖြစ်ဖြစ်၊ အချစ်ရေးမှာပဲဖြစ်ဖြစ်၊ အဖွဲအစည်းမှာပဲဖြစ်ဖြစ် ယုံကြည်မှုကို အလွယ်တကူမထိပါးမိဖို့ သတိထားရပါမယ်...။
တစ်ခါတလေ... ကိုယ်က မှားသွားမိရင်တောင် ပွင့်ပွင့်လင်းလင်းဝန်ခံပြီး ကြိုးစားပြုပြင်မှသာ ယုံကြည်မှုကို ပြန်လည်တည်ဆောက်နိုင်မှာဖြစ်ပါတယ်။ ဘဝမှာ အောင်မြင်တဲ့ဆက်ဆံရေးတိုင်းရဲ့ နောက်ကွယ်မှာ ယုံကြည်မှုဆိုတဲ့ အခြေခံအုတ်မြစ် ခိုင်မာစွာရှိနေဖို့ အမြဲလိုအပ်ပါတယ်...၊၊
#𝐂𝐫𝐞𝐝𝐢𝐭
