Happy Vacation Time Travels & Tours

Happy Vacation Time Travels & Tours Happy Leisure We Together !!

ရှမ်းရွှေဥ Resort 📣****🌳🌳****🚙 🔸 ရန်ကုန်ကနေ 1 နာရီနီးပါးလောက်သွားရင် ရောက်မှာဖြစ်ပြီးကားပိတ်ရင် 1 ခွဲ ဝန်းကျင်လောက်..ထန်...
16/01/2021

ရှမ်းရွှေဥ Resort 📣
****🌳🌳****

🚙 🔸 ရန်ကုန်ကနေ 1 နာရီနီးပါးလောက်သွားရင် ရောက်မှာဖြစ်ပြီး
ကားပိတ်ရင် 1 ခွဲ ဝန်းကျင်လောက်..
ထန်းတစ်ပင်မြို့နယ်၊ ရန်ကုန်-ပုသိမ်လမ်းမကြီးပေါ်မှာ ရှိတာပါ..
ရန်ကုန်ကသွားရင် ညာဖက်ခြမ်းမှာရှိပါတယ် ရှင်..☺️

အိမ်မှာနေရင်းမွန်းကြပ်လာလို့ မိသားစုလိုက်ဖြစ်ဖြစ် ကိုယ်တစ်ယောက်ထဲပဲ ဖြစ်ဖြစ် အေးအေးဆေးဆေးလေး chill ချင်ရင်တော့ သွားသင့်တဲ့နေရာလေးပါ..
သဘာဝတရားရဲ့ အလှကို တွေ့မြင်ရမှာပါ..🌴🌳🌴💚🌿

🏡.. လုံးချင်း Bangalow လေးတွေနဲ့မို့ လူတွေရှုပ်ရှက်ခတ်နေမှာလည်း ပူစရာမလိုပါဘူးရှင်..
စားချင်တာတွေလည်း အသင့်မှာစားရုံပါပဲ..🤢

🎏 ပျင်းလာရင် ငါးမျှားမလား ? 🐠 🐟
လှေလှော်ချင်လည်း အေးဆေး..🛶⛵

သူငယ်ချင်းတွေစုပြီး သွားလည်း ok တယ်..🥶🤐
😛...ယူသွားသမျှ စားစရာတွေအားလုံးကိုတော့ charges ကောက်ပါတယ်ရှင်...😛

ပုံလေးတွေကြည့်ပြီး အရင်သွားလည်လိုက်ပါအုံးရှင့်..❣️
ပြီးမှ ကိုယ်တိုင်သာ သွားကြည့်ပေတော့..😛

ရောက်ဖူးပြီးတဲ့ ကိုကို မမတွေလည်း Review လေးနဲ့ အကြံဥာဏ်လေးတွေ မျှဝေးပေးခဲ့ပါအုံးနော်။

!! 🏖️

ထားဝယ်မြို့ရှိရှေးဟောင်းသမိုင်းဝင်ရှင်ကိုးရှင်ဘုရားများ -အပိုင်း(၃)⚜️⚜️⚜️⚜️⚜️⚜️⚜️🙏⚜️ ရှင်ဇလွန်စေတီတော်အထက်ပုဂံဟုခေါ်ဆိုသ...
12/01/2021

ထားဝယ်မြို့ရှိရှေးဟောင်းသမိုင်းဝင်ရှင်ကိုးရှင်ဘုရားများ -အပိုင်း(၃)

⚜️⚜️⚜️⚜️⚜️⚜️⚜️

🙏⚜️ ရှင်ဇလွန်စေတီတော်

အထက်ပုဂံဟုခေါ်ဆိုသည့် မန္တလေးတိုင်းဒေသကြီး အတွင်းရှိ ``ပုဂံမြို့ဟောင်းနှင့် ပုဂံဘုရားများ´´ ကို လူတိုင်းသိကြသော်လည်း
အောက်ပုဂံဟု ခေါ်ဆိုကြသော တနင်္သာရီတိုင်းဒေသကြီး၊ ထားဝယ်ခရိုင်၊ လောင်းလုံမြို့နယ်အတွင်းရှိ ``သာဂရမြို့ဟောင်းရွာ´´ ကိုမူ သိသူနည်းပါးကြသည်။...``သာဂရမြို့ဟောင်းရွာ´´ ဟု ဆိုလိုက်သည်နှင့် အဝေးကပင် ကြည်ညိုသဒ္ဒါပွားများစွာ လှမ်းမြင် ဖူးတွေ့နိုင်သည့် ``ရှင်ဇလွန်စေတီတော်မြတ်ကြီး´´မှာ ခေါင်းလောင်းသံ တညံညံဖြင့် သပ္ပါယ်လွန်းစွာ တည်ရှိနေသည်။...

🔸🔸စေတီတော် သမိုင်း
အောင်သာဂရရွာကို တည်သော လူတစ်စုသည်
ကောဇာသက္ကရာဇ်(၉၄) (A.D 732) ခုနှစ်ခန့်တွင် ဘုမ္မိဒေဝနာဂရကို တည်သည်။ ဘုရင်မှာ ရန်တပိုမင်းဖြစ်ပြီး မြို့တည်ပြီး (၇) ရက်ခန့် အကြာတွင် ဆင်ဖြူတော်တစ်စီးကို ဖမ်းဆီးရမိ၍ ဘုရင်အား ဆက်သရာ ဆင်ဖြူရှင် မဟာနရိန္ဒ ဟူသောဘွဲ့အမည်ကို ခံယူသည်။ မိဖုရားကြီးမှာ ဆင်ဖြူကုန်းရွာနေ ဆင်ဝန်မောင်မောင်နက် မိမင်းဖြူတို့၏ သမီး မိစုမ ဖြစ်သည်။ စုမဒ္ဒီဒေဝီ အမည်ဖြင့် မိဖုရားကြီး ဖြစ်လာသည်။

မင်းကြီးနှင့် မိဖုရားကြီးတို့သည် မှူးမတ်ဗိုလ်ပါ (၁၀၀၀) ကျော်ဖြင့် ``တောသာယာ စခန်း´´ သို့ တောကစားထွက်ရာ အခြားအခြားသော ဥဒေါင်းငှက်ကြီးများထက် ကြီးမားကာ ပေါ်လွင်ထင်ရှားသော ဥဒေါင်းငှက်ကြီးတစ်ကောင်အား တွေ့မြင်လေသည်။ မိဖုရားကြီးလည်း ဖမ်းယူမွေးမြူလိုကြောင်း မင်းကြီးအား လျှောက်တင်လေသည်။ နေပြည်တော်သို့ပြန်ရောက်သော် မင်းကြီးသည် ဥဒေါင်းဖမ်းယူပေးနိုင်သော မုဆိုးလုဒ္ဒကများအား ဆုလာဘ်များစွားနှင့် ရွာလေးရွာ အပိုင်စားပေးမည်ဟု ကြေငြာမောင်းခတ်လေသည်။ မုဆိုးမောင်နွားနှင့် တပည့်မောင်ကျားတို့သည် ရိက္ခာ(၆) လစာနှင့်အတူ ဥဒေါင်းဖမ်း ထွက်ကြလေသည်။ ဥဒေါင်းဖမ်းရာ လမ်းတစ်လျှောက် သမိုင်းတွင်သည့် ယခုတိုင်ခေါ်ဝေါ်နေကြသော ကျေးရွာအမည်များ ဖြစ်လာသည်။

မုဆိုးမောင်နွားနှင့် တပည့်မောင်ကျားတို့သည် ဥဒေါင်းကြီးအား ဖမ်းယူနိုင်ခြင်းမရှိသောကြောင့် ရှက်ရွှံ့ကာ
မုဆိုးမောင်နွားက ရသေ့ပြု တပည့်မောင်ကျားက ဖိုးသူတော် အသီးသီးလုပ်ကြသည်။ သို့နှင့် ``ဂေါဝိန္ဒရှင်ရသေ့နှင့် ဖိုးသူတော် တိက္ခ´´ ဟူ၍ ဖြစ်လာကြသည်။ ဒေဝပဗ္ဗတတောင်တွင် သီတင်းသုံး၍ စေတီတစ်ဆူတည်ထားခဲ့လေသည်။ ``ရှင်တောင့်ပုံစေတီ´´ ဟု ယနေ့တိုင်ခေါ်ဝေါ်သည်။ ဂေါဝိန္ဒရှင်ရသေ့နှင့် ဖိုးသူတော်တိက္ခ တို့သည် စေတီတည်ပြီးနောက် ဒေဝပဗ္ဗတတောင် (ရှင်တောင့်ပုံတောင်) မှ ``ဣသိဒြိတောင်´´ (မှီအုံးတောင်) သို့ ကြွရောက်သီတင်းသုံးတော်မူသည်။ ဂေါဝိန္ဒရှင်ရသေ့သည် နေ့စဥ်ဆွမ်းခံကြွပြီး အပြန်တွင် ``ဝဿဝက္ကာနတ်ရေကန်´´၌ ရေသန့်စင်လေ့ရှိလေသည်။ ဤတွင် ထိုရေအိုင်၌ရှိသော ငါးခုံးမတစ်ကောင်သည် ရှင်ရသေ့ရေချိုးသည့်အခါထွက်ရှိလာသော အညစ်အကြေးများကို စားသောက်ရင်း ကိုယ်ဝန်ရရှိခဲ့သည်။ ထိုငါးခုံးမမှ ရင်ကွဲ၍ အမွှာလူးသားကလေး နှစ်ဦးအား မွေးဖွားခဲ့သည်။ ရှင်ရသေ့လည်း ရေကန်နံဘေးတွင် တွေ့သော အမွှာကလေးနှစ်ဦးအား ကောက်ယူမွေးစားခဲ့သည်။ ယောကျ်ားလေးအား ``ရှင်ဇံ´´ မိန်းကလေးအား ``ရှင်ဇော´´ ဟု အမည်ပေးလေသည်။ ထိုကလေးနှစ်ဦးသည် မှီအုံးတောင်ပေါ်တွင်ပင် နေထိုင်ကြီးပြင်းခဲ့ကြလေသည်။

သက္ကရာဇ်(၁၄၅) ခုနှစ် တွင် အရှင်အရဟံ ရဟန္တာမြတ်သည် မှီအုံးတောင်သို့ရောက်ရှိလာပြီး မြတ်ဗုဒ္ဓ၏ ဓါတ်တော်(၁)ဆူကို မောင်နှမနှစ်ယောက်အား ချီးမြှင့်ခဲ့လေသည်။ မောင်နှမနှစ်ယောက်လည်း ဆံတော်အား သူရသင့်သည် ငါရသင့်သည်ဟု အငြင်းပွားနေကြလေသည်။ ဂေါဝိန္ဒရှင်ရသေ့ ဆွမ်းခံကြွရာမှ ပြန်လည်ရောက်ရှိလာသောအခါ မောင်နှမနှစ်ယောက် အငြင်းပွားနေကြသည်ကို တွေ့မြင်လေသဖြင့် အရှင်ရဟန္တာမြတ်ကြွမြန်းသွားရာ လမ်းကိုမြှော်မှန်း၍ အမီလိုက်သွားကာ နောက်ထပ် ဓါတ်တော်ပွားတစ်ဆူ ထပ်မံချီးမြှင့်ရန် လျှောက်တင်လေသည်။ မထေရ်မြတ်သည် ဂေါဝိန္ဒရသေ့ထံမှ ဓါတ်တော်ကို ခေတ္တခဏပြန်လည်ပင့်ယူပြီး အဓိဋ္ဌာန်ပြုရာ ဓါတ်တော်ပွားတစ်ဆူသည် အလိုအလျောက်ဖြစ်ပေါ်လာလေသည်။
ဂေါဝိန္ဒရှင်ရသေ့သည် ထိုဓါတ်တော်နှစ်ဆူကို မောင်နှမနှစ်ယောက်အားပေးရာ ရှင်ဇံက ဓါတ်တော်အစစ်ကို ရရှိပြီး ရှင်ဇောက ဓါတ်တော်ပွားကို ရရှိလေသည်။

ထိုအချိန်တွင် ဘုမ္မိဒေဝနဂရတွင်ကား ဆင်ဖြူရှင် မဟာနရိန္ဒမင်း နတ်ရွာစံပြီးနောက် သားတော် သမန္တသည် သာဂရမြို့ကို တည်၍ ထီးနန်းစိုးစံအုပ်ချုပ်နေသော အခါသမယဖြစ်သည်။ သမန္တဒေဝီ၏ မိဖုရားကြီးမှာ စန္ဒာဒေဝီဖြစ်လေသည်။ ထိုမင်းနှင့်မိဖုရားတို့တွင် ထီးမွေနန်းမွေဆက်ခံမည့်သူ မရှိ၍ ရှင်ဇံ၊ ရှင်ဇော် မောင်နှမနှစ်ယောက်ကို ထီးမွေနန်းလျာအတွက် မွေးစားလိုက်သည်။
သမန္တမင်းကြီးလက်ထက်တွင် သီဟိုဋ်ဘုရင်သည် ``ဓါတ်တော်၊ ဆံတော်၊ မြသပိတ်တော်၊ သလွန်တော်၊ သတ္တဌာနဘုရား ရုပ်ထုတော်၊ မြောက်ကျွန်းသို့ ဆွမ်းခံကြွတော်မူဟန် ရုပ်ထုတော်´´...တို့အား ဓမ္မလက်ဆောင်အဖြစ် အကောက်ဝန် ရာဓွန်ရှည်ကို သာဂရသို့ ပို့စေခဲ့သည်။ သမန္တမင်းသည် သာဂရမြို့ဆိပ်ကမ်းမှ နန်းတော်သို့ ဆင်ဖြူတော်ဖြင့် ပင့်ဆောင်လေသည်။ မင်းကြီးသည်
``မြသပိတ်´´ကို နန္ဒသူဌေးအား သာဂရမြို့ မြင်တင်ကုန်းအရပ်၌ စေတီတည်၍ ဌာပနာစေသည်။ ထိုစေတီကို ယနေ့တိုင် ``မြသပိတ်စေတီ´´ ဟု ခေါ်တွင်သည်။

သမန္တမင်းကြီး နတ်ရွာစံသော် သားတော် ရှင်ဇံသည် သမ္ဗန်မင်းဟူသော ဘွဲ့အမည်ဖြင့် ထီးနန်းဆက်ခံသည်။ မင်းကြီးအား မှူးမတ်များက သာကီဝင်ထုံး နှလုံးမူ၍ နှမတော် ``ရှင်ဇော´´ ကို မိဖုရားခေါင်ကြီးတင်မြှောက်ရန် လျှောက်ထားကြသည်။
ရှင်ဇော် (နန္ဒာဒေဝီ)က သဘောမတူချေ။ သို့နှင့် မောင်နှမနှစ်ယောက် မသင့်မတင့်ဖြစ်ပြီး ရှင်ဇောသည် နောက်လိုက်နောက်ပါများနှင့်အတူ နန်းတော်မှ တိတ်တဆိတ်ထွက်ခွာ၍ ရှောင်တိမ်းပုန်းအောင်း နေထိုင်သည်။ မင်းကြီးကလည်း ရှင်ဇော (နန္ဒာဒေဝီ) ထွက်ပြေးသည်ကို လိုက်လံရှာဖွေခြင်းမပြုဘဲ လျစ်လျူရှုထားလေသည်။........
ထိုအချိန်တွင် သီဟိုဋ်ဘုရင် ကောက္ကသန်၏ အမတ်နော်ရမန်ဦးဆောင်သော သံတမန်အဖွဲ့သည် လက်ဆောင်ပဏ္ဏာများနှင့် သမီးကညာတောင်းခံရန် ရောက်လာသည်။ သမ္ဗန်မင်းသည် နှမတော်နန္ဒာဒေဝီအား ရှာဖွေခိုင်းပြီး အခေါ်တော်လွှတ်လေသည်။ သမီးကညာတောင်းခံလာခြင်းကို နှမတော်ဖြင့် တိုင်ပင် ညှိနှိုင်းသည်။ ဤသို့ဖြင့် မောင်နှမနှစ်ယောက်ပြန်လည် သင့်မြတ်ကြလေသည်။
ရှင်ဇော်(နန္ဒာဒေဝီ)၏ ဆန္ဒနှင့်အညီ သမီးကညာတောင်းခံလာခြင်းကို လက်ခံလိုက်လေသည်။

ရှင်ဇော (နန္ဒာဒေဝီ)သည် မိမိသီဟိုဋ်သို့ လိုက်ပါမသွားမီ မိမိကိုးကွယ်ပူဇော်နေသော အရှင်ရဟန္တာမထေရ်မြတ် ပေးသနားခဲ့သော ဓါတ်တော်၊ သီဟိုဋ်ဘုရင်၏ လက်ဆောင်များအနက် အစ်ကိုတော်ပေးထားဖူးသော သလွန်တော်၊ သတ္တဌာနရုပ်ပွားတော်၊ စသည်တို့ကို ဌာပနာ၍ စေတီတစ်ဆူတည်ထားပေးရန် အဘဂေါဝိန္ဒရသေ့နှင့် အစ်ကိုတော်သမ္ဗန်မင်းအား လျှောက်ထားလေသည်။ သုံးလောကထွတ်ထား မြတ်စွာဘုရား အလောင်းတော်နုစဥ်အခါက ကရဝိတ်ငှက်မင်း အဖြစ်နှင့် နေထိုင်ကျက်စားခဲ့ဖူးသော တောင်ကုန်းသည် သာဂရမြို့ဟောင်းတွင် ရှိသည်။ ``အောင်မြေတောင်ကုန်း´´ ဟု ခေါ်ဆိုကြပြီးအလောင်းတော်ကရဝိတ်ငှက်မင်းသည် သေတပန်သက်တစ်ဆုံးနေထိုင်သွားခဲ့သည်။ ရှင်ဇော်သည် ထိုတောင်ကုန်းတွင် စေတီတည်ရန် ရွေးချယ်ခဲ့သည်။ ထိုစေတီတွင် မြတ်စွာဘုရား၏ ဆံတော်၊ ဓါတ်တော်၊ သလွန်တော်တို့ကို ဌာပနာခဲ့သည်ဟု ဆိုသည်။ ထို့နောက် ရှင်ဇော် (နန္ဒာဒေဝီ) သည် သီဟိုဋ်သို့ လိုက်ပါသွား၍ အဘဂေါဝိန္ဒရသေ့နှင့် အစ်ကိုတော်သမ္ဗန်မင်းတို့သည် စေတီတော်ကို ဆက်လက်တည်ထားခဲ့ကြသည်။

သာဂရဘုရင်များသည် စစ်ထွက်သည့်အခါ ထိုတောင်ကုန်းတွင် အောင်မြေနင်းပြီး စေတီတော်ကို ဦးတိုက်ကန်တော့ပြီးမှစစ်ထွက်လေ့ရှိသည်ဟု ဆိုသည်။ ထိုစေတီတော်တွင် မြတ်ဗုဒ္ဓ၏ ဓါတ်တော်၊ ဆံတော်၊ သလွန်တော်တို့ကို ဌာပနာ၍တည်ထားသည့်အတွက်
`` ရှင်သလွန်စေတီတော်´´ ဟု ခေါ်သည်။ ကာလရွေ့လျားသောအခါ ``ရှင်သလွန်´´ မှ ``ရှင်ဇလွန်´´ ဖြစ်လာသည်ဟု ဆိုသည်။

♦️ မြတ်စွာဘုရား၏ မြသလွန်တော်ကို တည်ထားဌာပနာဖူးသော ဘုရားဟောင်း၌ ရှင်ဇော(နန္ဒာဒေဝီ)က စေတီတော်ကို ထပ်မံတည်ထား၍ ``ရှင်သလွန်တော်မှရှင်ဇလွန်´´ ဟု ခေါ်တွင်လာသည် ဟုလည်းကောင်း...
♦️ ပဲခူးအမတ် ဗျသပိုက်က သာဂရမြို့ကို ထပ်မံပြုပြင်ပြီး ဇလွန်မြို့ ဟုခေါ်ဆိုသောကြောင့် ထိုစေတီတော်ကိုလည်း `ရှင်ဇလွန်စေတီတော်´ ဟု ခေါ်ဆိုသည်ဟုလည်းကောင်း...မှတ်သားကြသည်။
♦️ ♦️ ရှင်ဇလွန်၏ ခေါင်းလောင်းပုံ အထက်ပိုင်းပတ်လည်တွင် သီရိဝစ္ဆပုံ အင်္ဂတေပန်း ရှိ၏။ သီရိဝစ္ဆပုံ အင်္ဂတေပန်းသည် အလွန်ရှေးကျပြီး အိန္ဒိယဆန်သည်။ ပျူခေတ်နှင့် ခေတ်ပြိုင်ဟု ယူဆရလေသည်။
♦️ ရှင်ဇလွန်စေတီတော်သည် မိန်းမတည်သော စေတီတော်ဖြစ်၍ စေတီတော်ကို ထီးတင်သည့်အခါ၊ စေတီတော်ကို ပြုပြင်ပူဇော်သည့်အခါ အမျိုးသမီးပါမှ အောင်မြင် ပြီးမြောက်သည်ဟု ဒေသခံများက အယူရှိကြသည်။

မကြာခဏ ရောင်ခြည်တော် ကွန့်မြူးလျက်ရှိပြီး၊ တန်ခိုးသိဒ္ဓိနှင့် ပြည့်စုံခြင်းကြောင့် ထွက်ရပ်လမ်းလိုက်သူများ အဓိဋ္ဌာန်ဝင်သူများ အတွက်လည်း အဓိကကျသော စေတီတစ်ဆူ ဖြစ်လေသည်။ ဤစေတီတော်သည် ရှင်ကိုးရှင်အစဥ်တွင် အမှတ်စဥ် (၇) ၌ ရှိသော စေတီတော်တစ်ဆူဖြစ်လေသည်။

(ဤရှင်ဇလွန်စေတီတော်သမိုင်းတွင် ပါဝင်သော အရှင်အရဟံသည် ပုဂံအနော်ရထာလက်ထက်က အရှင်အရဟံ မဟုတ်ချေ။)

🙏⚜️ရှင်ဓါတ်ဝဲစေတီတော်

🔸🔸သမ္ဗန်မင်း (ရှင်ဇံ)သည် အရှင် အရဟံရဟန္တာမြတ်ချီးမြှင့်ခဲ့သော မြတ်စွာဘုရားရှင်၏ ဓါတ်တော်စစ်ကို ရိုကျိုးသဒ္ဒါပွားများစွာဖြင့် `နောင်သာသနာတော်အဓွန့်ရှည် တည်တံ့စည်ပင်သာယာမည့် နေရာ၌ ကိန်းဝပ်စံပယ်တော်မူစေသား´ ဟု အဓိဌာန်ပြုလိုက်သည်နှင့် တစ်ပြိုင်နက် မြတ်ဘုရား၏ဓါတ်တော်အစစ်သည် ကောင်းကင်၌ ပျံဝဲတော်မူပြီးနောက် ဝေဿဝဏ္ဏကုန်းစပ် ရေကန်နံဘေးတွင် ကိန်းဝပ်တော်မူလေသည်။ မင်းကြီးသည် မိမိမွေးရာ ဌာနဖြစ်သော ဝဿဝဏ္ဏကုန်းစပ်ရေအိုင်ကို စေတီတည်နိုင်ရန်အတွက် မြေဖို့ခိုင်းလေသည်။ မင်းကြီး၏ အမိန့်အရ ထိုရေအိုင်ကို အမတ်ကြီး နေမျိုးသိဒ္ဓိဇေယျသူက နွားလှည်းငါးထောင်၊ လူတစ်သောင်းနှင့် ၇-ရက်အတွင်း အောက်ခြေမှ ကျောက်တို့ကိုနေ့ညမပြတ် မနေမနားဖို့ရလေသည်။ ဆင်ဝန်မင်းကြီး သတို့သီရိပစ္စယာရာဇာက ဆင်ဖြင့်နင်းသိပ်ရသည်။ ၁၂-ရက်အတွင်း အမြင့် ၈-တောင်ရလေသည်။ နေမျိုးသိန္ဂပျံချီကို ရွှေပြည်မင်းကြီးက
လူ -၂၀၀၀ ဖြင့် အုတ်ချော အုတ်လှ အုတ်ညက် အုတ်ကျက်တို့ကို ကြပ်မတ်လုပ်ကိုင်စေသည်။ အုတ်များကို မီးဖုတ်ပြီး အသင့်ဖြစ်သောအုတ်ချပ်တို့ကို လှည်းများကိုအုပ်ချုပ်နေသည့် နေမျိုးပျံချီက စေတီတည်မည့်ကုန်းတော်ပေါ်သို့ သယ်ပို့ရသည်။ ထို့နောက် မင်းကြီးသည် မြေဖို့ပြီးသည်နှင့် ဓါတ်တော်ဝဲပျံရာကုန်းတော်ပေါ်တွင် အလျား (၁၂) တောင်
အနံ (၂၀ )တောင် အမြင့် (၁၀) တောင်ရှိသည့် ဌာပနာတိုက်ကို ပြုလုပ်စေသည်။ ဌာပနာတိုက်အတွင်းသား၌ ကျောက်ဖျာခင်းပြီး ကျောက်ဖျာအကာပြုလုပ်လျက် ချော်ရည်လောင်းသပ်ရပ်ချောမွေ့စွာ ပြုလုပ်စေသည်။

ပန်းတိမ် ပန်းတည်း ပညာရှင် နေမျိုးရာဇသင်္ခသူအား
- ဘိုးတော်ဆင်ဖြူရှင် မဟာနရိန္ဒရွှေကိုယ်လေး
- ဘခမည်းတော် သမန္တမင်းရွှေကိုယ်လေး
- ကျေးဇူးရှင် ဂေါဝိန္ဒ ရွှေကိုယ်လေး
- မယ်တော်က သားသမီးနှစ်ဦးကို မွေးဖွားခဲ့သည့် ကျောက်ဖျာအား ရွှေသားကွပ်စေခြင်း....တို့ကို ပြုလုပ်စေ၍ ရွှေသံပန်း၊ စေတီတော်အောက်မှ ခံစေသည်။ အလျား ငါးတောင် အနံတစ်တောင်ရှိ ရွှေသံပန်း၊ နဝရတ်ကိုးပါးခြယ်သော ရွှေသားစေတီ၊ အမြင့် သုံးတောင်နှင့် ငါးလက်မရှိသော ရွှေသားထီးတော်တို့ကိုလည်း ထားရှိသည်။ ၎င်းနောက် နဝရတ်ကိုးပါးဖြင့် ခြယ်လှယ်ထားသော ရွှေပန်းဆိုင်၊ ရွှေပန်းသွယ်၊ သိကြား ဗြဟ္မာရွှေရုပ်ထုများ၊ ရှင်အာနန္ဒာနှင့်တကွ အသီတိရှစ်ကျိပ်၊ သတ္တဌာနကိုလည်း ရွှေသားအတိဖြင့်လည်းကောင်း၊ ကော်ဇင်ထီးဖြူတော်၊ ရွှေသားဖြင့်ပြုလုပ်သော ရာဇပလ္လင်၊ နဝရတ်ကိုးပါးဖြင့်ပြုလုပ်ထားသော ပန်းသွယ်၊ တံခွန်၊ ကုက္ကား၊ မလေးပွား......စသည်များကို ပြုလုပ်စေသည်။ ထို့နောက် အရှင်အရဟံချီးမြှင့်သော မြတ်စွာဘုရားဓါတ်တော်အစစ်ကိုပါ ဌာပနာပြီး စေတီတော်ကို အပြီးသပ် တည်တော်မူသည်။

♦️🔸 မြတ်စွာဘုရား၏ ဓါတ်တော်အစစ် ဝဲပျံကိန်းဝပ်သည့်နေရာတွင် တည်ထားသော စေတီတော်ဖြစ်၍ `ရှင်ဓါတ်ဝဲစေတီတော်´ ဟု ဘွဲ့တော်အမည်ကို ဆက်ကပ်ပူဇော်ကြသည်။ မင်းကြီးသည် စေတီတော်၏ ရေစက်ချအလှူမင်္ဂလာပွဲတော်သို့ သံဃာတော်အပါး (၁၀၀၀) ကို ပင့်ဖိတ်၍ အနေကဇာတင်ပြီး ဆွမ်း ရေချမ်း ခဲဖွယ် အချိုအချဥ် စသည်များကို ဆက်ကပ်လှူဒါန်း ရေစက်သွန်းချ အမျှ အတန်းပေးဝေသည်။ မင်းကြီးသည် မိမိ၏ သာဂရပိုင်နက်နယ်မြေအတွင်း ဆရာတော် ဘုန်းတော်ကြီးများအတွက် ဘုန်းတော်ကြီးကျောင်း (၂၅) ကျောင်းကို ဆောက်လုပ် လှူဒါန်းသည်။ ဝေမိဿကတောင် ခေါ် ကနန်းတောင်၏ တောင်စွယ်တစ်ခုဖြစ်သော ကြက်ဥတောင်ပေါ်တွင် ဘရသေ့အတွက် ရွှေကျောင်းကြီးတစ်ဆောင်နှင့် ကျောင်းကြီးနံဘေးတွင်ဇရပ်လေးဆောင်ကိုလည်း ဆောက်လုပ်လှူဒါန်းသည်။ ထို့အပြင် မင်းကြီးသည် ရှင်ဓါတ်ဝဲစေတီတော်အနီး ရင်ပြင်တော်တွင် မဟာသိမ်တော်ကြီးတစ်ဆောင်ကိုဆောက်လုပ်လှူဒါန်းသည်။ ရှင်ဓါတ်ဝဲစေတီတော်နှင့်အတူ အရပ်လေးမျက်နှာ တန်ဆောင်းကြီး လေးခုကိုလည်းကောင်း၊ ရေတွင်း (၄) တွင်း၊ ပုထိုး (၄) ဆူ၊ ရုပ်ပွားတော် (၄) ဆူ၊ ဇရပ် (၄) ဆောင်တို့ကိုလည်း လှူဒါန်းခဲ့သည်။ ဆင်တော် တစ်စီးနှင့်(၂၅) အိမ်ထောင်ကိုလည်း ရှင်ဓါတ်ဝဲစေတီတော်၏ ဝေယျာဝစ္စအတွက် လှူဒါန်းခဲ့သည်။

မြတ်ဗုဒ္ဓ၏ဓါတ်တော်အစစ်ကိန်းဝပ်နေခြင်း၊ ရောင်ခြည်တော်မကြာခဏ ကွန့်မြူခြင်း၊ လူနတ်ဗြမဟ္မာတို့ ကိုးကွယ်သော စေတီတော်ဖြစ်ခြင်း၊ ဆုတောင်းပြည့်ခြင်း၊ လောကီ လောကုတ် နှစ်ဖြာသော အကျိုးကို ပေးစွမ်းနိုင်သော စေတီတော် ဖြစ်ခြင်း၊ ထွက်ရပ်ပေါက် ပုဂ္ဂိုလ်များ လောကီပညာရပ်ကို လိုက်စားသောသူများ၏ အဓိဌာန်ဝင်ရာ စီမံအားထုတ်ရာ နေရာလည်း ဖြစ်သောကြောင့် ဗုဒ္ဓဘာသာဝင်သူတော်စင်များ လာရောက်ဖူးမြှော်သင့်သော စေတီ တစ်ဆူလည်းဖြစ်လေသည်။
ရှင်ဓါတ်ဝဲစေတီတော်သည် ရှင်ကိုးရှင်အစဥ်တွင် အမှတ်စဥ်(၈)၌ ရှိသော စေတီတော်ဖြစ်လေသည်။

🙏⚜️ရှင်ဆံတော် စေတီတော်

♦️🔸 ကလိန်အောင်ကျေးရွာရှိ `ဆံတော်ရှင် စေတီတော်မြတ်´ တွင် သမ္မာသမ္ဗုဒ္ဓမြတ်စွာဘုရားလေးဆူ၏ ဆံတော် ဓါတ်မြတ်သုံးဆူစီသည် ကိန်းဝပ်စံပယ်တော်မူလျက် ရှိနေသည်။ သို့ဖြစ်၍ `တစ်ဆယ့်နှစ်ဆူ´ သော ဆံတော် ဓါတ်မြတ်များ ကိန်းဝပ်ဆံပယ်တော်မူနေသည့် ဆံတော်ရှင်စေတီတော်မြတ်သည် အခါကြီး ရက်ကြီးများတွင် ရောင်ခြည်တော် ကွန့်မြူးတော်မူလေ့ရှိသည်။ ဆံတော်ရှင်စေတီတော်မြတ်သည် သတ္တဝါခပ်သိမ်းအတွက် ဆုတောင်းပြည့်လှပေသည်။ ထို့ကြောင့် `လေးဆူဓါတ်ဝင် ဆံတော်ရှင်စေတီတော်မြတ်´ ဟု ဘွဲ့တော်ဆပ်ကပ်လှူဒါန်းထားကြခြင်းပင် ဖြစ်လေသည်။

📜⚜️ ကကုသန်ဘုရားရှင်ပွင့်တော်မူစဥ်အခါ
🔸ဤဘဒ္ဒကမ္ဘာတွင် ပထမဦးစွာပွင့်တော်မူသော ကကုသန်မြတ်စွာဘုရားသည် ဝေမိဿကတောင် ခေါ် ကနန်းတောင်(ယခု- ထားဝယ်ခရိုင် ရေဖြူမြို့နယ် ကျောက်ထောင့်ကျေးရွာအနီးတွင် ရှိသော ကနန်းတောင်) သို့ကြွရောက်တော် မူလာသည်။ ထို့နောက် သုရုစိမင်းကြီးအား ဆံတော်ဓါတ်မြတ် သုံးဆူကိုပေးသနားတော်မူလေသည်။ မင်းကြီးသည် ဆံတော်ဓါတ်မြတ်သုံးဆူအား တိုင်းသူပြည်သား လူအများ ပူဇော်နိုင်အောင် မည်သည့်အရပ်ဒေသတွင် စေတီ တည်ထား ကိုးကွယ်သင့်ပါသနည်းဟု ဘုရားရှင်အား မေးမြန်းလျှောက်ထားလေသည်။ ဘုရားရှင်သည် ဤဆံတော်ဓါတ်မြတ်သုံးဆူကို သုဝဏ္ဏဂီရိတောင်ကုန်း၌ စေတီတည်ထား ကိုးကွယ်တော်မူပါလော့ဟု ဗျာဒိတ်တော်ပေးသနားတော်မူခဲ့လေသည်။ သုဝဏ္ဏဂီရိတောင်ဟူသည် ယခု ရေဖြူမြို့နယ် ကလိန်အောင်ကျေးရွာတွင် တည်ရှိသော `ကလိန်အောင် ဆံတော်ရှင် စေတီတော်မြတ်´ တည်ရှိရာ တောင်တော်ကို ခေါ်ဝေါ်ခြင်း ဖြစ်လေသည်။

📜⚜️ ဂေါဏဂုံဘုရားရှင် ပွင့်တော်မူစဥ်အခါက
🔸ဂေါဏဂုံဘုရားရှင် ပွင့်တော်မူစဥ်အခါက ဘုရားရှင်သည် (၁၀) ဝါမြောက်တွင် နောင်တော် ကကုသန်ဘုရားကြွတော်မူခဲ့သည့် ဝေမိဿကတောင်သို့ကြွတော်မူလာသည်။ ထို့နောက် ဘုရားရှင်သည် သုမနနှင့် သုဘောဂ ညီနောင် နှစ်ယောက်အား ဆံတော်ဓါတ်မြတ်သုံးဆူကို ပေးသနားတော်မူလေသည်။ ထိုစဥ်က ဤဒေသကို ကဋ္ဌာဝါဟဏတိုင်းဟု ခေါ်ဆိုသည်။ ကဋ္ဌာဝါဟဏတိုင်းကို စိုးစံအုပ်ချုပ်သောမင်းမှာ ရာဇိန္ဒမင်း ဖြစ်သည်။ မင်းကြီးသည် သုမနနှင့် သုဘောဂတို့ရရှိသော မြတ်ဘုရား၏ ဆံတော်ဓါတ်မြတ်သုံးဆူကို ကြီးစွာသော အလှူဒါနပွဲကြီးဖြင့် လှူဒါန်းပေးသနားတော်မူပြီး သမ္မာဝေနတ်မင်းများနှင့်အတူ ဂီရိဝေဘာတောင်ကုန်း၌ ဂေါဏဂုံဘုရားရှင်၏ ဗျာဒိတ်တော်အတိုင်း ဌာပနာတော်မူခဲ့လေသည်။ ဂီရိဝေဘာတောင်ဟူသည် ယခုရေဖြူမြို့နယ် `ကလိန်အောင်ဆံတော်ရှင်ဘုရား´ တည်ရှိရာ တောင်ကို ခေါ်ဆိုခြင်းဖြစ်သည်။

📜⚜️ ကဿပဘုရားရှင် ပွင့်တော်မူစဥ်အခါ
🔸ကဿပဘုရားရှင်သည်လည်း နောင်တော်ဘုရားများနည်းတူ ဝေမိဿကတောင်သို့ ကြွတော်မူလာသည်။ ထိုစဥ်က ဤတိုင်းကို ကဋ္ဌမှကာတိုင်းဟု ခေါ်ဆိုပြီး၊ ပြည်အားဖြင့် ဥဇ္ဇေနပြည်၊ မင်းကြီးမှာ ဗန္ဓုသေနမင်းကြီး၊ သားတော်မှာ ဗုဒ္ဓင်ဇရ ရသေ့ဖြစ်သည်။ ကဿပဘုရားရှင်သည် ဝေမိဿက တောင်ပေါ်တွင် ဗုဒ္ဓင်ဇရသေ့အား ဆံတော်မြတ် သုံးဆူကို ပေးသနားတော်မူလေသည်။ ထို့အပြင် ကဿပဘုရားရှင်သည် ထိုဆံတော်မြတ် သုံးဆူကို မဟေသရတောင်ကုန်း၌ ဋ္ဌာပနာတော်မူ၍ ကိုးကွယ်ကြရန် ဗျာဒိတ်ပေးတော်မူလေသည်။ မဟေသရတောင်ကုန်းသည် ကလိန်အောင်ဆံတော်ရှင်စေတီတော်မြတ်တည်ရှိရာ တောင်ကုန်းကို ခေါ်ဆိုခြင်းဖြစ်လေသည်။

📜⚜️ ဂေါတမဘုရားရှင် ပွင့်တော်မူစဥ်အခါက
🔸ဂေါတမဘုရားရှင်သည် (၁၁) ဝါမြောက်၌ ဥတ္တရဂုရုကျွန်းသို့ ဆွမ်းခံကြွပြီး အပြန်တွင်နောင်တော်ဘုရားများနည်းတူ ဝေမိဿကတောင်သို့ကြွရောက်တော်မူလာပြီး ထက်ဝယ်ဖွဲ့ခွေ ထိုင်တော်မူလေသည်။ ဤတွင် ဂဝံပတေ့ရသေ့၊ ဒူရက နတ်သားနှင့် ကုမ္ဘာဏ္ဍယက္ခနတ်ဘီလူးတို့က ဘုရားရှင်အား လာရောက် ဖူးမြှော်ကြသည်။ သုံးလောကထွဋ်ထားသဗ္ဗညုဘုရားရှင်သည် ထိုဝေမိဿကတောင်ခေါ် ကနန်းတောင်ပေါ်တွင် ဂဝံပတေ့ရသေ့၊ ဒူရကနတ်သား၊ ကုမ္ဘဏ္ဍယက္ခ နတ်ဘီလူးတို့အား သစ္စာလေးပါးမြတ်တရားကို ဟောကြားတော်မူလေသည်။ ဂဝံပတေ့ရသေ့မှာ သစ္စာလေးပါး တရားတွင် ဒုက္ခသစ္စာတရားတော်ကို ဟောကြားတော်မူအပြီးတွင် `သောတာပန်´ ဖြစ်တော်မူသည်။ သစ္စာလေးပါးတရားကို ဟောကြားတော်မူအပြီး၌ အရဟတ္တမာဂ်ဖိုလ်ကို ဆိုက်ပြီး ရဟန္တာဖြစ်တော်မူသည်။ ဂေါတမမြတ်စွာဘုရားရှင်က ဂဝံပတေ့ဟရန္တာသည် ဤအရပ်၌ပင် ပရိနိဗ္ဗန်စံဝင်လိမ့်မည်ဟု ဗျာဒိတ်ပေးတော်မူသည်။ ဘုရားရှင်၏ ဗျာဒိတ်တော်အတိုင်း ဂဝံပတေ့ရဟန္တာသည် ဝေမိဿကတောင်၏ တောင်စွယ်တောင်ပွားဖြစ်သော ယနေ့တိုင်ခေါ်ဝေါ်သည့် အလောင်းတော်တောင် (ထားဝယ်လို လောန်းတော်တာန်) တွင် ပရိနိဗ္ဗန်စံဝင်တော်မူသည်။

မြတ်စွာဘုရားရှင်သည် ဒူရကနတ်သားအား ဆံတော်မြတ်သုံးဆူကို ပေးသနားတော်မူလေသည်။ ထို့နောက် မြတ်စွာဘုရားရှင်သည် မြောက်အရပ်သို့ မျက်နှာမူ၍ ဝေဿဝဏ္ဏတောင်(ကလိန်အောင်ဆံတော်ရှင်ဘုရားတောင်)၌ နောင်တော်ဘုရားသုံးဆူ၏ ဆံတော်ဓါတ်မြတ်များဌာပနာတော်မူထားသည်ကို သိမြင်တော်မူသည့်အတိုင်း ဤဆံတော်ဓါတ်မြတ် သုံးဆူကိုလည်း ဌာပနာ၍ စေတီတည်ရန်လည်းကောင်း၊ ကုမ္ဘာဏ္ဍယက္ခဘီလူးသည် သုဝဏ္ဏဘုမ္မိသထုံပြည်တွင် ဘာနူမရာဇာမည်သော မင်းဖြစ်လတ္တံ့ဟု လည်းကောင်း၊ ဒူရကနတ်သားသည် ဘာနူမရာဇာမင်း၏ သားတော် နရုတိဖြစ်၍ အောင်သာဝတီ-ကလိန်အောင်မြို့ကို တည်၍ မင်းအဖြစ်စိုးစံလတ္တံ့ဟုလည်းကောင်း .........
တဖန် အရှေ့အရပ်သို့ လက်ညိုးတော်ညွှန်ပြပြီး ဣသိဒြိတောင် (ယခု- မှီအုံးတောင်) ၌ ငါဘုရား၏ သရီရဓါတ်တော်တို့ကို မင်းလေးပါးတွေ့ဆုံပေါင်းစုပြီး စေတီတည်ထားကိုးကွယ်လတ္တံ့ဟု လည်းကောင်း.........
တောင်အရပ်သို့ လက်ညိုးတော်ညွှန်ပြ၍ သေလာပဗ္ဗတတောင်(ယခု-ရှင်မော်တောင်) ၌ ငါဘုရား၏ စွယ်(အံ)တော်ဓါတ်မြတ်ကို နဂါးစစ်သူကြီးက ပင့်လာဝှက်ထားပြီး ကိုးကွယ်နေသည်ကို ငါဘုရား၏ တပည့်ရဟန္တာ(၂)ပါးက တွေ့ရှိဖူးမြင်ရကာ အရညကင်ဓုတင်ဆောက်တည်လျက် မင်းသုံးပါးကို စုစည်းစေလျက်စေတီတည်ထားကိုးကွယ်လတ္တံ့ဟု လည်းကောင်း....ဗျာဒိတ်ပေးတော်မူခဲ့သည်။

🔸 ဆံတော်ဓါတ်မြတ်သုံးဆူကို ဒူရကနတ်သားက နဝရတ်ကိုးသွယ် စီခြယ်ထားသော ရွှေစင်ကလပ်ဖြင့်ပူဇော်လေသည်။ ဝေသဝဏ္ဏအစရှိသော နတ်မင်းကြီးများက နဝရတ်ကိုးသွယ်စီခြယ်ထားသော ရွှေပန်းတောင်း၌ ဆံတော်ဓါတ်မြတ်သုံးဆူ ကိန်းဝပ်စံပယ်နေသော ရွှေစင်ကလပ်ကို ထည့်သွင်းလှူဒါန်း၍ ပူဇော်ကြလေသည်။ ဝေဿဝဏ္ဏတောင်ကုန်းကို စောင့်သော ကုမ္ဘဏ္ဍယက္ခနတ်ဘီလူးကြီးနှင့် သာသနာစောင့်စတုလောကပါလ နတ်မင်းကြီး လေးပါးတို့က တောင်သမုဒ္ဒရာမှာ လုံးပတ်ထွာဆိုင်ရှိပြီး အလျားတောင်ဆုပ်ပမာဏရှိသော ပတ္တမြားစေတီကြုတ်ကို ဆောင်ယူလာကြသည်။ ထို့နောက် ဆံတော်မြတ် သုံးဆူ ကိန်းဝပ်စံပယ်လျက်ရှိသော ရွှေစင်ကလပ်နှင့် ရွှေပန်းတောင်းကို ၎င်းပတ္တမြားကြုတ်အတွင်းသို့ ထည့်သွင်းဌာပနာကြလေသည်။
ကုမ္ဘဏ္ဍယက္ခဘီလူးကြီးသည် ဆံတော်ဓါတ်မြတ်သုံးဆူကို ဌာပနာထားသော ပတ္တမြားစေတီကြုတ်ကို ပြည်သူ ပြည်သားများနှင့်အတူ ကြီးကျယ်ခမ်းနားလှသော မဏ္ဍပ်ကြီးအတွင်းသို့ ပင့်ဆောင်ကြသည်။ ပြီးနောက် ရွှေပိဿာ (၂၀၀) ရှိသော ရွှေသားစေတီ၌ အထက်ပါပတ္တမြားစေတီကြုတ်ကို ထည့်သွင်းဌာပနာကြသည်။ ထို့နောက် ဆံတော်ဓါတ်မြတ်သုံးဆူစံပယ်တော်မူသော ရွှေသားစေတီတော်ကို မဏ္ဍပ်တော်အတွင်း ရွှေကလပ်တော်ပေါ်တင်၍ ပြည်သူပြည်သားများက သုံးလတိတိအတီး အမှုတ် အက အခုန်တို့ဖြင့် ပူဇော်ကြလေသည်။

ဝေဿဝဏ္ဏတောင်ကုန်းထိပ်တွင် စောက်အတောင်လေးဆယ်၊ အနံအတောင်သုံးဆယ်တူး၍ ကျောက်အင်္ဂတေဖြင့် လှပတင့်တယ်သပ္ပါယ်စွာ စီမံကြသည်။ ၎င်းအတွင်း၌ ကျောက်စားပွဲထက်တွင် အထက်ပါရွှေသားစေတီတော်ကို တင်ထားပြီး နဝရတ်ကိုးသွယ်ဖြင့်စီခြယ်ပြုလုပ်ထားသော တံခွန်၊ ကုက္ကား၊ ထီးတို့ကို တင့်တယ်စွာ ဆင်မြန်းပူဇော်ကြလေသည်။
၎င်းနောက် ဒူရကနတ်သား၊ဝေဿဝဏ္ဏနတ်မင်းကြီးများ၊ သာသနာစောင့်နတ်မင်းကြီးများက ဌာပနာကြပြီး ကျောက်ကြီးကျောက်ငယ်အသွယ်သွယ်တို့ဖြင့် ကာရံလိုက်ကြလေသည်။ ထိုသို့ကာရံပြီးနောက် ၎င်းဌာပနာတိုက်ပေါ်၌ တစ်ဆယ့်ငါးတောင်ခန့်မျှ ဉာဏ်တော်အမြင့်ရှိသော ကျောက်စေတီတစ်ဆူကို တည်ထားပူဇော်ကြလေသည်။ ယင်းကျောက်စေတီအား ဆုတောင်းပြည့် လေးဆူဓါတ်ဝင် ဆံတော်ရှင် စေတီတော်ဟူသော ဘွဲ့အမည်ကို ကပ်လှူပူဇော်ကြလေသည်။

🔸🔸 ကောဇာသက္ကရာဇ် (၂၄) ခုနှစ်၊ ပြာသိုလဆန်း (၂)ရက်၊ ကြဿပတေးနေ့ နေတက်သည်နှင့်တပြိုင်နက်.......
နရုတိမင်းကြီးသည် သံဃာတော်အရှင်သူမြတ်များနှင့် တိုင်ပင်တော်မူပြီးနောက် လောဒီသူဌေး လောစစ်စံ၊ ဇင်းဘာသူဌေး သီရိဘောဂသာရ တို့နှင့်အတူ ဆံတော်မြတ်သုံးဆူကိန်းဝပ်စံပယ်တော်မူသော ကျောက်စေတီနှင့် ဌာပနာတိုက်ကို ဖွင့်တော်မူလေသည်။ ဆံတော်မြတ် သုံးဆူသည် သက္ကရာဇ် ၂၄ ခုနှစ် တပေါင်းလမှ သက္ကရာဇ် ၂၅ ခုနှစ် တပေါင်းလပြည့်နေ့အထိ တစ်နှစ်လုံးလုံးပြည်သူတို့၏ အဖူးအမျှော်ပူဇော်ခံတော်မူလေသည်။ နရုတိမင်းကြီးသည် ဆံတော်ဓါတ်မြတ်ကိန်းဝပ်စံပယ်တော်မူနေသော ဌာပနာတိုက်အတွင်း ဘိုးတော် ဘေးတော် ခမည်းတော် မယ်တော် မင်းကြီးကိုယ်တော် မိဖုရားကြီး ဦးလေးတော် ဘုရားရဟန္တာ စသည်တို့၏ရွှေကိုယ်လေး ရုပ်ထုတော်များ၊ အပရာဇိတ ပလ္လင်၊ ဗောဓိပင်၊ သတ္တဌာနတို့၌ ဘုရားရှင်သီတင်းသုံးနေတော်မူဟန် ရွှေကိုယ်လေး ရုပ်ထုတော်များ၊ သာသနာပြု ရဟန္တာငါးပါးနှင့် သံဃာတော်များ၏ ရွှေသားရုပ်ရှင်တော်များ၊ ဇာတ်ကြီးဆယ်ဘွဲ့ ဘုရားလောင်းတို့၏ ရုပ်ပုံတော် ရွှေကိုယ်လေးများ အစရှိသည်များနှင့် ရွှေထီး ငွေထီး ပတ္တမြားထီး ရွှေကုက္ကား ရွှေတံခွန် ငွေတံခွန် ရွှေညောင်ရွက် ငွေညောင်ရွက် ရွှေပန်းပွား ရွှေမုလေးပွား ငွေမုလေးပွား ရွှေအုပ် ငွေအုပ် ရွှေပေါက်ပေါက် ငွေပေါက်ပေါက် စသည်များကို ထည့်သွင်းပူဇော်ထားရှိလေသည်။ အထက်ပါတို့ကို သွန်းထုထားသော ရွှေပိဿာချိန်သည် လေးသောင်း၊ ငွေပ်ဿာချိန်သည် တစ်သိန်းနှစ်သောင်း ရှိလေသည်။ ထို့အပြင်
ထု တစ်လက်မ၊ အလျားဆယ်လက်မ၊ အနံငါးလက်မရှိသော ရွှေပြား၊ အလျား လက်မ နှစ်ဆယ်၊ အနံ ဆယ်လက်မ၊ ထု နှစ်လက်မခန့်ရှိသော ရွှေအုပ်တို့ကိုလည်း ဌာပနာတိုက်တော်အတွင်း ရွှေဂဟေတော်နှင့် ခိုင်ခံ့အောင် ပြုလုပ်စေလေသည်။ ဤသို့ဆိုလျှင် အထူးထူးသော များပြားဆန်းကြယ်သော ရွှေ ငွေ ကျောက်သံပတ္တမြား ရတနာများဖြင့် ဌာပနာတိုက်၌ ထည့်သွင်းပူဇော်လေသည်။ ထောင်သောင်းမကသော များမြောင်လှသော ရဟန်းသံဃာတော်များကိုလည်း ပင့်ဖိတ်၍ လှူဖွယ်ဝတ္ထုပစ္စည်းများကို လှူဒါန်းလေသည်။

ယင်းဌာပနာတိုက်၏ ထောင့်လေးထောင့်၌ အန္တရာယ်အပေါင်းကို အောင်နိုင်စေခြင်းငှာ ဆေးဝိဇ္ဇာရုပ်လေးရုပ် အနက် တစ်ဦးကို သံလျက်ထမ်း၍ လည်းကောင်း တစ်ဦးကို အမျိုးမျိုးကို ဖြစ်စေနိုင်သော တေးလုံးကို ကိုင်၍ လည်းကောင်း၊ တစ်ဦးကို လေး မြား စင်္ကြာကို ကို၈်၍ လည်းကောင်း၊ ကျန်တစ်ဦးကို ဓါးစင်္ကြာကို ကိုင်၍ လည်းကောင်း အစောင့်အဖြစ်ထားရှိစေသည်။ ဌာပနာတိုက်၌ ရွှေသားမျက်နှာကျက်ကို တပ်ဆင်ပြီး ဥဿဖရားတစ်လုံးကို စွဲလျက် ပူဇော်ထားရှိသည်။ ထုတစ်မိုက် အနံသုံးတောင် အလျားခြောက်တောင် ရှိသော ရွှေတံခါးကြီး နှစ်ချပ်ဖြင့် ဌာပနာတိုက်ကို ပိတ်ထားလိုက်လေသည်။ ဌာပနာတိုက်အပေါ်၌ စေတီတော်တစ်ဆူကို ပူဇော်ထားကြသည်။ ယင်းစေတီတော်အား `ဆုတောင်းပြည့် ဆံတော်ရှင် စေတီ´ ဟူသော ဘွဲ့အမည်ကို ဆက်ကပ်လှူဒါန်းခဲ့ကြလေသည်။

♦️ ဆုတောင်းပြည့်ဆံတော်ရှင်စေတီတော်မြတ်သည် ပွင့်တော်မူပြီးသော ဘုရားရှင်လေးဆူ၏ ဆံတော်ဓါတ်မြတ်များ ကိန်းဝပ်စံပယ်တော်မူနေသော စေတီတော်ဖြစ်ပြီး မကြာခဏ ရောင်ခြည်တော်ကွန့်မြူးလေ့လည်းရှိလေသည်။ လောကီ လောကုတ် (၂)ဖြာနှင့် သက်ဆိုင်သော ပုဂ္ဂိုလ်များ၊ သူတော်စင်များ၊ နတ် ဗြဟ္မာများ လာရောက်ဖူးမြှော်လေ့ရှိသည်။ ဤ စေတီတော်မြတ်သည် ရှင်ကိုးရှင်အစဥ်တွင် အမှတ်စဥ်(၉) ၌ ရှိလေသည်။

⚜️⚜️⚜️⚜️⚜️⚜️⚜️⚜️⚜️

🚩Happy Vacation Travel မှ ယခုလို Stay at Home ကာလမှာ မြန်မာပြည်ရဲ့ အချို့သော ဒေသတွေရဲ့ သမိုင်းကြောင်းများ၊ ဖြစ်တည်မှု များကို ဗဟုသုတရဖွယ် တင်ဆက် ဖော်ပြပေးမှာမို့လို့ (မသိသေးသူများအတွက် ရည်ရွယ်ခြင်း၊ သိရှိပြီးသူများအတွက်လည်း စိတ်အပန်းဖြေ ဖတ်ရှုနိုင်ရန်အတွက်) ကြိုးစားရှာဖွေစုစည်းတင်ပြပေးမှာမို့ Page လေးကို စောင့်ကြည့်ပေးကြပါအုံးနော်။ Page Like & Share လေးလဲ လုပ်ပေးကြပါအုံးရှင့်။
ကျေးဇူးအထူးပင် တင်ရှိပါတယ်🥰😘

!! 🏖️

#ဆရာဦးဘမြင့်_ထားဝယ်

ထားဝယ်မြို့ရှိရှေးဟောင်းသမိုင်းဝင်ရှင်ကိုးရှင်ဘုရားများ -အပိုင်း(၂)⚜️⚜️⚜️⚜️⚜️⚜️⚜️🙏🔸ရှင်မော်တောင်စေတီတော်♦️🔸 မြတ်ရှင်မော်...
03/01/2021

ထားဝယ်မြို့ရှိရှေးဟောင်းသမိုင်းဝင်ရှင်ကိုးရှင်ဘုရားများ -အပိုင်း(၂)

⚜️⚜️⚜️⚜️⚜️⚜️⚜️

🙏🔸ရှင်မော်တောင်စေတီတော်

♦️🔸 မြတ်ရှင်မော်စေတီတော်သည် ``မြတ်ဗုဒ္ဓ၏ လက်ယာအောက် စွယ်တော်ဓါတ်မြတ်´´ ကို ဌာပနာထားသည့် စေတီတော်ဖြစ်သည်။
(၁) တာဝတိံသာနတ်ပြည်တွင် သိကြားမင်း တည်ထားကိုးကွယ်ထားသော ``စူဠာမဏိစေတီတော်´´...
(၂) ဗြဟ္မာပြည်၌ မဟာဗြဟ္မာတည်ထား ကိုးကွယ်ထားသော ``ဒုဿစေတီတော်´´ ..တို့ကဲ့သို့ တန်ခိုးကြီးမားသော စေတီတော်မြတ်ဖြစ်ပြီး....နဂါးမင်း၊ ဓမ္မသေနမင်း၊ ကောရမ္ဘမင်း..မင်းသုံးပါး၏ ကုသိုလ်ဖြစ်သည်။...

ဂေါတမမြတ်စွာဘုရားသခင်သည် ရဟန်းတော်များအား``ဟိန္ဒဒါနိဘိက္ခဝေ´´ အစရှိသော ပစ္ဆိမဗုဒ္ဓဝါစနကို မိန့်တော်မူပြီး မဟာသက္ကရာဇ် (၁၄၈)ခုနှစ် ကဆုန်လပြည့်အင်္ဂါနေ့ လင်းအားကြီးချိန်တွင် ပရိနိဗ္ဗါန်စံဝင်တော်မူသည်။

တေဇောဓါတ်လောင်ကျွမ်းသော ဘုရားရှင်၏ဥတုဇရုပ်ကလာပ်တော်မှ အရိုးတော်၊ အသား အသွေးတော် စသည်အားလုံးမှာ ``သာရီရိကဓါတ်တော်များ´´ အဖြစ်ကြွင်းကျန်ရစ်ကုန်သည်။

မြတ်ဘုရားပရိနိဗ္ဗါန်စံဝင်ပြီဟူသော သီတင်းကို ကြားသိကြသောအခါ ရာဇဂြိုလ်ပြည့်ရှင် ဘုရင်အဇာတသတ်မင်းကြီးနှင့်တကွ ရှစ်ပြည်ထောင်သောမင်းများသည် ဘုရားရှင်၏ ဓါတ်တော်များရရှိနိုင်ရေးအတွက် စုရုံးရောက်ရှိလာကြသည်။ ရှစ်ပြည်ထောင်သောမင်းများသည် ဘုရားရှင်၏ သာရီရိက ဓါတ်တော် စသည်များ ရရှိပူဇော်နိုင်ရေးအတွက် အချင်းချင်းစစ်မက်ဖြစ်ပွားတော့မည့် အခြေအနေထိ ဖြစ်ကြသည်။

ဤတွင် အထက်ပါမင်းများ၏ အာစရိယသခင် ဆရာအရှင်ဖြစ်ခဲ့ဖူးသော ဒေါကာပုဏ္ဏားကြီးက အညီအမျှခွဲဝေပေးမည်ဖြစ်ကြောင်း ပြောဆိုဖြန်ဖြေပေးရသည်။...
ထို့နောက် မဟာသက္ကရာဇ် (၁၄၈)ခုနှစ်၊ နယုန်လဆန်း (၅)ရက်နေ့တွင် ဒေါကာပုဏ္ဏားကြီးက မြတ်ဗုဒ္ဓ၏ ဓါတ်တော်များကို ရှစ်ပုံ_ရှစ်စိတ်ထား၍ ခွဲဝေပေးလိုက်လေသည်။( ဓါတ်တော်တစ်ပုံ_တစ်စိတ် ဟူသည် နှစ်ပြည်ခန့်ရှိလေသည်..)

ဒေါကာပုဏ္ဏားကြီးသည် ရှစ်ပြည်ထောင်သောမင်းများကို ဓါတ်တော်ဝေစဥ် ``လက်ယာအောက်စွယ်တော်´´ ကို ခြေဖျားဖြင့်အသာနင်း၍ ဝှက်လိုက်သည်။ ဤသည်ကိုတွေ့မြင်လိုက်သော ဘောဂဝတီနဂါးပြည်မှ နဂါးမင်းကြီးဇေယျာသေနသည် ပုဏ္ဏားကြီးမသိအောင် နဂါးပြည်သို့ပင့်ဆောင်သွားလေသည်။ ....
စွယ်တော်မြတ်ကို နဂါးမင်းသည် ဘောဂဝတီနဂါးပြည်တွင် ခမ်းနားတင့်တယ်စွာ ထားရှိပြီး ပူဇော်ကိုးကွယ်မှု ပြုလျက်နေသည်။

သာသနာသက္ကရာဇ် ၂၃၅ ခုနှစ်၊ ပါဋလိပုတ်ပြည်ကို အစိုးရသော သီရိဓမ္မသောကမင်းကြီးမှာ ဘုန်းတန်းခိုးအာနုဘော်နှင့် ပြည့်စုံသောမင်းဖြစ်ပြီး သာသနာပြုမင်းတစ်ပါးလည်း ဖြစ်သည်။..ထိုမင်းက အာဏာစက်ဖြင့် မိမိနဂါးမင်းအား ဆင့်ခေါ်ပြီး စွယ်တော်မြတ်ကို တောင်းခံလာပါက ငြင်းဆန်၍ရလိမ့်မည် မဟုတ်မှန်း နဂါးမင်းကြီးက သိရှိသည်။
သို့ဖြစ်၍ သီရိဓမ္မာသောကမင်းကြီး မသိအောင် အာဏာစက်မှလွတ်ကင်းအောင်၊ စွယ်တော်မြတ်ကိုလည်း အစဥ်သဖြင့်ကိုးကွယ်ပူဇော်ခွင့်ရအောင် နည်းလမ်းကို ရှာဖွေလေတော့သည်။...

နဂါးမင်းကြီးသည် တူတော်မောင်ဖြစ်သူ နဂါးစစ်သူကြီး ဝါသုလဒေဝအား လူ့ပြည်လူ့ရွာသို့ စေလွှတ်လေ၏ စွယ်တော်မြတ်အား မိမိတို့ နဂါးများအနေဖြင့်တိတ်တဆိတ်ကိုးကွယ်ပူဇော်နိုင်မည့် နေရာတစ်နေရာကို ရှာဖွေစေသည်။ ထို့နောက် ဝါသုလနဂါးစစ်သူကြီးလည်း လူ့ပြည်လူ့ရွာသို့ လာရောက်၍နေရာရှာဖွေလေသည်။ ``ထားဝယ်အငူ_သန္ဓုသေလာတောင်´´ (ထားဝယ်ရှင်မော်တောင်)အား တွေ့ရှိလေသည်။ သို့ဖြစ်၍ မြတ်စွယ်တော်ကို ပတ္တမြားကြုတ်တွင် ထည့်သွင်း ပူဇော်ပြီး၊ ဘောဂဝတီနဂါးပြည်မှ လူ့ပြည်သို့ပင့်ဆောင်လေသည်။ လူ့ပြည်လူ့ရွာသို့ရောက်ရှိသောအခါ ဒူရကတိုင်း (ထားဝယ်ဒေသ)၊ ထားဝယ်အငူစွန်းဖြစ်သော သိန္ဒုသေလာတောင် (ယခု_ရှင်မော်တောင်) ပေါ်ရှိ လင်းလွန်းပင်ကြီး၏ ခွကြား၌ မြတ်စွယ်တော်ကို ထည့်သွင်းပူဇော်ထားသည့်ပတ္တမြားကြုတ်အား ပင့်ဆောင်ထားရှိလေသည်။...နဂါးများသည် ထိုနေရာသို့အစဥ်သဖြင့် လာရောက်ကြ၍ မြတ်စွယ်တော်အားပူဇော်ကိုးကွယ်ကြလေသည်။ (လင်းလွန်းပင်မှာ ယခုမရှိတော့​ချေ။.. လင်းလွန်းပင်နေရာကိုမူ ရှေးစကားအစဥ်အရသိရလေသည်။)

သီရိဓမ္မာသောကမင်းကြီးလက်ထက်...
အရှင်မဟာမောဂ္ဂလိပုတ္တတိဿ ရဟန္တာမထေရ်မြတ်ကြီးသည် မဟာဗဏ္ဍဝနှင့် စူဠဗဏ္ဍဝရဟန္တာ(၂)ပါးအား ဒူရကတိုင်းသို့ သာသနာပြုရန်စေလွှတ်တော်မူလေသည်။ အရှင်မြတ်(၂)ပါးသည် ကောင်းကင်မှ ဈာန်ယာဥ်ဖြင့် ကြွလာကြလေသည်။ ဒူရကတိုင်း သိန္ဓုသေလာတောင် အနီးသို့ရောက်သော် ဝါသုလဒေဝနဂါးစစ်သူကြီးက စွယ်တော်မြတ်ကို တိတ်တဆိတ်ကိုးကွယ်နေသည်ကို တွေ့မြင်လေသည်။ ရဟန္တာအရှင်မြတ် (၂) ပါးလည်း သိန္ဓုသေလာတောင်၌ ရပ်နား၍ စွယ်တော်မြတ်ကို ရှိခိုးပူဇော်ဖူးမြော်ကြလေသည်။ အရှင်မြတ်(၂) ပါးသည် ရှင်မော်တောင်ပေါ်တွင်ပင် သီတင်းသုံးနေထိုင်တော်မူကြသည်။ နဂါးမင်းကြီးနှင့် နဂါးစစ်သူကြီးတို့အား မြတ်ဗုဒ္ဓ၏တရားဒေသနာတော်များ ဟောကြားတော်မူသည်။

အရှင်မြတ်(၂)ပါးသည် တနင်္သာရီမြို့သို့ကြွရောက်ပြီး တနင်္သာရီမြို့စားကောရမ္ဘမင်းထံ (၇) ရက်ဆွမ်းရပ်တော်မူသည်။ နေ့စဥ် သန္ဓုသေလာတောင်နှင့် တနင်္သာရီသို့ ဈာန်ဖြင့် ဆွမ်းခံကြွခြင်းဖြစ်သည်။ အရှင်မြတ် (၂) ပါးသည် ကောရမ္ဘမင်းအားစွယ်တော်မြတ်အကြောင်း ဟောကြားတော်မူသည်။...ထို့နောက် အောင်သာဝတီမြို့စား (ယခု ကလိန်အောင်ရွာ) ဓမ္မသေနမင်းထံ ကြွရောက်ပြီး (၇) ရက်ဆွမ်းရပ်တော်မူသည်။ မင်းနှင့်ပြည်သူအား တရားတော်များ ဟောကြားတော်မူသည်။ သိန္ဓုသေလာတောင်ရှိ မြတ်စွယ်တော် အကြောင်းကို ဟောကြားတော်မူသည်။....ဤတွင် နဂါးမင်း၊ တနင်္သာရီမင်း၊ အောင်သာဝတီမင်းတို့သည် မြတ်စွယ်တော်ကို ဖူးမြော်ပြီး စေတီတည်ထားကိုးကွယ်လိုသော ဆန္ဒဖြစ်ပေါ်လာကြသည်။ အရှင်မြတ် (၂) ပါးက သိန္ဓုသေလာတောင်တွင် မင်းသုံးပါးတွေ့ဆုံ၍ စွယ်တော်မြတ်အား ဖူးမြော်ပူဇော်ကြပြီး စေတီ တည်ထားကြရန် ဟောကြားညွှန်ပြတော်မူလေသည်။

♦️ နဂါးမင်း
ဘောဂဝတီပြည်မှ နဂါးမင်းကြီးသည် သက္ကရာဇ် ၂၃၈ ခုနှစ် တပို့တွဲလပြည့်နေ့ တွင် သိန္ဓုသေလာတောင်သို့ ရောက်ရှိလာလေသည်။ မိမိနဂါးစစ်သည်များအား အလျား ၁၈ တောင် အနံ ၁၂ တောင် အမြင့် ၂၀ တောင် ရှိသော ဌာပနာတိုက်ကို တူးဖော်တည်တောက်စေသည်။ အလွန်မာကြောသော ကျောက်သား ကျောက်ပြားများဖြင့် အခင်း အကာ နံရံ အမိုးတို့ကို ခိုင်ခံ့အောင်ပြုလုပ်စေသည်။ ရွှေသား ရွှေပြားများဖြင့် ထပ်မံမွန်းမံစေသည်။

♦️ ဓမ္မသေနမင်း(အောင်သာဝတီမင်း)
ဓမ္မသေနမင်းသည် သက္ကရာဇ် ၂၃၈ ခုနှစ် (AD- 876)၊ တပေါင်းလဆန်း ၁၃ ရက် အချိန်၌ ကြည်းကြောင်း ရေကြောင်းဖြင့် သိန္ဓုသေလတောင်သို့ ရောက်ရှိလာသည်။

♦️ ကောရမ္ဘမင်း (တနင်္သာရီမင်း)
ကောရမ္ဘမင်းသည်လည်း စစ်အင်္ဂါခင်းကျင်းလျက် သက္ကရာဇ် (၂၃၈) ခုနှစ် (AD-876)၊ တပေါင်းလဆန်း (၁၃) ရက်တွင်ပင် သိန္ဓုသေလာတောင်သို့ရောက်ရှိလာလေသည်။ ကောရမ္မမင်းကြီးသည် သိန္ဓုသေလာတောင် အရှေ့ဘက်ခြမ်းမြစ်တစ်ဖက်ကမ်းရှိ မြေပြန့်နေရာ တစ်ခုတွင် ယာယီစံနန်းတော်နှင့် ယာယီစံမြန်းမည့်မြို့တစ်မြို့တည်လျက် စံမြန်းနေထိုင်သည်။ ထိုမြို့ကို ``ကနက်သီရိမြို့´´ ဟု ခေါ်သည်။ ယနေ့တိုင် ``ကနက်သီရိရွာ´´ ဟု ထင်ရှားသည်။

⚜️🔸 မြတ်ဗုဒ္ဓ၏ ``လက်ယာအောက်စွယ်တော်ဓါတ်မြတ်´´ သည် မင်းသုံးပါး မှူးမတ် ပြည်သူများ ရှိခိုးပူဇော်နေစဥ် လင်းလွန်းပင်ခွကြားမှ ကောင်းကင်ပေါ်သို့ ထန်းနှစ်ဖျားခန့်အထိ ပျံတက်တော်မူပြီး ခြောက်ဖြာသော ရောင်ခြည်တော်များ ကွန့်မြူးလျက် တန်ခိုးပြာဋိဟာပြတော်မူသည်။ ... မင်းသုံးပါးတို့သည် သက္ကရာဇ် (၂၃၈) ခုတပေါင်းလပြည့်နေ့တွင် မိမိတို့ လှူဒါန်းကြသည့် ဌာပနာပစ္စည်းများကို ဌာပနာတိုက်အတွင်းသို့ အသီးသီးထည့်သွင်းလှူဒါန်းကြသည်။ ... ထို့နောက် မြတ်ဘုရား၏ လက်ယာအောက်စွယ်တော်ဓါတ်မြတ်ကို ထည့်သွင်းဌာပနာတော်မူသည်။ ထိုဌာပနာတိုက်ပေါ်၌ ဌာပနာတိုက်ပေါ်ကို ခြုံငုံ၍ နဂါးစစ်သူကြီး ဝါသုလဒေဝက စေတီတော်တစ်ဆူကို တည်တော်မူသည်။ နဂါးစစ်သူကြီး၏ ကောင်းမှုတော်စေတီကို ခြုံငုံ၍ တနင်္သာရီမင်း (ကောရမ္ဘ)က ဒုတိယမြောက်စေတီတော်ကို တည်တော်မူသည်။
အောင်သာဝတီ(ဓမ္မသေန) မင်းကြီးက ဒုတိယမြောက် စေတီကို ခြုံငုံပြီး တတိယမြောက်စေတီတော်ကို တည်တော်မူသည်။ ...
ထို့နောက် မင်းသုံးပါးသည် ရေစက်ချအလှူတော်မင်္ဂလာကို စည်ကားသိုက်မြိုက်စွာ ကျင်းပကြလေသည်။

သက္ကရာဇ် (၅၁၇) ခုနှစ်တွင် ပုဂံပြည့်ရှင် အလောင်းစည်သူ (စည်သူ-၁) မင်းကြီးသည် ဖောင်တော်ဖြင့် ရှင်မော်တောင်သို့ ရောက်ရှိရပ်နားခဲ့ဖူးသည်။ မင်းကြီးသည် စွယ်တော်မြတ်စေတီကို ထပ်မံပြုပြင်ပြီး၊ ရွှေသင်္ကန်းကပ်လှူတော်မူခဲ့သည်။ ထိုစွယ်တော်မြတ်စေတီတော်၏ အထက်နားတွင် စေတီတစ်ဆူကို ထပ်မံတည်ထားခဲ့ပြီး ``ဖောင်တော်ဦး´´ စေတီဟု ခေါ်တွင်သည်။
အလောင်းစည်သူမင်းကြီးသည် ပုဂံမှလိုက်ပါလာသော မင်းချင်း မောင်းမမိဿံစုစုပေါင်း ၅၀ ကျော်ခန့်ကို စေတီတော်ဝေယျာဝစ္စများ လုပ်ကိုင်၍ ဒါနပြုနိုင်ရန်အတွက် ဘုရား၌ လှူဒါန်းတော်မူခဲ့သည်။
မင်းကြီး၏ တစ်ချက်လွှတ်အမိန့်ဖြင့် ထိုအရပ်၌ နေခဲ့ကြ၍ ထိုရွာကို ``တစ်ချက်လွှတ်ရွာ´´ ဟု ခေါ်သည်။ ထိုမှ တစ်ဆင့် ``ကြက်လွှတ်ရွာ´´ ဟု ခေါ်တွင်လာခဲ့ကြရာ ယနေ့တိုင် တည်ရှိသည်။

ကောဇာသက္ကရာဇ်(၅၆၆) (AD-1204) ခုနှစ်တွင် တနင်္သာရီမြို့စား စောပဲဖြူသည် ပုဂံဘုရင်ကို ပုန်ကန်ထကြွ၏။ သို့ဖြစ်၍ ပုဂံဘုရင် နရပတေ့စည်(စည်သူ- ၂) မင်းကြီးကိုယ်တိုင် ရေကြောင်းမှ ချီတက်ပြီး စောပဲဖြူကို တိုက်ခိုက်နှိမ်နင်းခဲ့ရသည်။ မင်းကြီးသည် တနင်္သာရီကို နေသားတကျဖြစ်အောင် စီမံတော်မူသည်။ ရေကြောင်းမှ အပြန်ခရီးတွင် ထားဝယ် ရှင်မော် အငူ၌ ဝင်ရောက်ရပ်နားသည်။ မင်းကြီးသည် စွယ်တော်မြတ်စေတီနှင့် ဘိုးတော်အလောင်းစည်သူမင်းကြီး၏ ကောင်းမှုတော်ဖြစ်သော ဖောင်တော်ဦးစေတီတော်တို့ကို ထပ်မံ ပြုပြင်မွန်းမံလှူဒါန်းတော်မူသည်။ ထို့အပြင် စွယ်တော်မြတ်စေတီတော် အောက်နား၌ စေတီတော်တစ်ဆူကို ထပ်မံ တည်ထားပူဇော်ခဲ့သည်။ ထိုစေတီတော်ကို ``မော်ဦးစေတီတော်´´ဟု ခေါ်ဝေါ်သည်။... နရပတေ့စည်သူမင်းကြီးသည် ``ထောင့်ကွယ်မြို့´´ ကိုလည်း တည်ထားပေးခဲ့သည်။
မိမိ၏ အနွယ်တော်များအားထားခဲ့၍ အုပ်ချုပ်စေခဲ့သည်။ ထောင့်ကွယ် မင်းဆက်ကိုလည်း တည်ထောင်ထားခဲ့သည်။

နရပတေ့စည်သူ၏ အနွယ်တော်များဖြစ်သော ထောင့်ကွယ်မင်းဆက်၏ နောက်ဆုံးမင်းမှာ မင်းဆူ ခေါ် စောသူရ ဖြစ်သည်။ စောသူရမင်းသည် ထောင့်ကွယ်မှ ရွှေ့ပြောင်းလာပြီး ``ဝယ်တီမြို့´´ ကို တည်ထောင်သည်။... အချိန်ကား ကောဇာသက္ကရာဇ် (၅၉၀) ခုနှစ် (AD-1228) ဖြစ်သည်။
ဝယ်တီမင်းဆက်၏ နောက်ဆုံးမင်းမှာ စောသီလ ဖြစ်သည်။ စောသီလမင်းသည် နှစ်ကာလ ကြာညောင်းလာ၍ ပျက်စီးယိုယွင်းလာပြီဖြစ်သော ရှင်မော်တောင်စေတီ (၃) ဆူလုံးကို ပြုပြင်မွန်းမံကာ ရွှေသင်္ကန်းကပ်လှူပူဇော်ခဲ့သည်။ ...

`` မြတ်ရှင်မော် စေတီတော်ကို (၃) ကြိမ် သွားရောက်ဖူးမြှော်ပြီး(အဓိဋ္ဌာန်ပြု) ကျင့်ကြံအားထုတ်ပါက အပါယ်တံခါးပိတ်သည်´´ ဟူသော အဆို ရှိသည်။
မြတ်ရှင်မော် စေတီတောင်ထိပ်မှ မည်သည့်ပစ္စည်းကိုမျှ (ဥပမာ-စေတီတော်ကိန်းဝပ်စံပယ်တော်မူသည့်တောင်ပေါ်ရှိ အခြားအခြားသော သာသနိက အဆောက်အဦးများမှ အိုးခွက် အစရှိသည်များမှအစ) ယူမလာရ။
တောင်ပေါ်တွင်ရှိသော တိရစ္ဆာန်များကို သတ်ဖြတ်ခြင်းမပြုရ (ဥပမာ- တောင်ပေါ်ရှိမျောက်များကိုပင် အမြီးလှသည့်သတ္တဝါဟု ခေါ်ဆိုမှ တောင်စောင့်နတ်ဖိုးဖိုးက နှစ်သက်သည်၊ ထားဝယ်လို ``ဗွီးလှ´´ ဟူသော အယူအစ ရှိသည်။ )။

ရှင်မော်တောင် စေတီသည် ရှင်ကိုးရှင်အစဥ်အတိုင်း၌ အမှတ်စဥ် (၄) တွင် ရှိသည်။ ဂေါတမဗုဒ္ဓ၏ စွယ်တော်လေးဆူ အနက် လက်ယာအောက်စွယ်တော်ကိန်းဝပ်စံပယ်တော်မူရာ မြတ်ရှင်မော်စေတီတော်သည်..
(၁) တာဝတိံသာနတ်ပြည်တွင် သိကြားမင်း တည်ထားကိုးကွယ်ထားသော သုံးယူဇနာအမြင့်ဆောင်သည့် ``စူဠာမဏိစေတီတော်´´...
(၂) ဗြဟ္မာပြည်၌ မဟာဗြဟ္မာတည်ထား ကိုးကွယ်ထားသော (၁၂)ယူဇနာ အမြင့်ရှိသည့် ``ဒုဿစေတီတော်´´ ..တို့ကဲ့သို့ တန်ခိုးကြီးမားသော စေတီတော်ပင် ဖြစ်သည်။

🔸🔸🔸🔸🔸🔸🔸

🙏🔸 ရှင်တောက်ထိန်ဘုရား

♦️🔸 ရှင်တောက်ထိန်ဘုရားသည် ထိုင်တော်မူရုပ်ပွားတော်ဖြစ်သည်။ လောင်းလုံးမြို့နယ် ကမျောကင်းကျေးရွာတွင် တည်ရှိသည်။ ရှင်တောက်ထိန်ဘုရား စံပယ်လျက်ရှိသော သိမ်တော်၏ ကျောဘက်တွင်ရှိသော စေတီတော်မှာ ထွက်ရပ်ပေါက် ပုဂ္ဂိုလ်များက တည်ထားခဲ့သည့် စေတီတော်ဖြစ်သည်ဟု ဆိုကြသည်။ ရှင်တောက်ထိန်ဘုရားနှင့် ထိုစေတီတော်တို့မှာ တန်ခိုးသိဒ္ဓိ ဣဒ္ဓိဝိဓ အဘိဉာဥ်စခန်းများသို့ ရည်စူးဖော်ညွှန်းသော ဘုရားနှင့်စေတီဖြစ်ဟန်ရှိသည်ဟု လောကီပညာထွက်ရပ်လမ်းစဥ်အမြင်ဖြင့် ယူဆကြသည်။

ရှင်တောက်ထိန်ဘုရားသည် စနေနံ၂လုံးထပ်နေခြင်းကြောင့် ထွက်ရပ်လမ်းစဥ်လိုက်သူများ အဓိဋ္ဌာန်ဝင်သူများအတွက် အထူးအကျိုးပေးသော ဘုရားတစ်ဆူဖြစ်လေသည်။ ဘွဲ့နာမံတော်အရ `` ရှင်တောက်ထိန်´´ ဟုဆိုထားခြင်းကြောင့်
``ရှင်တောင်ထိပ်´´ မှ ကာလရွေ့လျောလာသည့်အခါ ``ရှင်တောက်ထိန်´´ ဖြစ်လာသည်ဟု ယူဆကြသည်။
``ရှင်´´ ဟူသော ဝေါဟာရမှာ ဘုရားကို ဆိုလိုသည်။ ``ထိန်´´ ဟူသောဝေါဟာရမှာ နေရာအရပ်ကို ရည်ညွှန်းသော ထားဝယ်ဒေသိယ စကားဖြစ်သည်။ ရေပတ်လည်ဝိုင်းရံနေသော အရပ်ဟုလည်း အဓိပ္ပါယ်ဖွင့်ဆိုကြသည်။ ထားဝယ်ဒေသတွင်
``ထိန်´´ဟူသော ဝေါဟာရကို ယနေ့တိုင် သုံးစွဲနေကြဆဲဖြစ်သည်။ ထားဝယ်မြို့ ဝဲကျွန်း ထိန်သစ်ရပ်၊ ထိန်လယ်ရပ်၊ ထိန်ဟောင်းရပ် ဟူသောအခေါ်အဝေါ်များသည် ယနေ့တိုင် ခေါ်ဆို တည်ရှိနေဆဲဖြစ်လေသည်။
``ရှင်တောက်ထိန်ဘုရား´´ ဟူသည် ``ကုန်းမြင့် တောင်ငယ်ပေါ်မှ ဘုရား´´ ဟုလည်း ယူဆကြလေသည်။

♦️⚜️ ဆင်းတုတော်အား တူးဖော်တွေ့ရှိခြင်း

ဦးဖိုးတုတ် ဒေါ်စောသီးတို့ ဇနီးမောင်နှံသည် တောင်ယာလုပ်ရန် တောင်ကုန်းငယ်တစ်ခုကို ခုတ်ထွင်ရှင်းလင်း၊ မြေကို ပေါက်ဆွရာမှ တစ်နေရာ၌ ရုပ်ပွားတော်၏ ဦးခေါင်းတော်ကို ပေါက်တူးဖြင့်ခုတ်မိခဲ့၏။ ဦးဖိုးတုတ်တို့ ဇနီးမောင်နှံလည်း ထူးဆန်းသည်ဟု မှတ်ယူကြပြီး ဆက်လက်တူးဆွရာ မြတ်ဗုဒ္ဓ၏ ဦးခေါင်းတော်ကို ဖူးမြှော်ရလေသည်။ ဘုရား၏ဦးခေါင်းတော်၌ ပေါက်တူးပေါက်ရာကို ယနေ့တိုင်ဖူးတွေ့နေရဆဲဖြစ်သည်။ ထိုစဥ်က ကမျောကင်းရွာမှာ ယခုကဲ့သို့ စည်ကားခြင်း အိမ်ခြေများပြားခြင်း မရှိသေးချေ။ ယခုရှင်တောက်ထိန်ဘုရား စံပယ်ရာနေရာတွင်လည်း ယခုကဲ့သို့ လူနေအိမ်များမရှိသေး။ တောင်ကုန်းအနေဖြင့်သာ တည်ရှိနေခြင်းဖြစ်သည်။ ဦးဖိုးတုတ်တို့ဇနီးမောင်နှံလည်း ဗုဒ္ဓရုပ်ပွားတော်၏ မျက်နှာတော်ပေါ်လာသည်အထိ တူးဆွကြသည်။ ​ထို့နောက် မြေများကို ဖယ်ရှားက ထိုနေရာကို ``ရာဇမတ်ကွက်´´ ကာရံ၍ ပူဇော်ထားသည်။

ကမျောကင်းရွာသူ ရွာသားများသည် ``ပေါ်တော်မူဘုရား´´ အဖြစ်ဖြင့် လာရောက်ဖူးမြှော်ကြလေသည်။ ထိုနေရာသည် ချက်ချင်းစည်ကား သာယာချမ်းမြေ့သောနေရာတစ်ခု ဖြစ်လာလေသည်။ ဦးဖိုးတုတ်တို့ဇနီးမောင်နှံမှ တပို့တွဲလပြည့်နေ့တွင် စတင်တွေ့ရှိသော ပေါ်တော်မူဘုရားသည် တပေါင်းလပြည့်နေ့တွင် တစ်ဆူလုံးမြေပေါ်သို့ပေါ်ထွက်လာပြီဖြစ်သည်။ ရုပ်ပွားတော်မြတ်အား ယာယီ၊ ဓနိဖက်မိုး၊ တင်းကုပ်သဖွယ် အဆောက်အဦးငယ် တစ်ခုကို ဆောက်လုပ်၍ ပူဇော်ထားရှိသည်။

🔸🔸 သက္ကရာဇ် (၁၂၉၅) ခုနှစ်ရောက်မှ ကမျောကင်းရွာနေ ဦးကျံ ဒေါ်မြတို့က ယခုလက်ရှိသိမ်တော်ကို ဆောက်လုပ် လှူဒါန်းခဲ့ကြသည်။ လက်ရှိသိမ်တော်အတွင်းရှိ နောက်ထပ်ရုပ်ပွားတော် (၃) ဆူကို ဦးကျံ ဒေါ်မြတို့၏ မြေးများက ဆက်လက်လှူဒါန်းခဲ့ကြခြင်းဖြစ်သည်။
ရုပ်ပွားတော်စံပယ်တော်မူသော သိမ်တော်ကျောဘက်တွင် စေတီတော်တစ်ဆူရှိသည်။ ဓါတ်လုံး (၉) လုံးရှိသော ရုပ်ပွားတော်ငယ် တစ်ဆူကို ထွက်ရပ်ပေါက်ပုဂ္ဂိုလ်များက ဌာပနာပြီး လက်ရှိစေတီတော်ကို တည်ထားပူဇော်ခဲ့သည်ဟု ဆိုကြသည်။
လွတ်လပ်ရေးရပြီးနောက် ဦးဘိုးဟန်သည် ထိုစေတီတော်ကို ပြုပြင်မွန်းမံခဲ့သည်။ စေတီတော်၏ အရှေ့မြောက်ထောင့်တွင် ``အောင်မြေ´´ ရှိသည်။

ရှင်တောက်ထိန် ထိုင်တော်မူရုပ်ပွားတော်မြတ်သည် ရှေးစကားအစဥ်အရ ``ဓါတ်ဘုရား´´ ဟု ဆိုသည်။ ရှင်ကိုးရှင်တွင် အဓိကကျသော ဘုရားတစ်ဆူဖြစ်သည်။ အဓိဋ္ဌာန်ဝင်သော ပုဂ္ဂိုလ်များအားလုံးသည် စနေနံ (၂)လုံး ထပ်သည့် ဓါတ်ဘုရားရှင်တောက်ထိန်တွင် စတင်၍ အဓိဋ္ဌာန်ဝင်ရသည်။ အဓိဋ္ဌာန်ဝင်၍ပြီးဆုံးပါက နောက်ဆုံးရှင်တောက်ထိန်တွင်ပင် အဓိဋ္ဌာန်ဝင်ပြီး အဆုံးသတ်ရသည်ဟု ဆိုကြသည်။
ရုပ်ပွားတော်မြတ်အား ရှေးယခင်က သင်္ကန်းဆက်ကပ်လှူဒါန်းပါက ရုပ်ပွားတော်မြတ်၏ ကျောဘက်ကို ပတ်မိသည်အထိ ကြိုးစ ချည်နိုင်သည်။ ယခုမူ ရုပ်ပွားတော်မြတ်၏ ကျောဘက်သည် သိမ်နံရံနှင့် ထိကပ်လာသည့်အတွက် ကြိုးကို ပတ်မိအောင် မချည်နိုင်တော့ချေ။

♦️⚜️♦️ ဆရာကြီးဦးသန်းဆွေ (မောင်သန်းဆွေ-ထားဝယ်) သည် ရှင်ကိုးရှင်သမိုင်းကို စတင်ရေးသားပြုစုသည့် ပထမဆုံး စာပေပညာရှင်ကြီးဖြစ်ပြီး ဆရာကြီး စတင်ရေးသားပြုစုသည့် အချိန်သည် ၁၉၉၆- ခုနှစ်ခန့်က ဖြစ်သည်။ ထိုအချိန်က ရှင်တောက်ထိန်ဘုရား၏ ဉာဏ်တော်မှာ ``၅-ပေ ၆-လက်မ´´ ခန့် ရှိသည်ဟု ဆရာကြီးက ဆိုထားသည်။ ၂၀၁၆ ခုနှစ်တွင် ထိုထိုင်တော်မူ ရုပ်ပွားတော်မြတ်၏ ဉာဏ်တော်မှာ ``၅-ပေ ၉-လက်မ´´ ခန့် ရှိနေသည်ကို ဖူးတွေ့ခဲ့ရသည်။ ....
ဤရှင်တောက်ထိန် ထိုင်တော်မူရုပ်ပွားတော်မြတ်သည်
ထွက်ရပ်လမ်း၊ လောကီပညာရပ်လမ်း၊ အင်းဝိဇ္ဇာ၊ ပြဒါးဝိဇ္ဇာ၊ သံဝိဇ္ဇာလမ်းကို လိုက်သော ပုဂ္ဂိုလ်ထူးများ၊ တန်ခိုးသိဒ္ဓိ ဣဒ္ဓိဝိဓ အဘိဉာဥ်စခန်းများသို့ ရည်စူးလိုက်ကြသော ပုဂ္ဂိုလ်များအတွက် အထူးအရေးကြီးသော ဘုရား(ဓါတ်ဘုရား)ဖြစ်သည်ဟုလည်း အဆိုရှိသည်။ ဤဘုရားသည် ရှင်ကိုးရှင် အမှတ်စဥ်(၅)၌ ရှိသော ဘုရားတစ်ဆူ ဖြစ်လေသည်။

🔸🔸🔸🔸🔸🔸🔸

🙏🔸ရှင်ဥသြစေတီတော်

ရှင်ဥသြစေတီတော်သည် ရွှေတောင်စားမင်း၏ ကောင်းမှုတော်ဖြစ်သည်။

ကောဇာသက္ကရာဇ် ၁၁၂၁-ခုနှစ်တွင် ထားဝယ်စား ဦးနဲလှ ကွပ်မျက်ခံရပြီးနောက် ``ဒေဝဒိဗ္ဗ´´သည် ထားဝယ်မြို့ဝန်ဖြစ်လာသည်။ ထိုအချိန်တွင် ထားဝယ်တောင်ဘက် ၂ မိုင်နီးပါးခန့်တွင် ``ရွှေတောင်ရွာ´´ ရှိ၏။ ယနေ့တိုင် ``ရွှေတောင်ရွာ´´ ဟုခေါ်ဝေါ်ဆဲ ဖြစ်သည်။ ထိုရွာ၏ ရွာစားကြီးမှာ ပန်းပဲဆရာကြီး ဦးရွှေဂေါင်းဖြစ်ပြီး ``ရှင်ဇော်´´ အမည်ရှိ သားတစ်ယောက်နှင့် `ဦးမြတ်ဖြူ´´ဟုခေါ်သောညီတစ်ယောက်ရှိသည်။ ဦးမြတ်ဖြူသည် မိမိသည် မြို့စားကြီးဖြစ်ခဲ့ဖူးကြောင်း မောင်ရှင်ဇော်အား မကြာခနပြောဆိုလေ့ရှိသည်။ ထို့ကြောင့် မောင်ရှင်ဇော်လည်း မြိုးစားဖြစ်လိုသောဆန္ဒ ပြင်းပြလျက်ရှိလေသည်။...
ရွာစားကြီး ကွယ်လွန်သော် မောင်ရှင်ဇော်သည် ရွာစားဖြစ်လာသည်။ မောင်ရှင်ဇော်သည် သူငယ်ချင်းဖြစ်သူ မောင်နဲအောင်နှင့်တိုင်ပင်၍ ဒေဝဒိဗ္ဗမြို့စားကြီးအား ``ဓါးလွယ်တစ်စင်း´´ ဆက်သလိုကြောင်း လျှောက်ထားလေသည်။ မြို့စားကြီးခွင့်ပြုသော် မောင်ရှင်ဇော်နှင့် မောင်နဲအောင်တို့သည် ဓါးလွယ်ဆက်သမည့်ဟန်ပြင်ပြီး မြို့စားကြီးဒေဝဒိဗ္ဗအား လုပ်ကြံလေသည်။ ထို့နောက် မောင်ရှင်ဇော်သည် ထားဝယ်မြို့ဝန်ဖြစ်လာလေသည်။
ဒေဝဒိဗ္ဗသည် သက္ကရာဇ်-၁၁၂၂ ခုနှစ်၊ (A.D-1760) တွင် ကံကုန်သည်။ မင်းရှင်ဇော်သည် မောင်နဲအောင်အား တပ်မှူးကြီးခန့်အပ်သည်။ ထိုအချိန်က ဒေဝဒိဗ္ဗ၏ နန်းတော်မှာ ယခုလက်ရှိကျောက်မော်ကြီးရပ်ကွက်ရှိ ဘုန်းတော်ကြီးကျောင်းနေရာ ဖြစ်လေသည်။ ထိုဘုန်းတော်ကြီးကျောင်းကို ယနေ့တိုင် ``နန်းတော်ရာ ဘုန်းတော်ကြီးကျောင်း´´ ဟု ခေါ်တွင်သည်။

မင်းရှင်ဇော်သည် နန်းတော်သစ်ကိုဆောက်လုပ်သည်။ နန်းတော်အသစ်မှာ ယခုထားဝယ်မြို့၊ ပိန္နဲတောရပ်၊ ကံ့ကော်ပင်ကျောင်း ( ထားဝယ်အခေါ် - ဂန့်ဂေါ်ပန်စင်က္လောန်း) ဟု ခေါ်သော ဘုန်းတော်ကြီးကျောင်း အရှေ့ဖက်၌ ကပ်လျက်ရှိသော ရွှေကျောင်းကြီးခေါ် ဘုန်းတော်ကြီးကျောင်း၏ နေရာပင်ဖြစ်သည်။..
ထိုအချိန်အခါသည် နေပြည်တော်၌ အလောင်းမင်းတရားကြီး ဦးအောင်ဇေယျ၏သားတော် မြေဒူးမင်းသား (ခေါ် )ဆင်ဖြူရှင်မင်း နန်းတက်နေသော အချိန်ဖြစ်သည်။

♦️⚜️♦️ မင်းရှင်ဇော်သည် သက္ကရာဇ် ၁၁၂၂ ခုနှစ်တွင် နန်းတော်အသစ်တည်ပြီးနောက် နန်းဦးစေတီကိုလည်း တည်တော်မူသည်။ ``ရှင်ဥသြ စေတီတော်´´ ဟု ဘွဲ့တော် တွင်သည်။
သက္ကရာဇ် ၁၁၂၄ ခုနှစ်တွင် ရွှေတောင်စားစေတီကိုလည်း တည်တော်မူသည်။ မင်းရှင်ဇော်အား ``ရွှေတောင်စားမင်း´´ ဟုလည်း ခေါ်ဝေါ်ကြသည်။ ရွှေတောင်စားမင်းသည် မိမိဆောက်လုပ်ထားသော နန်းတော်ကို ဘုန်းတော်ကြီးကျောင်းအဖြစ် လှူဒါန်းခဲ့လေသည်။ ဘုန်းတော်ကြီးကျောင်းမှာ ``ရွှေကျောင်းကြီး´´ ဟုအမည်တွင်ပြီး ယနေ့တိုင်ရှိသည်။ ရွှေတောင်စားမင်း၏ ကောင်းမှုတော်ဖြစ်သော နန်းဦးစေတီဖြစ်သည့် ရှင်ဥသြစေတီတော်သည် လည်း ထိုရွှေကျောင်းကြီး ဝင်းအတွင်း ယနေ့တိုင် ထင်ရှားကျော်ကြားလျက် ခေါင်းလောင်းသံတညံညံဖြင့် ကြည်နူးဖွယ်အတိဖြင့် သပ္ပါယ်စွာ တည်ရှိနေလေသည်။ ရှင်ဥသြစေတီတော်မှာ ညဥ့်အချိန်များတွင်(လူမရှိသည့်အချိန်) အမွှေးနံ့သာများဖြင့် မွှေးကြိုင်လျက် သိုက်စောင့်များ နတ်ဒေဝါများ လာရောက်ဖူးမြှော်လေ့ရှိသည်ဟု ဆိုသည်။ ဆုတောင်းပြည့်လှသည့်စေတီတစ်ဆူလည်း ဖြစ်လေသည်။
အဓိဋ္ဌာန်ဝင်သူများနှင့် စည်ကားလျက် ဓါတ်ခန်းများဖြင့် တင့်တယ်စွာ ရှိနေသည်။ နှစ်ကာလကြာညောင်းလာသောအခါ ရှင်ဥသြစေတီတော်သည် ယိုယွင်းပျက်စီးလာသဖြင့် သက္ကရာဇ် (၁၃၅၃) ခုနှစ်တွင် ထားဝယ်မြို့ အိုးလုပ်ပြင်ကျောင်းဆရာတော် ဘဒ္ဒန္တဣန္ဒောဘာသ က ထပ်မံပြုပြင်ခဲ့သည်။
ရှင်ဥသြစေတီတော်သည် ရှင်ကိုးရှင်တွင် အမှတ်စဥ် (၆) ၌ တည်ရှိတော်မူသည်။

🙏🙏.. ကျန်ရှိသောစေတီများကို နောက်အပတ်များတွင် ထပ်မံဖော်ပြပေးသွားမှာမို့ စောင့်မျှော်ဖတ်ရှုနိုင်ပါတယ်ရှင်..

🚩Happy Vacation Travel မှ ယခုလို Stay at Home ကာလမှာ မြန်မာပြည်ရဲ့ အချို့သော ဒေသတွေရဲ့ သမိုင်းကြောင်းများ၊ ဖြစ်တည်မှု များကို ဗဟုသုတရဖွယ် တင်ဆက် ဖော်ပြပေးမှာမို့လို့ (မသိသေးသူများအတွက် ရည်ရွယ်ခြင်း၊ သိရှိပြီးသူများအတွက်လည်း စိတ်အပန်းဖြေ ဖတ်ရှုနိုင်ရန်အတွက်) ကြိုးစားရှာဖွေစုစည်းတင်ပြပေးမှာမို့ Page လေးကို စောင့်ကြည့်ပေးကြပါအုံးနော်။ Page Like & Share လေးလဲ လုပ်ပေးကြပါအုံးရှင့်။
ကျေးဇူးအထူးပင် တင်ရှိပါတယ်🥰😘

!! 🏖️

#ဆရာဦးဘမြင့်_ထားဝယ်

Address

No. (25), Sate Ta Thu Kha Street, 7th Ward, Hlaing Township
Yangon
11051

Opening Hours

Monday 09:00 - 17:30
Tuesday 09:00 - 17:30
Wednesday 09:00 - 17:30
Thursday 09:00 - 17:30
Friday 09:00 - 17:30
Saturday 09:00 - 13:00

Telephone

959251567257

Website

Alerts

Be the first to know and let us send you an email when Happy Vacation Time Travels & Tours posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Happy Vacation Time Travels & Tours:

Shortcuts

Share

Category