18/05/2026
Өнгөрсөн өвөл бид аяллагчидтайгаа хамт Энэтхэгийн өмнөд нутгаар үнэхээр баялаг, дурсамж дүүрэн аялал хийлээ. 🇮🇳🙏
Энэ удаагийн аялалд бид Төвдийн Буддын шашны томоохон сургалтын төвүүд болох Сэра, Жүмэ, Гомон хийдүүдээр зочилсон юм.
Өглөөний намуухан агаарт хангинах уншлага, олон зуун лам хуврагуудын номын мэтгэлцээн, хийдийн сахилга баттай амьдрал нь хүн өөрийн эрхгүй дотоод сэтгэлээ чагнахад хүргэдэг гайхамшигтай орчин байлаа.
Дараа нь бид Энэтхэгийн санхүү, кино урлагийн төв болсон Mumbai хотод хүрсэн.
Далайн эргийн салхи, колони үеийн сүрлэг барилгууд, хөл хөдөлгөөн тасардаггүй гудамжууд нь энэ хотыг үнэхээр амьд мэт мэдрүүлдэг юм байна.
Харин Mysuru хот биднийг хаадын үеийн тансаг уур амьсгал, тайван өнгө төрхөөрөө угтав.
Бид Майсурын ойролцоох зэрлэг амьтдын хүрээлэнгээр аялж, байгалийн дундах хүрхрээг үзсэн нь аяллын хамгийн сэрүүн, сэтгэл сэргээсэн мөчүүдийн нэг байлаа.
Тэр үеэр ойгоос авчирсан эр, эм хоёр зааныг сургаж байгаатай таарч, хамтдаа зураг даруулсан маань аяллын хамгийн онцгой дурсамжуудын нэг болсон юм. 🐘✨
Тэдний тайван сүр хүч, хүнийг ойлгож буй мэт харц үнэхээр мартагдахааргүй санагдсан.
Мөн Энэтхэгийн технологийн нийслэл хэмээгддэг Bengaluru хотод бид орчин үеийн Энэтхэгийн эрч хүчийг мэдэрлээ.
Ногоон мододтой өргөн гудамж, олон улсын өнгө төрх, залуу уур амьсгал нь уламжлал ба шинэчлэл хэрхэн зэрэгцэн оршдогийг харуулж байв.
Энэ аялал зөвхөн хот, хийд үзсэн аялал байгаагүй…
харин хүмүүс хамтдаа инээж, шинэ мэдрэмж авч, байгаль, шашин, соёлын гайхамшгийг зүрхэндээ хадгалсан үнэ цэнтэй мөчүүдийн цуглуулга байлаа.
Зарим аялал хүнийг шинэ газар руу аваачдаг.
Харин зарим аялал хүний доторх ертөнцийг өөрчилдөг юм байна. 🙏
