16/04/2017
Дэлхийн өндөр өртөгтэй ТОП-10 хот
Дэлхийн томоохон хотуудын жил тутмын чансааг гаргадаг Economist Intelligence Unit ээлжит "Worldwide Cost of Living 2017" нэртэй илтгэлээ танилцууллаа. Энэхүү тайланд хотуудын өртгийг голчлон тооцдог юм. Бараа таваар, хувцас хунар, хүнсний бүтээгдэхүүн, ундаа, ахуйн бараа, ариун цэврийн бараа болон үйлчилгээний үнэ хөлсийн харьцуулалтаар хотуудын өртгийг тооцсон байна. Дэлхийн хамгийн үнэтэй хотуудын тал гаруй нь Азийнх. Гэхдээ Азид хямдхан зардалтай хотууд бас олон бий. Сүүлийн 1 жилийн дотор чансаагаар дээшилсэн хотууд нь хөгжиж буй орнуудынх юм. Тухайлбал, Сан-Паулу ба Рио-де-Жанейро чансааны 29 ба 27 байраар дээшлэн 78, 86 дугаар байранд бичигдсэн нь тухайн орны үндэсний валютын сэргэлт, инфляцийн өсөлттэй холбоотой байжээ. Харин Британийн Манчестер 25 байраар, Лондон 18 байраар ухарсан нь Брекситийн дараах фунт стерлингийн ханш унаснаар тайлбарлагдаж байна. Ингээд дэлхийн амжиргааны өртөг өндөртэй ТОП-10 хот
1. Сингапур
Хот улс Сингапур Зүүн өмнөд Азийн арлууд дээр байрладаг. Хөрөнгө оруулагч нарт таатай уур амьсгалтай, өндөр төвшний өрсөлдөөний орчин, өндөр боловсрол, сахилга дэг журамтай хүн ам, амьжиргааны түвшний өсөлт зэрэг нь тус хотын давуу тал болдог. Сингапур нь зах зээлийн эдийн засагтай, бага татвартай, үндэстэн дамжсан корпорациуд чухал үүрэг бүхий өндөр хөгжилтэй улс юм. Зүүн Азийн бар улсуудын эхэнд ордог бөгөөд хөгжлийнхөө түвшнээр өндөр хөгжилтэй улсуудын хэмжээнд хүрсэн. Тэнд цахим төхөөрөмж, хөлөг онгоцны үйлдвэрлэл, санхүүгийн үйлчилгээ дээд зэргээр хөгжжээ.
2. Хонгконг
Газар зүйн байрлал ба түүхэн хөгжлийн онцлогоор Хонгконгийн эдийн засаг өндөр хөгжсөн. Азийн санхүүгийн томоохон төв ба Өмнөд Азийн худалдаа, тээврийн чухал зангилаа. Хонгконг Азийн хамгийн том хот бөгөөд дэлхийн 3 дахь том санхүүгийн төв юм. Хувьцаа, даатгал, банк, хувийн хөрөнгийн үйлчилгээ зэрэг салбарт Хонгконг тэргүүлсээр байна.
3. Цюрих
Швейцарийн зүүн хойд хэсгийн Цюрих нь даяарчлалын хот гэсэн ангилалд хамрагдана. Даатгал, банкны төвүүд энэ хотод байрладаг. Мөн энд Швейцарийн хөрөнгийн бирж, Төв банк нь байрлах ба Цюрихийг шинжлэх ухааны томоохон төв гэж нэрлэдэг.
4. Токио
Японы нийслэл нь тус улсын санхүү, соёл, аж үйлдвэр, улс төрийн төв юм. Токиод Японы сонин, хэвлэлийн газруудын 80 хувь байрладаг. Токио хот хөрш 3 мужийг оруулаад 37,1 сая хүнтэй. Токио олон улсын томоохон төв ч тэнд ажиллаж амьдардаг гадаад иргэд харьцангуй цөөн. Дэлхийн хөрөнгө оруулалт, даатгалын компаниуд, олон улсын санхүүгийн төвүүд мөн бий.
5. Осака
Осака хот Хонсю арлын өмнөд хэсэг дэх хүн ам ихтэй Японы 3 дахь том хот. Өмнө нь Японы худалдааны нийслэл байсан түүхтэй. Одоо Японы аж үйлдвэр, боомтын үндсэн төв юм. Дэлхийн II дайны үеэр Осака бараг тэр чигтээ сүйрч, түүх соёлын дурсгал бүрэн устаж байжээ. Одоо Осака нь аж үйлдвэрийн чухал төв, орчин үеийн хот ба 417 тэрбум ам.долларын дотоодын нийт бүтээгдэхүүнийг үйлдвэрлэдэг.
6. Сөүл
Өмнөд Солонгосын нийслэл Сөүл нь тус орны онцгой эрх бүхий цорын ганц хот. 25 дүүргээс бүрэлддэг, БНСУ-ын улс төр, эдийн засаг, соёлын төв бөгөөд Зүүн Азийн санхүүгийн гол төв болдог онцлогтой. Өдгөө Сөүлд Өмнөд Солонгосын хүн амын дөрөвний нэг амьдардаг, 20 мянга гаруй жижиг, дунд үйлдвэртэй. Тэнд Samsung, LG, Hyundai, Kia, SK корпорацийн төв байрлана. Сөүл Өмнөд Солонгосын нутаг дэвсгэрийн 0,6 хувийг эзлэх авч тус орны дотоодын нийт бүтээгдэхүүний 21 хувийг бүтээдэг.
7. Женев
Дөнгөж 198 мянган хүн амтай Женев нь улсынхаа 2 дахь том хот юм. НҮБ-ын Европын салбар, Улаан загалмайн нийгэмлэг, Дэлхийн худалдааны байгууллага, Дэлхийн Эрүүл мэндийн байгууллага зэрэг маш олон олон улсын байгууллагууд байршдаг. Гадаадын иргэд хотын хүн амын 44 хувийг эзэлдэг. Женев нь дэлхийн санхүүгийн төв ба хотын эдийн засаг голчлон үйлчилгээний салбараас бүрэлдэнэ. Санхүүгийн үйлчилгээний чухал төв бөгөөд эртний түүхтэй хот юм.
8. Парис
Францын улс төр, эдийн засаг, соёлын төв болсон Парисыг даяарчлалын хот гэж нэрлэх нь бий. Парист тус орны ДНБ-ний 10 хувийг үйлдвэрлэдэг. Үйлвэрүүдийн дөрөвний нэг нь энд оффис, төв байраа нээсэн байдаг. ЮНЕСКО болон бусад олон улсын байгууллагууд байрладаг. Ажлын байрны 85 хувь нь үйлчилгээний салбар ба тус салбарт нийт ажилтан, ажилчдын 35 хувь, үйлдвэрлэлд 30 хувь, барилгын салбарт 20 хувь, нийтийн хоолны салбарт 15 хувь нь ажилладаг ажээ.
9. Нью-Йорк
Нью-Йорк бол дэлхийн худалдаа, санхүү, улс төрийн болон соёлын чухал төв юм. АНУ-ын эдийн засгийн гол төв төдийгүй Лондон, Токиогийн хамт дэлхийн эдийн засгийн томоохон тулгуур болдог. Хотын эдийн засагт уламжлалт үйлдвэр чухал үүрэгтэй ч энэ салбарын ажилтнуудын тоо буурсаар байгаа. Машин үйлдвэрлэл, химийн болон нэхмэл, хүнсний бүтээгдэхүүний үйлдвэр хотын эдийн засгийн чухал хэсэг. Тус хотод биотехнологи, программ хангамж, интернэт бизнесийн салбарууд эрчимтэй хөгжиж байна.
10. Копенгаген
Данийн соёл, эдийн засаг, засаглалын гол төв бөгөөд тус улсын хамгийн том хот нь юм. Хотын эдийн засаг нь үйлчилгээний, шинэ технологи, эмийн үйлдвэрийн болон цэвэр технологийн салбарт тулгуурлан эрчимтэй хөгжиж байна. Хойд Европын санхүүгийн төв гэж нэрлэх нь бий. Энд Копенгагений хөрөнгийн бирж чухал үүрэгтэй. Alm. Brand, Danske Bank, Nykredit, Nordea Bank Danmark зрэг санхүүгийн том компаниудын төв байрладаг. Копенгагены хөрөнгийн бирж (CSE) 1620 онд байгуулагдсан ба A.P. Moller-Maersk Group, Novo Nordisk, Carlsberg, Novozymes зэрэг гадаадын том компаниудын гол төв нь энэ хот болжээ.
Дэлхийн хамгийн бага өртөгтэй хотуудад Казакстан Алма-Ата, Нигер Лагос, Энэтхэгээс Бангалор, Ченнай, Мумбай, Нью Дели, Пакистан Карачи, Алжирын Алжирс, Украйн Киев, Румын Бухарест оржээ.
Эх сурвалж: Vip76 хуудснаас
