和她一起去旅行

15/05/2019

原來一直都唔記得左po片，黎呢星期會寫下我地蜜月倒水……呀唔係，係玩水之旅！

https://www.youtube.com/watch?v=ZWgOchuIN3Y

18/03/2019

見到行程，有“白金茶房”，仲以為係日式茶店，問Mi小姐佢有咩出名，居然係咖啡同pancake。

初初睇相，覺得相當普通，但食落配料有心思、層次。

最吸引我都係咖啡，因為同一款豆，但有3款不同烘焙程度揀。

我地就揀左 medium，滿滿香味，口感順滑，唔會有其他雜味，唔需要糖同奶都非常好飲，連一向都避飲咖啡因產物嘅Mi小姐都忍唔住。

一間好典型日系文青咖啡店，由裝修佈置到食物，全部都用心將最簡單嘅野做好佢，所有味道都係好實在，另一邊箱係 “星期菜” 主打每個星期新鮮時令菜式，應該都非常有水準，如果有機會再黎，應該會去試下。

白金茶房 :

福岡市中央區白金1-11-7

(092)534-2200

10:00--23:00

(六日與假日 8:00 開始)

無刷卡，可網上訂位

官網 : http://www.s-sabo.com/index.html

17/03/2019

去日本咁樣宵夜是常識吧😁

之前我地都係係超市買特價國產牛，
今次去開肉店買¥600/100克，其實同超市冇特價差唔多價錢，但級數就靚好多

15/03/2019

我地去旅行主要目的為避開人潮，所以一般都揀淡季出發，機票住宿平Ｄ，但就比較少遇到seasonal野，今次居然比我地到遇到每年 10 月中至翌年 4 月頭是九州蠔的豐收季節。

沿糸島市海岸線的加布里、船越、新町、岐志、芥屋及福吉等各個小漁港，都會搵到一整排的「牡蠣小屋」。

每間牡蠣小屋各有特色，收費不同，今次mi小姐就揀左住吉丸，因為佢冇收開爐、刀等雜費。
而且蠔都有經過紫外線消毒，份外安心。

蠔分3個價錢，隻數都有唔同，同為1kg。
特大 ¥1500
大 ¥1200
中 ¥1000

我地就叫左特大同大，生熟都非常鮮味，貨真價實，熟左都依然好大隻。另外再叫左3隻蝦，都非常鮮甜。

每枱都有中英文指引，跟住黎燒一Ｄ都唔難。
如果係一班朋友黎會更開心，可以試多幾款海產。

見到附近嘅日本人都會帶檸檬，壽司，沙律甚至酒，店家都歡迎。

附近有自家廁所，好乾淨，系島距離市中心要約35-45分鐘車程（視乎交通情況），所以走前記得去定先呀！

眼利嘅朋友可能留意到，點解我地冇提到螺？
因為個兩隻螺就唔知係送嘅定點🤔，一去到就係我地枱面以為送架啦，但隔離枱冇，而收據就寫日文。

不過食得開心就由佢啦，如果各位去到就可能問左清楚先會好Ｄ。

牡蠣小屋「住吉丸」
・地址：福岡県糸島市加布里1196-18

http://kafuri.com/kaki/

地圖 ： https://www.google.com/maps/d/u/0/viewer?mid=zw7Cg5tb5_mM.k8J_HGye6aV0

ご予約・お問い合わせ 092-323-0325

営業時間：AM9時～PM17時

12/03/2019

我地每次去日本，最大目的一定係食😆
第二次係根據季節去睇風景。

但今年因為提早暖，影響左需要係寒冬下開花嘅梅花。
呢個時候，你需要一支有散景功能嘅鏡頭，同一個揮灑自如嘅model。

相機：fuji xt1
鏡頭35 1.4

舞鶴公園
地址 : 福岡市中央區城内

交通
市區觀光巡迴巴士(綠林)「平和台‧鴻臚館前」或「福岡城址‧福岡市立美術館東口」站下車，步行約5～8分鐘
西鐵巴士「大手門」、「平和台鴻臚館」站下車，步行約5～8分鐘
地下鐵「赤坂站」、「大濠公園站」下車，徒歩8分鐘
TEL
092-781-2153

11/03/2019

近年大熱的日式梳乎厘班戟，一場黎到點都要試係福岡人氣嘅 cafe del sol。

擺盤靚，自家製焦糖漿，有誠意，果仁碎配搭有新鮮感，輕盈嘅梳乎厘班戟，蛋香充足，唔會滯，食完燒肉都食得落。

場內有大大 projector 播住我最喜歡嘅，愜意嘅下午茶。

對於唔特別鍾意食甜野嘅Mi小姐，附近嘅5層muji,5層激安，forever 21呢類體力活動就更吸引。

下晝約4點到達，等左10分鐘左右入得。
一份鬆餅，兩杯野飲，大約港幣150-160

Cafe del SOL(カフェデルソル)

福岡市中央區大名 1-14-45

(092)725-3773

12:00--22:00

無訂位 , 無刷卡

10/03/2019

福岡的唯一選擇 西新初喜 本店

Mi姐咀邊有粒鎖魂癦……呀，唔係，係食癦，天生就非常有食神，其實九州區要數出名的，應該是季樂，Mi姐食過，驚為天人，但我見到價錢都好驚。

上次我地去九州，隨緣地遇到初喜，係tabelog係福岡排第一嘅壽喜燒，一食驚艷，價錢係絕對吸引，上次食完見到有 七輪火炭燒肉，Mi姐講過想黎試，就成就左今次旅行。

同樣地，西新初喜冇令我地失望，自家靚牛，根本點整都冇得輸，我地可以好肯定呢點，因為我地係初喜肉店，買左Ｄ肉返民宿整黎食，一樣咁正。

我地叫兩個餐
特選（最高級，好多油花）
上選（次一級，但肉味再多一點點），
套餐包果汁/茶，連前菜白飯甜品
*仲有一個叫別選同特選一樣價值，有牛舌*

埋單港幣400有找，係香港如果要食到相同質數，相信要一倍價錢以上先得。

就算性價比好高，總唔能夠日日食，如果去九州只能夠食一餐燒肉，我地嘅必然之選會係 西新 初喜

西新初喜 本店
所　在　地 〒814-0002
福岡県福岡市早良区西新5-6-30
初喜ビル 1階
電話：092-833-3006


營業時間
11：30～15：00
　（last order　14：00）
17：00～00：00

冇停車場

**店家樓高三層 地下係肉零售店+燒肉
二樓係牛腸鍋，三樓涮涮鍋/壽喜燒

09/03/2019

一向都係由Mi小姐安排行程，我負責交通，睇到個行程，8點到達食沾麵？！咁早開咩？

Mi:係呀，人地7點就開架啦。

到最後，以我地嘅旅行模式，準時到達，

係冇可能！十點鬆Ｄ到，已經排左九組人馬係前面，當中有韓國人，最驚訝係日本人比較多。

店內樓高兩層，所以我地都好快入座。
到店第一件事係揀辣度，有基本，小辛至激辛。

有趣嘅係，沾麵可以揀大中小，但價錢一樣。
所以我地點了份大和一份明太子定食。

沾麵，質地彈牙而軟身，唔會有“銀”胃問題。
湯底濃郁，啖啖充滿明太子，真材實料的好享受。

定食，原條明太子配上紫菜熱飯，無得輸嘅配搭，完美嘅早餐。

唯一個致命傷，太多明太子，如果一次沾得多少少都會太鹹了，而且湯同麵黎到都只係室溫，食到尾有涼麵感覺。
而配飯本身係一個好好嘅選擇，可惜又傻又pure嘅Mi小姐，將人地比佢嘅豉油以為係醬汁一次過倒曬落去………嗯，好在我地兩個嘅腎都幾健康

埋單港幣$200有找。

Ps.食完出黎，11點45左右，龍尾已經排到對面馬路

元祖博多めんたい重
地址：福岡県福岡市中央區西中洲6-15
電話：（0）92-725-7220
營業時間：7:00～22:30(ラストオーダー22:00)
網址：www.mentaiju.co.jp

交通：地下鐵「天神」站或「中洲端川」站步行約3分鐘

07/03/2019

2019 福岡行 - 討喜的牛腸鍋

福岡人，由其是年輕OL非常喜歡牛腸鍋，因為充滿骨膠原，所以又有美顏鍋之稱。

今趟或多或少因為佢而黎，
又要講，Mi姐有次工幹，客人帶左佢黎食，客人同香港著名食家及廚師人稱大師姐嘅麥麗敏，素有交情，推薦黎食呢間牛腸鍋，
Mi姐一食，驚為天人，就立心要帶鍾意食內臟嘅我黎食。

可惜我地上次黎，撞啱佢搬舖冇開，食左另一間， 不提也罷。

今次再黎，更大更光鮮，但據說少左老店嘅一點點在地風味，換黎有特別為遊客嘅餐牌。

風味有變，但對我黎講，依然對味！
前菜到服務都好好，全程轉人服侍，日式牛腸肥美帶趙勁，豚肉薄片軟滑甘甜，咩都唔點最好食。 最尾嘅芝麻拉麵配少少柚子醬油更加係一絕！

最重要係有位女子，肯陪自己食麻甩野，飲大啖啤酒，加分！

2人鍋，一份豚肉，一份拉麵，一杯生啤，埋單港幣約365。

もつ幸

地址 : 7-１４ Tsunabamachi, Hakata-ku, Fukuoka-shi, Fukuoka-ken 812-0024日本

電話 ： +81 92-291-5046

地圖 ：https://goo.gl/maps/55YRribFpSG2

*3位或以上先有得book位*

06/03/2019

上回講到，朋友被偷走銀包護照，因為上網睇，要三星期先有新護照，再加上朋友住個區有好多醉酒佬，所以朋友想轉酒店，身為秘書的Mi即刻想起呢間民宿。

民宿主人都好好，二話不說，有房，可以借錢應急，返到家鄉先還😭😭😭實在太感動。

其實Thor Mi對上一次住係2013年，用email聯絡，所以佢應該唔知/唔記得我係邊個，都肯伸出援手，實在太感激！

講返民宿本身，整潔光鮮，而且係一個感覺高尚嘅小社區，附近有麵包店，小形蔬果店，一星期有兩次 local market，上次就買左$72/12隻新鮮生蠔😍😍😍😍超美好嘅回憶😋😋😋😋

而且房價價錢絕對係抵嘅，但最update嘅價錢就要問返主人啦！

部落格：http://marinaparis93.pixnet.net/blog

25/02/2019

< #巴黎被偷野、 #遺失護照、 #處理方法>
（長文）

工作完成，mi先行回港，朋友就繼續旅行。
但係佢地臨返香港前一日，
被偷走背包，入面仲有兩人嘅護照，1 部電話🤦🤦🤦

朋友通知我後，我就好擔心，因為佢地嘅英文能力非常有限。
不過都叫佢地報警，先可以做接落黎非常多嘅手續，故事就開始。

第一間警局嘅女警，英文非常“地道”，充滿法國口音，自問又唔叻，隔住電話更加幫唔到佢地🤦

警察就叫佢地去大使館，我就係呢個時間，搵返今次認識嘅兩位台灣人電話，又托Thor打去入境處查詢。

人在外地，有Ｄ位好無奈，
1）中國大使館要香港入境處send資料過去
2）香港入境處要當事人親自打去
3）中國大使館冇長途電話借比你應急，但佢下午只係開14：30 - 17：00，2.5小時！

朋友急到熱鍋上嘅螞蟻，都好感激入境處係夜麻麻都快快手，趕及係人地收工前一刻fax左資料過去，網上仲寫話要3星期，嚇左2.5小時，幫佢地搵定住宿，好彩特快護照即日就有，都只係€50左右，都唔算太貴。

大使館人員叫我朋友唔洗報警🙈，
大家都心照不宣，但朋友都照去，

第一間，一定要有現場翻譯，當然語氣好一般。
第二間，遇到位熱血警察，又得到台妹用face time幫手，終於順利完成。

呢個故事，我吸取到嘅教訓係，到外地，
盡量幫襯返香港/台灣人，有咩事佢地多數會協助返你😂🤦

Mi姐叮嚀:
1）每次工幹都不容有失，我都會有個貼身腰包，被所有衣服遮蔽，當中有我本護照同小量應急錢。

2）去歐洲，多數都會用腰包，呢個係衣服出面，用黎放電話，錢等貴重常用野，重點係放前面。

3）護照要影印，至少兩張，一張隨身攜帶（退稅用），一張放民宿。

朋友今次就係因為有護照影印本，所以可以做到特快，免卻改機票。
而腰包佢係有，但因為“唔襯套衫”，除左放背囊………我相信佢得到好深嘅教訓，下次唔襯套衫，拎係手上吧～

實用資料：

港人外地求助熱線（24小時）：(852) 1868

法文求助訊息：
Bonjour
Je vais faire la porte plainte, on m'a volé mon sac à dos, j'en ai perdu 2 passeports chinois, 50 euros en espèces,et un manteau, j'ai besoin soliciter de niveaux mes passeports.

大意係話唔見左兩本護照，同€50。
如果你真係冇人幫你翻譯，就用呢段字，改做合適嘅數量比警察睇，其實巴黎每間警局，都有中文報案表的～

下次推薦治安好的台灣民宿

多謝收看❤

23/02/2019

巴黎鐵塔附近的中餐館

新年團拜，親友話題盡，就問起幾時寫下遊記😅😅😅
係，旅行其實有，但Thor先生天生係一名 驍勇善戰嘅 猛將，可惜生於平安嘅香港，只能沉迷在手機遊戲中·······

所以Mi小姐又登場了（拉裙一下）
其實我間唔中都出國，但都係商務為主🙈，每次都係去“衝”景點，趕忙中渡過，所以都冇咩好寫。

但剛剛2月嘅巴黎之旅，日子比較長又巧遇友人，終於有特別事發生 - 食中餐！

生於香港嘅我，太習慣西餐，從來唔會考慮係外地食唔正宗嘅中餐。

多得台灣司機帶路，黎到正宗香港人開嘅小店，店東196×年3、4歲時，隨父母到巴黎，然後巧遇香港女子，一起打理小餐館，養育一對仔女。

餐館非常光鮮乾淨，食物新鮮味道正宗，價錢與香港接近，因為係星期六，冇套餐，每碟大慨€5-8，唯一係略為細碟，同米可以再洗多一過先煮（sor食的執著又上身😂）

忽然感到，人在外地，能同聲同氣係件舒暢事。
勢估唔到，之後發生嘅事，令我有更大感慨！下回分曉～

是日菜式：甜酸魚， 回鍋肉，麻婆豆腐， 清炒西蘭花（ out of menu）， 雞炒飯

地址：3 Rue Sextius Michel, 75015 Paris
電話：+33 1 45 77 17 99