29/08/2026
މިސްރުގެ "ކައިރޯ–އިސްމާޢީލިއްޔާ" ހައިވޭ މަތީގައި ބާރުމިނުގައި ދުއްވާފައި ދިޔަ ލޮރީއަކުން 105 ކިލޯގެ ކުކުޅު ވަގަށް ނެގި ނުރައްކާތެރި އަދި އަޖައިބުކުރުވަނިވި ހާދިސާގެ ވީޑިއޯ މީސްމީޑިއާގައި އާންމުވުމާއެކު، އިންޓަނެޓުގައި އެންމެންގެ ސަމާލުކަން މިއަދު ވަނީ މުޅިން އެކަމަށް ހުއްޓިފައެވެ.
ހޮލީވުޑްގެ "ފާސްޓް އެންޑް ފިއުރިއަސް" ފިލްމެއްގެ މަންޒަރެއް ފަދައިން ހިންގި މި ހާދިސާގައި، "ރަޟްވާ ފުޑްއިންޑަސްޓްރީޒް" ފެކްޓަރީން 4 ޓަނުގެ ކުކުޅު ހިފައިގެން ދިޔަ ފިނިކުރި ލޮރީއެއްގެ ފަހަތުން އައި ޕިކަޕެއްގެ ބޯނެޓު މައްޗަށް ދެ މީހަކު އަރައި، ދުއްވާފައި ދިޔަ ލޮރީގެ ފަހަތު ދޮރު ހުޅުވައިގެން 15 ކިލޯގެ 7 ފޮށި (ޖުމްލަ 105 ކިލޯ) ވަނީ ޕިކަޕަށް ބަދަލުކޮށްފައެވެ.
ލޮރީ ދުއްވަން އިން ޑްރައިވަރު މަޙްމޫދު މުޙައްމަދު ޝަހާތާ ޕްރޮސެކިއުޓަރުންނަށް ދިން ބަޔާނުގައި ބުނެފައިވަނީ، އޭނާއަށް މިކަން އެނގުނީ މަގުން ދިޔަ އެހެން އުޅަނދުތަކުން ބައްތި ދިއްލައި، އިޝާރާތް ކުރުމުން ލޮރީ މަޑުކުރުމުން ކަމަށެވެ.
މި ހާދިސާގެ ވީޑިއޯ ސޯޝަލް މީޑިއާގައި އާންމުވުމާއެކު، ގިނަ ބަޔަކު ވަނީ ވަގުންގެ މި ނުރައްކާތެރި "ސްޓަންޓް" އާމެދު ހައިރާންކަން ފާޅުކޮށްފައެވެ. ނަމަވެސް، ވީޑިއޯއަށް ފަހު މިޞްރުގެ އިންޓީރިއާ މިނިސްޓްރީން ހިންގި ހާއްސަ އޮޕަރޭޝަނެއްގައި، ކުށުގެ ރެކޯޑު އޮންނަ މި 6 މީހުންގެ ގްރޫޕް ހޯދައި ހައްޔަރުކުރުމުގެ ތެރޭގައި ހިނގި ބަޑީގެ ކުރިމަތިލުމެއްގައި ވަނީ 3 މީހަކު މަރުވެފައެވެ އަދި އަނެއް 3 މީހުންވަނީ ހައްޔަރުކޮށްފައެވެ.
މި އޮޕަރޭޝަނުގައި ފުލުހުން ވަނީ އެ މީހުން ބޭނުންކުރި ނުރައްކާތެރި ހަތިޔާރާއި، ކުކުޅު ފޭރުމުގައި ބޭނުންކުރި ޕިކަޕު ފުލުހުންގެ ބެލުމުގެ ދަށަށް ގެންގޮސްފައެވެ.
