09/12/2025
~माइतीघरको विशाल मण्डल निर्माणको कथा ~
#तस्विर : बि सं २०५८ पौषमा माइतिघर क्षेत्रको हालको मण्डल निर्माण गर्न सो स्थानमा भएका घरहरु भत्काइदै |
बि. सं. २०३० सालताका पनि हालको माइतीघर मण्डल क्षेत्रमा करिव ३० वटा घर रहेको देखिन्छ । सो स्थानका घरहरू भत्काई साँघुरो सडक बिस्तार गर्ने श्री ५ महेन्द्रको योजना भए पनि बि. सं. २०५८ सालको ११ औं सार्क शिखर सम्मेलन नेपालमा हुने भएपछि शहर सिंगार्ने होडमा यो योजनाले मुर्तरुप पायो । शहरको फराकिलो पार्ने अभियानको क्रममा बनाइएको यस मण्डलको सौन्दर्यीकरणमा काठमाडौं महानगरपालिकाका तत्कालीन मेयर केशव स्थापित, रिन्चिन योञ्जन र कलाकार वत्सगोपाल वैद्यको महत्त्वपूर्ण योगदान रहेको छ।
बि. सं. २०५४ सालको स्थानीय निर्वाचनमा केशव स्थापित काठमाडौँ महानगरपालिकाको मेयरमा निर्वाचित भएपछि मेयर स्थापित र रिन्चिन योञ्जनको सक्रियतामा माइतीघर मण्डल निर्माणको थालनी हुन पुग्यो । माइतीघर मण्डल निर्माण हुनु ताका यो स्थानमा २२ ओटा घर रहेको तत्कालीन मेयर स्थापितको स्मरण छ । १७ दिन भित्रमा छलफल लगायत ठेकदार नियुक्ति तथा सम्पुर्ण घर भत्काई पूर्ण रूपमा निर्माण सम्पन्न भई सार्क शिखर सम्मेलन सुरु हुनुभन्दा ठ्याक्कै एक दिन अगाडि मण्डल तयार भएको थियो ।
माइतीघरको मौलिक नाम 'फिब्वः ख्यः' हो। बि सं २०२३ सालमा रिलिज भएको निजी क्षेत्रबाट लगानी गरी बनाइएको पहिलो नेपाली चलचित्र 'माइतीघर' को सम्पर्क कार्यालय यसै क्षेत्रमा रहेकोले चलचित्रको पोस्टर र सूचना बोर्ड राखिएपछि माइतीघर नामले स्थायित्व पायो।
