13/02/2026
श्रीवत्स (अनन्त गाँठो), समाबेशी समाजबादी पार्टी
प्रिय दिदीबहिनी, दाजुभाइ तथा साथीहरू,
हामी — लैङ्गिक तथा यौनिक अल्पसंख्यक समुदाय, अपाङ्गता भएका समुदाय र मनोरञ्जन क्षेत्रमा काम गर्ने व्यक्तिहरू — सधैं सीमान्तमा राखियौं। समाजले देख्न चाहेन, राज्यले सुन्न चाहेन, र संसदले हाम्रो आवाज समेट्न सकेन। म, सुनील बाबु पन्त, २०६४को पहिलो संविधानसभामा पुगेपछि, आजसम्म हाम्रो समुदायबाट कोही पनि संसदमा पुगेका छैनन्। यो केवल प्रतिनिधित्वको अभाव होइन — यो हाम्रो जीवन, अधिकार, अस्तित्व र भविष्यसँग जोडिएको गम्भीर अन्याय हो।
हाम्रा मुद्दा — शिक्षा, स्वास्थ्य, रोजगारी, आरक्षण, विवाह, पैतृक सम्पत्ति, पहिचान, सुरक्षाको अधिकार — अरू सांसदहरूले कहिलेकाहीँ उठाए पनि, हामी आफैं संसदमा नपुगेसम्म ती मुद्दा अधुरा नै रहनेछन्। किनकि हामीबिना हाम्रो कथा पूरा हुँदैन।
हामीमध्ये धेरै समलिंगी, तेस्रोलिंगी तथा अन्तरलिंगी साथीहरू अझै खुल्न सक्नुभएको छैन। परिवार, समाज र परम्पराको दबाबले धेरैलाई विपरीत लिङ्गसँग विवाह गरेर बस्न बाध्य बनाएको छ। सबैले खुल्नुपर्छ भन्ने पनि छैन — तर मतदान गोप्य हुन्छ, र यही गोप्य मतमार्फत तपाईं आफ्नो समुदायको पक्षमा इतिहास बनाउन सक्नुहुन्छ।
समावेशी समाजवादी पार्टी हाम्रो आफ्नै पार्टी हो। यो हाम्रो दुःख, संघर्ष, सपना र सम्मानको राजनीतिलाई संसदसम्म पुर्यामउने साधन हो।
यस पटक समानुपातिक तर्फ “श्रीवत्स चिन्ह” मा भोट हालौं।
आफ्ना आमा–बुबा, साथीहरू, दिदीबहिनी, दाजुभाइ र आफन्तहरूलाई पनि भन्नुहोस् — हामीलाई भोट हाल्नु भनेको हामी आफैंलाई सम्मान दिनु हो।
यो केवल चुनाव होइन —
यो हाम्रो पहिचानको जनगणना हो।
यो हाम्रो अस्तित्वको घोषणा हो।
यो हाम्रो एकताको ऐतिहासिक अवसर हो।
सबै जात, जाति, भाषा, धर्म, लिङ्ग र क्षेत्रका हरेक तहमा हाम्रो अस्तित्व हुँदाहुँदै पनि हामी सीमान्तीकृत छौं। आज हामीसँग अवसर छ — गोप्य मतदानमार्फत एकजुट भएर आफ्नो समुदायका लागि योगदान दिने।
एक पटक हामी राजनीतिक शक्तिका रूपमा स्थापित भयौं भने —
विभेद हटाउन सकिन्छ,
कानुन संशोधन गर्न सकिन्छ,
आर्थिक अवसरहरू सिर्जना गर्न सकिन्छ,
सम्मान, सुरक्षा र समृद्ध भविष्य सुनिश्चित गर्न सकिन्छ।
प्रिय साथीहरू,
यो ऐतिहासिक क्षण हो।
एक पटक आफ्ना लागि भोट दिनुहोस्।
एक पटक आफ्ना लागि आवाज बन्नुहोस्।
एक पटक आफ्ना लागि इतिहास लेख्नुहोस्।
समानुपातिक तर्फ —समावेशी समाजवादी पार्टी।
“श्रीवत्स चिन्ह” मा भोट हालौं।
हामी एक हौं। हामी शक्तिशाली बनौं ।
