26/05/2026
ALABEL, GIPASIDUNGGAN SA DA XII TUNGOD SA MALAMPUSONG KADIWA FOOD HUB IMPLEMENTATION
KORONADAL CITY, South Cotabato (Mayo 26, 2026) — Nagpakita pag-usab og dakong kadungganan ang Munisipyo sa Alabel human mapasalamaton ug mapinasidunggan sa Araw ng Parangal 2026 sa Department of Agriculture Regional Office XII nga gihimo sa NIA Regional Office XII sa Koronadal City, South Cotabato. Ang maong kalihokan nagtigom sa nagkadaiyang local government units, farmers’ organizations, fisherfolk groups ug agricultural stakeholders gikan sa tibuok SOCCSKSARGEN Region aron ilhon ang ilang bililhong kontribusyon sa pagpalambo sa sektor sa agrikultura ug pangisdaan.
Personal nga mitambong si Mayor Lilibeth “Ybing” J. Salarda, MPA isip representasyon sa Lokal nga Panggamhanan sa Alabel sa maong awarding ceremony. Uban kaniya sila Municipal Agriculturist Giselle C. Gestupa, MPA, 5K Masaganang Alabel Program Coordinator Jimmy Catulong, ug SMILE Alabel Food Hub Agriculture Cooperative Chairperson Sajid C. Capinda sa pagdawat sa usa sa labing prestihiyosong pag-ila nga nadawat sa lungsod karong tuiga.
Gipasidunggan ang MLGU Alabel pinaagi sa iyang KADIWA Food Hub isip Regional Gawad Saka 2026 Awardee alang sa “Outstanding KADIWA ng Pangulo (KNP) Program Implementer” sa Local Government Unit category. Ang maong award usa ka pagpanghimatuod sa malampuson ug episyenteng pagpatuman sa KADIWA Program nga nagtumong sa pagpalig-on sa food security, paghatag og direkta nga merkado alang sa mga lokal nga mag-uuma ug mangingisda, ug pagseguro nga makabarato ug preskong produkto ang komunidad.
Sa maong awarding ceremony, gihatagan usab og espesyal nga pag-ila si Municipal Agriculturist Giselle C. Gestupa, MPA ug Agriculturist I Engr. Shiery Z. Cuna alang sa ilang aktibong suporta ug dedikasyon sa pagpatuman sa mga programa sa Department of Agriculture XII ilabi na sa GAWAD SAKA initiatives. Ang ilang padayon nga serbisyo, teknikal nga kahibalo, ug koordinasyon sa mga mag-uuma ug stakeholders dako og kontribusyon sa kalampusan sa mga agricultural programs sa Alabel, nga nagpalig-on sa kapasidad sa lungsod sa food production ug rural development.
Sumala sa Department of Agriculture XII, ang KADIWA Food Hub sa Alabel nahimong usa sa mga ehemplo sa rehiyon tungod sa epektibo nga pagdumala, maayong koordinasyon sa mga stakeholders, ug padayon nga suporta sa lokal nga panggamhanan ngadto sa agricultural sector. Ang Food Hub nahimong importante nga sentro sa pagpamaligya sa lokal nga produkto diin ang mga mag-uuma ug fisherfolk adunay direkta nga access sa merkado nga walay dagkong middlemen, nga dako og tabang aron mudako ang ilang kita ug mapalambo ang ilang panginabuhi.
Atol sa awarding ceremony, mihatag usab og madasigon nga mensahe si Mayor Lilibeth “Ybing” J. Salarda diin iyang gipasalamatan ang Department of Agriculture XII sa padayon nga suporta sa Munisipyo sa Alabel. Gipasiugda sa Mayor nga ang agrikultura maoy pundasyon sa kalamboan sa usa ka lungsod, ug nga ang kalig-on sa sektor sa agrikultura nagpasabot usab sa kalig-on sa ekonomiya ug seguridad sa pagkaon sa katawhan. Iyang gi-emphasize nga ang padayon nga pakigtambayayong sa national government agencies, LGU, ug mga farmers’ organizations mao ang susi sa malungtarong kalamboan sa Alabel.
Gipahayag usab ni DA XII Regional Executive Director John Pascual ang iyang pagdayeg sa Alabel ubos sa liderato ni Mayor Ybing Salarda tungod sa padayon nga pagpakita sa dedikasyon sa pagpalambo sa food sustainability ug agricultural development programs. Giila niya nga ang kalampusan sa Food Hub implementation dili lamang resulta sa kasamtangang administrasyon apan padayon usab nga legasiya sa former Mayor ug karon Municipal Administrator Vic Paul M. Salarda nga maoy usa sa mga nagpalig-on sa pundasyon sa maong programa sa lungsod.
Gipahayag usab ni Director Pascual nga ang Alabel nahimong usa sa mga local government units nga adunay lig-on nga commitment sa pagpalambo sa agricultural economy pinaagi sa partnerships, innovation ug community-based programs nga direktang nakabenepisyo sa ordinaryong mag-uuma ug mangingisda.
Dugang pa sa plaque of recognition nga nadawat sa MLGU Alabel, nakadawat usab ang lungsod og Certificate of Commitment gikan sa Department of Agriculture XII nga nagkantidad og P1,000,000.00 alang sa usa ka project proposal. Ang maong suporta gikan sa DA gilauman nga makatabang sa dugang pang pagpalambo sa mga agricultural programs, food production initiatives ug livelihood opportunities alang sa mga residente sa Alabel.
Laing dakong garbo sa Alabel atol sa maong kalihokan mao ang pag-ila kang Benedicta Lumaya, usa ka aktibong lider sa mga mangingisda ug environmental guardian gikan sa Barangay Kawas, Alabel, Sarangani Province. Gipasidunggan siya isip regional winner ug national nominee alang sa 51st Gawad Saka Awards ubos sa Outstanding Fisherfolk (Fish Capture Category).
Si Lumaya nailhan tungod sa iyang dedikasyon sa pagpanalipod sa marine resources ug sa iyang padayon nga paningkamot aron mapalambo ang kahimtang sa mga mangingisda sa ilang komunidad. Dugang pa niini, aktibo usab siya sa environmental conservation initiatives ug nagserbisyo isip inspirasyon sa ubang kababayen-an ug fisherfolk leaders sa Sarangani Province. Ang iyang rekognasyon sa rehiyonal ug nasudnong lebel usa ka pagpamatuod nga ang mga ordinaryong lumulupyo nga adunay tinuoray nga serbisyo ug gugma sa komunidad mahimong ehemplo sa kalampusan ug pagbag-o.
Gipahayag sa MLGU Alabel nga ang tanan nga mga pasidungog nga nadawat sa lungsod dili lamang kadaugan sa lokal nga panggamhanan kondili kadaugan usab sa matag mag-uuma, mangingisda, kooperatiba ug stakeholder nga nagtinabangay aron mapalambo ang sektor sa agrikultura ug pangisdaan sa Alabel. Ang maong mga pag-ila nagpakita nga pinaagi sa lig-on nga liderato, maayong programa ug panaghiusa sa komunidad, posible nga makab-ot sa usa ka lungsod ang mas malungtarong kalamboan ug mas lig-on nga seguridad sa pagkaon alang sa katawhan. (ALABEL INFORMATION OFFICE)
Ybing Jabilles Salarda Mayor Nonoy Salarda Giselle Cahumnas Gestupa
