23/05/2026
President’s Report Grand Santacruzan
3rd GMM, May 22, 2026
Intramuros, Manila
Magandang araw po sa ating lahat.
Ngayong Heritage Month, muli nating ipinapaalala na ang isang bansang walang pagpapahalaga sa kultura, tradisyon, at kasaysayan ay wala din saysay. Tulad ng kasabihan: “Ang taong walang kaalaman sa kanyang nakaraan, pinagmulan, at kultura ay parang punong walang ugat.”
Kaya napakahalaga ng Intramuros—hindi lamang bilang isang makasaysayang lugar, kundi bilang simbolo ng ating pagkakakilalan bilang Pilipino. Tulad ng sinabi ni Nick Joaquin, “Intramuros is not in ruins; it lives in every Filipino who remembers who we are.”
At tunay ngang buhay ang Intramuros—bumangon mula sa pagkawasak, lumaban sa paglipas ng panahon, at patuloy na nagbibigay inspirasyon. Katulad din ito ng turismo ng Pilipinas. Humarap man tayo sa maraming pagsubok at krisis, mananatili tayong matatag, lumalaban, at nakatindig.
Ganyan din ang PTAA. Sa kabila ng mga hamon, hindi nagpatinag ang ating samahan. Hindi tayo tumitigil sa paghahanap ng paraan upang pangalagaan ang ating industriya, ang ating mga miyembro, mga manggagawa sa Turismo gaya ng mga tour guides, bangkero, waiters at marami pang iba, isama na pati na din ang ating mga kliyente.
Ang mga aktibidad na magpapalakas sa ating lokal na turismo ay isa sa mga nangungunang adhikain ng PTAA, simulan natin sa kauna-unahang “Visita Iglesia” na inorganisa sa tulong ng DOT- Calabarzon na pinangunahan ng ating Vice President for Inbound, Ginang Ellen Cobarubbias kasama ang ating Secretary General at ang Bokal ng Laguna na si Ginoong Arnel Gomez.
Kamakailan lamang, ang ating Vice President for Visayas at Mindanao, Matt Poonin ay matagumpay na nagdaos ng Familiarization Tour sa Camiguin at Butuan,kasama ang ating Executive Vice President Evelyn Bondagjy at Treasurer, Helena Ty,upang pagtibayin ang ating dedikasyon na paunlarin ang turismo sa rehiyon ng Visayas at Mindanao.
Patuloy din tayong nakiisa sa mga proyekto at aktibidad ng Department of Tourism, ang mga pagpupulong at diskusyon upang tulungan ang sektor ng turismo sa panahon ng pagsubok ay ating tinugunan.
Dumalo ang ating Executive Vice President Evelyn Bondagjy sa Hari Raya Festival na ginanap sa Boracay sa imbitasyon ng ating kagalang-galang na DOT Undersecretary Myra Valderrosa Abubakar.
Nakiisa din ang inyong lingkod at ating Assistant Vice President for Outbound, Dominic Castillejos sa pagbuibukas ng LOVE Boracay event sa Boracay kung saan tayo po ay isa sa mga panauhing pangdangal.
Sa imbitasyon ng Tourism Promotions Board, na dinaluhan ng ating auditor, Amie Dimapindan, nakiisa ang PTAA sa pagsulong ng Community Based Tourism program ng Bohol.
Lumahok din tayo sa isang mahalagang pagpupulong ng Tourism Congress of the Philippines, ang Tourism Under Constraint: Rewiring for Resilience, Value and Inclusion, ito ay pinangunahan ng ating Past President, Nit Ragaza and Past Vice President for Inbound Fe Abling Yu, kasama ang iba pang PTAA officers.
At ngayon mismong araw na ito, katulong tayo ng DOT sa pangunguna ni Director Zeny Pallugna, sa paglulungsad ng bagong DOT Campaign na “LOVE YOUR OWN” isang programang naglalayong mas palakasin ang lokal na turismo sa tulong ng bawat Pilipino.
At muli ang pagpupugay ko at pagbati sa ating VP for Inbound Ellen Cobarrubias at sa ating Assistant Vice President for inbound, Kim De Guzman, sa isa na namang matagumpay na Lakbay Pilipin
Hindi din natin puwedeng kalimutan ang pakikipag-kamustahan natin sa ating mga kasama sa Davao at Rizal sa ginanap na PTAA Konek, kung saan pinag-usapan ang mahahalagang isyu ng ating industriya, ito ay sa inisyatibo ng ating Executive Vice President, Evelyn Bondagjy.
Hindi dito nagtatapos ang pagsulong ng PTAA sa lokal na turismo, ang araw na ito ay mahalaga para sa ating mga tour guides, sapagkat ngayong araw na ito ay lalagdaan ng PTAA at ng mga grupo ng tour guides ang isang kasunduan upang isulong at pagtibayin ang mga programang poprotekta sa mga tour guides na malaki ang ambag sa turismo ng Pilipinas, simula sa araw na ito, isusulong ng PTAA sa kanyang mga miyembro na gumamit lamang DOT accredited tour guides, bawal na ang kolorum!
Hindi din magpapahuli sa galing ang ating Outbound programs sa pangunguna ng ating masipag at magandang Vice President for Outbound, Rowena Coloma, kung saan pinangunahan nya ang Familiarization trip sa Chongqing, China kamakailan lang, na susundan pa ng isa na namang Fam Tour sa Yunan, China sa susunod na linggo sa imbitasyon naman ng ating konsulado sa China.
Patuloy tayong nagsasagawa ng mga makabuluhan at napapanahon na forum upang pag-usapan ang mga isyung kinakaharap ng turismo.
Sa pamumuno ng ating “unstoppable” Education Committee Chairperson , Cherry Caritativo, isinagawa ang mga seminars at forum sa pamamagitan ng PTAA Academy, gaya ng Data Privacy Seminar, Customer Service Training for Frontliners at ang Strategic Session in time of crisis Forum., taas noo din niyang kinatawan ang PTAA bilang keynote speaker sa nakaraang CITHM International Conference na ginanap sa Lyceum, Batangas.
Samantala, sa pandaigdigang entablado patuloy na kinalala ang galing ng PTAA, ang ating Assistant PRO Kem Lim ang napiling Keynote Speaker sa nakaraang pagpupulong ng Singapore Tourism Board sa Makati City.
Ang ating Chairman for International Affairs at Immediate Past President, Dr. Mariegel Tankiang-Manotok, ay patuloy na isinulong ang interest ng PTAA sa mga international na pagpupulong ng ASEANTA sa Cebu, MATTA event sa Malaysia, UFTAA meeting sa Spain at Pattaya, kung saan siya din ay nahalal bilang Director for Asia and the Pacific, isang pagbati mula sa mga kasama mo sa PTAA!
Sa dami ng mga media interviews at public engagements, patuloy na kinilala ang PTAA bilang authority pagdating sa mga usaping may kinalaman sa industriya ng turismo. At sa pamamagitan ng ating PTAA Podcast, mas napapalawak natin ang ating boses at mas marami tayong naaabot na stakeholders at travelers. Tunay na nakakataba ng puso ang napakagandang feedback na natatanggap natin mula Luzon, Visayas at Mindanao, patunay na ang PTAA ay ang pambansang travel association. Tayo ang most visible na travel association sa buong Pilipinas ngayon at ang tagumpay na ito ay dahil sa husay ng ating PRO, Bb. Chal Lontoc-Del Rosario.
Ang sipag at galing ng PTAA ay walang saysay kung hindi ito makakapag-lingkod sa mga tao, kabilang man o hindi sa ating industriya.
Sa tulong na ating mga kaibigang abogado, patuloy nating lalabanan ang mga travel scammers. Inilunsad natin ang ating Anti-Travel Scam Hotline upang protektahan ang publiko laban sa mga manloloko, layunin din nitong isulong at iangat ang integridad ng mga lehitimong travel agencies sa Pilipinas lalo na ang mga kasapi ng PTAA.
Sa ilalim ng PTAA Foundation, sa pamumuno ng ating Executive Vice President, Evelyn Bondagjy kasama ang ating assistant treasurer, Rolly Maramo, Secretary General Arnel Gomez at Assistant VP for Outbound Dominic Castillejos, isinagawa natin ang PLEX (Play Learn, Explore) para mga piling mag-aaral at komunidad. Ito ay sa pakikipag tulungan ng UOS Travel at ng Pambansang Museo ng Pilipinas.
Hindi rin natitigil ang mga proyekto ng PTAAF—mula sa relief operations, educational assistance, hanggang sa iba’t ibang outreach programs, kagaya ng ating katatapos lamang na relief operations sa Bicol para tulungan ang mga tourism workers na naapektuhan ng krisis sa langis at ng pagputok ng bulkang Mayon.
Ang Grand Santacruzan ngayong taon ay hindi lamang tungkol sa kultura at pananampalataya — mas naging makahulugan ito ngayon. Sa gitna ng mga pagsubok at krisis na ating nararanasan, itinuturo sa atin ng Santacruzan na maging mas mahabagin at mapagmalasakit sa ating kapwa.
Ngayong taon, napagpasyahan naming gawing daan ang pagdiriwang na ito upang unahin ang pagtulong sa ating komunidad. Nag-imbita tayo ng mga lokal na tindero at tindera upang magbigay ng pagkain at meryenda para sa ating lahat, at sasagutin ng PTAA ang kanilang benta ngayong araw bilang suporta sa kanilang kabuhayan.
Ang mga tour guides na naglaan ng libreng walking tours kaninang umaga ay sinuportahan din ng PTAA bilang pagkilala sa kanilang mahalagang papel sa turismo at kultura. Maging ang halos nalilimot nang sining ng mga “Singkaban Makers” mula sa Bulacan na siyang lumikha ng ating mga naggagandahang arko para sa ating mga reyna ay muling nabigyang-buhay dahil sa Santacruzan na ito.
Kaya ang Santacruzan na ito ay hindi lamang isang prusisyon — ito ay simbolo din ng pag-asa, pagkakaisa, at malasakit.
Naniniwala tayo na ang turismo ay hindi lamang negosyo, kundi serbisyo at malasakit sa kapwa.
Kulang ang buong araw para maisa-isa ko ang mga proyekto at gawain ng PTAA, kaya hinikayat ko ang lahat na makiisa, makialam at maging bahagi ng mas marami pang makabuluhang proyekto sa mga susunod na araw.
Sa susunod na buwan, mula June 5-7 ay gagawin natin ang TTE at iTTE Vis Min edition at ang ating 4th General Membership Meeting sa Davao City. Magkita kita po tayo sa Mindanao!
Mga kaibigan, ang Intramuros ay kwento ng laban, tibay, at pag-asa. At iyon din ang kwento ng PTAA at ng turismo ng Pilipinas. Patuloy tayong lalaban, patuloy na babangon, at patuloy na magbibigay pag-asa para sa ating industriya. Tuloy tuloy, walang makakapigil!
Ang Santacruzan ay hindi lamang tungkol sa magagarbong kasuotan o ng mga nagagandahang sagala, huwag natin kalimutan na ang tunay na kahulugan ng pamana at tradisyon na ito ay ang pananampalataya at pag-asa.
At mamayang prusisyon, hinihikayat namin ang lahat ng PTAA members at ang ating mga kaibigan na samahan at sundan ang Banal na Krus upang ipakita na tayo ay isang komunidad na naniniwala na sa pagkakaisa, pananampalataya at pag-asa, walang pagsubok ang hindi natin kayang lagpasan.
United together, further together!
Maraming salamat po at mabuhay ang kulturang Pilipino, mabuhay ang Intramuros, at mabuhay ang PTAA!
Mr. Jaison P. Yang
President, PTAA
