06/04/2026
ZAMBOANGA DEL NORTE APIL SA TOP 10 PINAKA POBRE NGA PROBINSYA SA PILIPINAS — PSA
Dipolog City — Apil ang probinsya sa Zamboanga del Norte sa listahan sa mga probinsya sa Pilipinas nga adunay taas nga poverty incidence, base sa datos nga gipagawas sa Philippine Statistics Authority (PSA).
Sumala sa pinakabag-ong poverty statistics sa nasud ang probinsya sa Zamboanga del Norte usa sa mga lugar nga nag-atubang gihapon og seryosong hagit sa kapobrehon ug kasagaran maapil sa Top 10 nga pinaka pobre nga probinsya sa Pilipinas.
Sa report sa PSA, gipakita nga daghang probinsya sa Mindanao ug Visayas ang adunay pinakataas nga poverty incidence, lakip na ang Lanao del Sur, Sulu, Basilan, Tawi-Tawi ug Masbate.
Ang Zamboanga del Norte nagpabilin nga usa sa mga probinsya nga adunay taas nga porsiyento sa kapobrehon sulod sa pila na ka tuig apan ang mga lideres nga may posisyon misamot ug ka adunahan.
Samtang, ang Zamboanga Peninsula nga rehiyon diin kabahin ang Zamboanga del Norte, usa usab sa mga rehiyon sa nasud nga adunay taas nga poverty incidence.
Matud pa sa mga ekonomista, daghang hinungdan nganong nagpadayon ang kapobrehon sa pipila ka probinsya sa nasud, lakip na ang: kakulang sa trabaho ug industriya, limitadong oportunidad sa negosyo, kahimtang sa agrikultura, ug kakulang sa modernong imprastraktura.
Sa karon, padayon pa nga nakigbugno sa ka pobrehon ang mga tawo ug wala pa masayri kung kanus-a matapos ang kalisod nga murag hanap pa ang maayong kaaugmaon sa katawhan.
Ang PSA nagpahinumdom nga ang poverty statistics ginabase sa Family Income and Expenditure Survey (FIES) nga nagtan-aw kung ang kita sa usa ka pamilya igo ba aron matabonan ang ilang batakang panginahanglan sama sa pagkaon, edukasyon ug uban pang panginahanglan sa pang-adlaw-adlaw nga kinabuhi.
