24/10/2026
حرام چھوڑ کر تو دیکھیے.....
امریکا میں دو مسلمان ٹرک ڈرائیوروں نے صرف اس لیے اپنی ملازمتیں گنوا دیں کہ وہ شراب کی کھیپ ایک جگہ سے دوسری جگہ پہنچانے پر آمادہ نہیں تھے۔ ان کے لیے ملازمت اور تنخواہ سے زیادہ اہم اپنے دین پر قائم رہنا تھا۔
یہ دونوں ڈرائیور، مہاد عباس محمد اور عبدالکریم حسن بولشالے امریکی ریاست الینوائے کی ایک ٹرانسپورٹ کمپنی میں کام کرتے تھے۔ دونوں کا اصل اور آبائی تعلق صومالیہ سے ہے۔ وہ ٹرانسپورٹ کمپنی کے ہیوی ٹرک چلا رہے تھے۔ جولائی کے دوران انہیں پتہ چلا کہ کمپنی نے شراب کی سپلائی کا ٹھیکہ لے لیا ہے اور اب انہیں اپنے ٹرکوں میں شراب کی کھیپ بھی لے جانا پڑے گی۔ انہوں نے اپنے مذہبی عقیدے کی بنا پر شراب لے جانے سے انکار کیا تو کمپنی نے انہیں ملازمت سے نکال دیا۔
دونوں نے ہمت نہیں ہاری اور عدالت سے رجوع کیا۔ امریکی ادارے برائے مساوی روزگار مواقع (EEOC) نے کمپنی کے خلاف مقدمہ دائر کیا۔ بالآخر عدالت نے دونوں کے حق میں فیصلہ سنایا اور انہیں مجموعی طور پر تقریباً 2 لاکھ 43 ہزار ڈالر ہرجانہ دینے کا حکم دیا۔ یہ رقم تقریباً 6 کروڑ 80 لاکھ روپے کے برابر بنتی ہے۔
ہم بسا اوقات محض چند ہزار روپے کی خاطر حلال و حرام کی تمیز بھلا دیتے ہیں۔ کوئی جھوٹ بول کر روزی کماتا ہے، کوئی رشوت لیتا ہے، کوئی سودی کاروبار میں شریک ہوتا ہے اور کوئی حرام کام کو مجبوری کا نام دے کر اپنے ضمیر کو مطمئن کر لیتا ہے۔
ان دونوں ڈرائیوروں کے سامنے بھی روزگار کا مسئلہ تھا۔ ملازمت چھوٹنے کے مضمرات کا امریکا جیسے مہنگے ملک میں اندازہ بخوبی لگایا جاسکتا ہے۔ لیکن انہوں نے اپنے عقیدے پر سمجھوتا نہیں کیا۔ یہ نہیں کہا کہ گھر کا خرچ چلانے کے لیے سب کچھ جائز ہے۔ بلکہ سوچا کہ رزق نوکری دینے والی کمپنی کے پاس نہیں، بلکہ اللہ تعالیٰ کے ہاتھ میں ہے۔ ملازمت چھن سکتی ہے، کاروبار میں نقصان ہو سکتا ہے، آمدنی کے ذرائع بند ہو سکتے ہیں، لیکن اللہ تعالیٰ کی رحمت کے دروازے بند نہیں ہوتے۔
اللہ تعالیٰ فرماتے ہیں:
ترجمہ: ’’اور جو اللہ سے ڈرتا ہے، اللہ اس کے لیے (ہر مشکل سے) نکلنے کا راستہ بنا دیتا ہے اور اسے وہاں سے رزق دیتا ہے جہاں سے اسے گمان بھی نہیں ہوتا۔‘‘ (سورۃ الطلاق: 2-3)
اور رسول اقدس ﷺ سے منقول ہے:
’’تم اللہ عزوجل کی خاطر کوئی چیز نہیں چھوڑو گے، مگر اللہ اس کے بدلے تمہیں اس سے بہتر عطا فرمائے گا۔‘‘ (مسند احمد)
رزق کی تنگی، ملازمت کے خوف اور دنیاوی فائدے کی خاطر اپنے دین کو قربان نہیں کرنا چاہیے۔ حرام چھوڑ کراور حلال پر اکتفا کرکے تو دیکھیے کہ اللہ جل شانہ کی قدرت کیا کرشمے دکھاتی ہے۔ وہ بہت غیرت والی ذات ہے، اپنی رضا کے لیے قربانی دینے والے کو بے یار ومددگار نہیں چھوڑے گی۔
