15/07/2026
عمرہ ویزہ نظام میں بڑی تبدیلی، لازمی “میل واؤچرز” شامل کرنے کی تیاری
سعودی عرب نے عمرہ ویزہ نظام میں ایک نئی تبدیلی متعارف کرانے کی تیاری شروع کر دی ہے، جس کے تحت لازمی ٹرانسپورٹ کی شرط کی طرز پر اب کھانے (Meal Vouchers) کو بھی عمرہ ویزہ کا حصہ بنایا جائے گا۔ اس اقدام کے نتیجے میں عمرہ ویزہ کی مجموعی لاگت میں اضافے کا امکان ظاہر کیا جا رہا ہے۔
ذرائع کے مطابق نئے نظام کے تحت ہر عمرہ زائر سے اس کے قیام کی مدت کے مطابق تقریباً 20 سعودی ریال یومیہ کے حساب سے اضافی رقم وصول کی جائے گی، جو براہِ راست عمرہ ویزہ کی قیمت میں شامل ہوگی۔
اطلاعات کے مطابق اس نئے نظام کا نفاذ یکم ربیع الاول سے کیا جائے گا، جبکہ ابتدائی مرحلے میں اس کا اطلاق صرف پاکستان، بھارت، بنگلہ دیش اور مصر سے آنے والے عمرہ زائرین پر ہوگا۔
اس منصوبے کے تحت 10 ہزار سے زائد مقامی سعودی ریستورانوں کو نسک (Nusuk) ایپ کے ساتھ منسلک کیا جا رہا ہے۔ ہر زائر کے لیے کھانے کا ایک مخصوص BRN کوڈ جاری کیا جائے گا، جسے عمرہ ویزہ سسٹم سے منسلک کرنے کے بعد ہی ویزہ جاری کیا جائے گا۔
تاہم اس حوالے سے متعلقہ سعودی حکام کی جانب سے ابھی تک باقاعدہ تفصیلی اعلامیہ جاری نہیں کیا گیا۔ مزید وضاحت اور عملی طریقۂ کار سامنے آنے کے بعد اس نظام کی مکمل تفصیلات واضح ہوں گی۔
Copy
