Kèr Maron

22/03/2026

17/03/2026

Mars 1739 Rivir Rampar : bann gran Marone, Maron la ékri LISTWAR! Sak léta kolonial i vé pa rakont anou! Listwar in gran vilaz Maron ataké par 115 chasseurs Maron la sort 4 koté la Rényon (115 tueurs dirigé par in sertin François Carron komandan de tout bann détachements) LISTWAR de vré gérié ke la sov zot bann é la protéz zot vilaz ziska la Fin!

Bana la retrouv azot lao par koté piton de Villiers, pou atak gran vilaz Maron dann Fon la rivir Rampar, zot la mont lambuskad pou rant dann lo vilaz. Soman, vitman Carron la rann ali Kont laksé lo vilaz té plis ke konpliké sak li té kalkil! Zot la retrouv a zot fas a bann gérié gériér ke té défann le vilaz, bann Maron la fé déboul lo tos dési zot, bana lavé fizi é la tir su le bann sasér!
An minm tan par anlér lo rampar, le détachement de François Nativel la vi in karanténe Marone, Maron kit lo vilaz par anlér in rampar...bana la tir su la bann....9 Marone la été tué. Dot la tonm dann Fon Rampar.
La bann séf détachements i di dann tout zot rapor konsérnan latak vilaz la : la majorité des grands marons restent et font faces aux chasseurs! Imposib pou bana rant dann lo vilaz...zot i désid atann lo landemin! O matin bann sasér i Giny rant dann lo vilaz...na presk Pi personne! Lo bann gérié la Anprofit la nuit pou sap par santiyé ryink azot té koné!
Bann sasér la trouv : bann pallisade konm bann for malgas...36 Kaz...otan de chien...é bann Moun ke la rés dann lo vilaz...

An Mars 1739 in karanténe Marone é Maron la été tué par bann sasér mé la plipar la Giny viv! La parti pou arni pép zot tér! Dann Fon la rivir Rampar pliziér zénérasion Marone, Maron la viv! La pépétué zot kiltir, zot tradition! La fé tranm léta kolonial!
An 1758 lo rwa Manzak ansanm Réne Fouche la fé fas bann sasér Maron dann Fon la! Mé sa sé in not Listwar!

Granmersi bann zansét Méritan Marone, Maron pou zot konba! Réspé pou tout sak zot la fé! Zordi fo Nou mét azot dann la limiér!

Téks ékri par
Maheva Poncharville : Rakontéz nout LISTWAR, pou nout zansét ék nout zanfan! Sours rapport de détachement du 12 au 14 Mars 1739.

Mersi fane ali partout!
Kontak Kérmaron si zot i vé dékouv nout LISTWAR! 0692 45 48 54

27/02/2026

Listwar na 1 dét anvér bann zansét Tank Nou va di zot nom, zot va viv!
SIMAYÉ, LAMBOU, CLAUDE, FRANÇOIS
Partaz Listwar, nout fors! ✊🏽

28/01/2026

RAKONTAZ MARONAZ : par koté foré bor ranpar pou mét anlér Rén Fouche ék rwa Manzak! Ansanm tout nout bann Marone, maron la viv la Rényon dépi bann promiyé tan lil Bourbon!

💢 Kosa Nou fé? Mét anlér bann Vré Maron istorik!! Zistwar Baal, Diampare, Pyram lé byin zoli sof ke zot zistwar i sort dann koko in moun : Eugene Dayot! (An gro i sort pa dann zarchiv)
Zournalis dann son tan (1810-1852), son mazinasyon rasis i débord dann son ROMAN Bourbon Pitoresque (wi sé in roman, sé touzour pa zarchiv) ousa nout bann zansét lé dékri konm bann sovaz, barbar é ousa le lasasin Mussard lé dékri konm in boug gayar, zanti, na kouraz.

2 ti LÉSTRÉ SOIZI DANN BOURBON PITTORESQUE :
Déskripsion Mussard : "Brun, grand bien fait, sa physionomie était Franche et ouverte, son allure vive et gaie. Son regard quoique ardent avait une expression de bonheur qui faisait deviner un coeur bon et loyal."
Déskripsion Diampare : " sa tête monstrueuse, posée sur des épaules déménagement larges, semblait appartenir a une bête farouche plutôt qu'à un homme...toute sa physionomie respirait une férocité brutale. Son aspect repoussait et sentait le sang..."
Bann lékzanm konmsa néna an tiok dann Liv la.
Le roman i pran plas an 1748 avec bann rwa Kaf, an 1748 80% bann Maron lété malgas. Lo vré rwa lé Laverdure ek la rén Sarlav.

Nout bann vré rwa, nout bann gériér, gérié la lés zot nom si tout Piton, tout rampar. Na pwin Piton Baal, ravine Diampare ou byin kavérn Pyram...

😶‍🌫️ Kasaz lé kui : Na in diskour Baal i sirkil si lo nét! I fé ri la bous! Présk a dir : bann blan té invité akout kabary maron dann bor rampar Maïdo...apré kan Baal té fini son Kabary li té fé tourn boudwar ansanm Mari Brizar po Bana? Diampare té ral samoussa? Aou minm koman in diskour in maron i dat 1748 lé ékri dann la lang kolon (1877 charles LEAL an gro sé konm bann zinfliansér koméla i pas térla 3 zour é sé zot na la konésans) i fé pa travay zot koko?

✊🏼 ASÉ souplé, nout bann Zansét Méritan i domann la rokonésans ke nou pép réyoné zot désandan nou dwa azot!

🌋Rakont zistwar boug la la ékri sé konm si zordi nou té lés bann néokolon i débark terla réekri nout zistwar (lo zistwar i répét fo rouv lo zié)
Anon maron! Nou fé sonn lo non bann zansét la batay pou zot pép, zot rolizion, zot bann zansét! Nou rakont zot VRÉ zistwar, ousa zot la viv!
Pou bana, pou nou, pou tout zanfan réyoné i dobout pou zot liberté!
Viv lo rwa la rén : Ansin, Pitsana, Laverdure, Sarlav, Manzak, Fouche!
Mersii Capitén Dimitile, Cimendéf, Raharianne, Malaupied, Lefo, Simitav, Simitanm, Vavy, Bara, Sizan, Santav
Maréne, Sara ék Sinacane, Diamateck ék bann MILIÉ Marone Maron la Rényon 🙏🏽

17/01/2026

Anlér Piton Dada Bé Ansin ansanm Mama Bé Héva, dann rwayom Intériyér.

11/12/2025

Dann kér nout rwayom Maron sé nout tradision ke Nou TIEMBO! KOZÉ! RAKONT ZISTWAR!
Nout bann zansét maron.es la itiliz zot langkozé konm fors pou TIEMBO Kont lo sistém. Kréol, nout langkozé, nout léritaz, nout fors!
Pou sa mon bann vizit lé ryink an kréol. Nou koz pa "Mythe et légende des cimes" Nou koz ryink vré zistwar Maronaz!
Marmay? Mi rakont azot Nout vré Zistwar, Zistwar nout zansét, konmsa bana i sa fane ali partout! Pou pa Nou oubli!

⚠️ Konm bann granmaron dann zot tan Nou fé désant osi dan lé ba!
Kontak anou si zot vé Nou Désanm dann lékol pou marmay!
Exposition, ateliyé, fabrikasion livré si Zistwar Nout rwayom Maron!

23/09/2025

In Zistwar Maronaz ansanm MIARO Atidamba pou bann zourné patrimwan dann Sin Dni!
Nou la koz Zistwar nout bann rwa ek nout bann réne, Nou la dékouv ansanm la nouvelle kart du Royaume Maron! In gayar rankont ansanm Zot! Mersi tout sak la ni war anou!

Nou artrouv!
An maronaz!

08/07/2025

Anon Maron! Nou artrouv samedi matin Hell-Bourg pou in voyaz gidé dann nout rwayom par anndan...Nou sa rakont zistwar bann gran maron épisa Nou sa tresse la kord ansanm bwa saplé!

🗓️ Samedi 11 Juillet
De 9h à midi
📍 Hell-Bourg
Tarif : 30€

28/04/2025

20 Avril 2025 dann pléne tamarin, nou la ékri in gayar zistwar...ansanm nou la fé in gran voyaz dann fénwar ziska la limiér Maronaz ☀️

Nou la rakont zistwar Massak! Celui qui ose! Lo séf maron dann fon Mafate (landrwa danzéré).
La port son rwayom té gran rouvér pou nou! Zistwar Sizane, in marone i larg pa ryin pou son liberté, zistwar Juan, Sanson, zistwar malaupié, zistwar lo rwa Pitsana...bann gran maron, marone la viv si la tér sakré, la fé souf lo van la liberté pou lo pép réyoné...

Mersi tout domoun la désann Mafate zour la, pou in rankont an tér marone!
Nout voyaz ansanm té zoli! Lamour nout zistwar té nout manzé, soléyé té nout bénédiksion...

Mersi bana 🙏🏽

09/04/2025

In Zistwar maronaz : Néna Rwayom Maron la Réinion!
In Rwayom dan la tér, sou nout pié, dann nout kér, dann nout ziyé.
Dann Rwayom la na sak ou wa, sak ou wa pa. Sak ou antan, épi sak ou rosan...si ou akout byin li rakont aou son Zistwar :
Dann Rwayom la na in pép. In pép lib dann bwa. In pép rézistan in pép tout koulér!
Lo pép la, dann tan lesklavaz, la fé tout kalité maniér pou ké domoun i koné pa kisa zot ilé, Koman zot i viv la vie, Koman zot i viv zot spiritualité...
Zot sékré té protézé! Protézé par zot minm, zot krwayans té zot rampar!
Zot san la koulé pou fé viv rwayom la...

Dann Rwayom la, Zistwar la tér zansét, Zistwar zot tradision, zot spiritualité, té rakonté...té murmuré dousouman...konmsa ryink domoun la foré té i antan...
Pousa zordi na ankor domoun i batay pou konét la vérité si Rwayom la...Mé i Koné pa tout..
Akoz? Akoz la klé pou rante dann Rwayom la sé lo kér!
I apél ali rwayom par anndan la pa pou ryin...

Zordi lo pép lib té i viv dann bwa, dann tan lesklavaz, i kri an silans : Akoz zot i di Nout Rwayom i ékzis pa?
Agard! Agard Nou lé la! Dann zoli flér faham, dann rampar, anlér piton, dann fanjan kan i lév lo pwin, dann pié dbwa, dann nout zanfan...Nou lé la! Nou véyi azot!
Lo kér bana i plér kan zot i wa zot zanfan i koné pas zot zistwar, i di zot Rwayom i ékzis pa!
Tansion... pangar...la tristés la i pé transform an kolér...

Alors dousman dousman, san fé dézord, bann zanfan la foré i armont dann bwa. Pou apéz lo kérmaron banna... Aahh! Koman bann gran Maron, lo pép la foré lé kontan kan i wa sa!

Astér anou i kri for, anlér piton pou di :
Agard! Nou néna Rwayom Maron la Réinion!

̂tres

02/04/2025

Kozman la foré : 30 mars 2025, in bann domoun i don a zot randévou la foré notre dame de la paix...
Pou Kozman la foré! Sé in lidé in fanm la limiér i vé mét la limiér si la foré é fé sort la limiér lé dann kér domoun ☀️
Dann bor rampar, mazinasion pou bann gran Maron,
lémosion té an débordman!

Zour la nout tout la giny in mésaz la foré, la désiné la ékri, la santé! Épisa navé Izabél! Izabél la itiliz sak el la trouvé dann la foré pou désine son loeuvre, PAIX ek in soley i pèt an flér! Sa minm sak nout tout i domann...
Lo bann la manz vant plin, la kozé, la ri, la partaz zot zistwar...Épi lér la rivé pou rakont zistwar rwayom maron...

Zistwar lo rwayom Manzak, lo rwa anlér piton dofé! Zistwar rène Foutsi, son fanm parti 20 an an Maronaz...Zistwar bann rézistan la soubat ziska derniyé pou artrouv zot liberté!
Inn ti zabèy dési mon zépol, pépé té ansanm nou 🤎Nou la parti dann in voyaz dann lo tan ek léspas. Dann zot Rwayom par anndan...
Mi rakont pa zot tout! Azot osi mont ékri zot zistwar la foré ansanm nou!

Ala in ti bout zistwar in zourné Kozman la foré ansanm ! Granmersi Flora pou linvitasion 🤎
Mersi tout bann partisipan pou zot sourire, ek tout sak zot la partazé!