14/11/2024
អ្នកវិភាគ៖ អំពើឆបោករបស់ក្រុមឧកញ៉ានិងមន្ត្រីបក្សកាន់អំណាចគឺចេញពីក្រុមគ្រួសារត្រកូលហ៊ុន
⏰ ផ្សាយថ្ងៃទី១៤ ខែ១១ ឆ្នាំ២០២៤
👉 អានព័ត៌មានលម្អិត៖ https://www.cambodiadaily.com/2024/11/14/15/09/79332/
🔽
អ្នកសង្កេតការណ៍និយាយថា ការលេចចេញនូវអំពើពុករលួយ និងអំពើ #ឆបោកនៅ #កម្ពុជារបស់ក្រុម #ឧកញ៉ា មន្ត្រីរដ្ឋាភិបាល រួមទាំងមន្ត្រីជាន់ខ្ពស់នៃ #គណបក្សប្រជាជនកម្ពុជា គឺសុទ្ធតែមានឫសគល់ចេញពីលោក #ហ៊ុនសែន និងចេញពីចង្កោមក្រុមគ្រួសារត្រកូលហ៊ុនទាំងអស់។
អ្នកវិភាគនយោបាយ និងជាប្រធានវេទិកាពលរដ្ឋ លោក #គឹមសុខ ជំរុញឱ្យស្ថាប័នមានសមត្ថកិច្ចបើកការស៊ើបអង្កេតលើមេដឹកនាំបក្សកាន់អំណាច លោក ហ៊ុន សែន ជុំវិញសំណុំរឿង #បោកប្រាស់ និងការប្រព្រឹត្តអំពើពុករលួយរបស់ក្រុមឧកញ៉ា មន្ត្រីរដ្ឋាភិបាល និងមន្ត្រីគណបក្សប្រជាជនកម្ពុជាទាំងនោះ ជាពិសេសករណីសំណុំរឿងលោក #លីសាម៉េត និងលោក #ដួងតារា ដើម្បីបោសសម្អាតមេគំនិតដែលនៅពីក្រោយនៃអំពើឆបោក និងការប្រព្រឹត្ត #អំពើពុករលួយទាំងនេះ។
លោកថា ជនបោកប្រាស់ដែលត្រូវបានឃាត់ខ្លួនទាំងនេះ សុទ្ធសឹងតែជាមនុស្សដែលជិតស្និទ្ធនឹងលោក ហ៊ុន សែន កន្លងមក ហើយក៏ជាមនុស្សដែលគាត់បានតែងតាំងដោយផ្ទាល់ដែរ ដូចជា លោក លី សាម៉េត គឺត្រូវបានតែងតាំងជាទីប្រឹក្សា និងលោក ដួង តារា ក៏ត្រូវបានតែងតាំងជាជំនួយការរបស់គាត់ដែរ។
លោក គឹម សុខ លើកឡើងថា ការអនុវត្តច្បាប់មិនមែនគ្រាន់តែចាប់ខ្លួនអ្នកប្រព្រឹត្តដែលមានអង្គការចាត់តាំង ហើយចាត់ទុកសំណុំរឿងនេះត្រូវបានបញ្ចប់នោះទេ ព្រោះថាការធ្វើបែបនេះ អំពើឆបោក និងអំពើពុករលួយនៅតែបន្តលេចចេញសាជាថ្មីបន្តទៀតដដែល ត្បិតមេគំនិតក្នុងអំពើឧក្រិដ្ឋទាំងនេះមិនត្រូវបានចាប់ខ្លួនយកមកកាត់ទោសនោះ។
អ្នកវិភាគនយោបាយរូបនេះបញ្ជាក់ថា បើស៊ើបអង្កេតលើលោក ហ៊ុន សែន និងលោក ហ៊ុន ម៉ាណែត ច្បាស់ជារកឃើញនូវចង្កោមក្រុមឧក្រិដ្ឋជនជាច្រើនជាមិនខានដែលកំពុងប្រព្រឹត្តអំពើបោកប្រាស់សព្វថ្ងៃនេះ ព្រោះទាំងឧកញ៉ាដែលរកស៊ីបោកប្រាស់ និងមន្ត្រីខិលខូចមួយចំនួន កំពុងជ្រកក្រោមគណបក្សកាន់អំណាចរបស់ត្រកូលហ៊ុន ប្រព្រឹត្តអំពើទុច្ចរិត ដោយគ្មានស្ថាប័នណាមួយហ៊ានអនុវត្តច្បាប់លើពួកគេឡើយ។
កាលពីថ្ងៃទី១២ ខែវិច្ឆិកា ឆ្នាំ២០២៤ សាលាដំបូងរាជធានីភ្នំពេញ បានចេញសេចក្តីប្រកាសព័ត៌មានមួយស្ដីពីចំណាត់ការលើសំណុំរឿងរបស់លោក លី សាម៉េត ដែលពាក់ព័ន្ធនឹងករណីឆបោករួមជាមួយបក្ខពួកផ្សេងទៀត ដូចជាជំនួយការលោក ហ៊ុន សែន គឺលោក ដួង តារា អតីតអនុប្រធាននាយកដ្ឋានកណ្ដាលនគរបាលយុត្តិធម៌ផ្កាយ៣ លោក មួង ឃីម និងឧកញ៉ា អ៊ុត ធី ផងដែរ។
សេចក្តីប្រកាសព័ត៌មានដដែលនេះបញ្ជាក់ថា លោក ដួង តារា លោក មួង ឃីម និងឧកញ៉ា អ៊ុត ធី ត្រូវបានចោទប្រកាន់ពីបទ ជំនួញឥទ្ធិពលអកម្ម ចំណែកលោក លី សាម៉េត ត្រូវបានចោទប្រកាន់ពីបទ សមគំនិតក្នុងបទជំនួញឥទ្ធិពលអកម្មតាមមាត្រាមួយចំនួននៃក្រមព្រហ្មទណ្ឌ និងមាត្រា៣២ នៃច្បាប់ស្ដីពីការប្រឆាំងអំពើពុករលួយផងដែរ។
បណ្ឌិត មាស នី បញ្ជាក់ថា ករណីនេះបានបង្ហាញពីឆន្ទៈរបស់រដ្ឋាភិបាលក្នុងការដោះស្រាយការរំលោភអំណាច និងធ្វើឱ្យមេដឹកនាំទទួលខុសត្រូវផងដែរ ជាពិសេសនៅពេលដែលវិធានការដែលមានស្រាប់ក្នុងការទប់ស្កាត់ការរំលោភបំពានបែបនេះមិនត្រូវបានវត្តមាន។
ចំណែកនាយកប្រតិបត្តិនៃអង្គការតម្លាភាពកម្ពុជា លោក ប៉ិច ពិសី បានលើកឡើងថា ទិដ្ឋភាពសំខាន់បំផុតនៃសំណុំរឿងនេះ គឺការអនុវត្តប្រកបដោយប្រសិទ្ធភាពប្រឆាំងនឹងជនសង្ស័យ ដើម្បីវែកមុខរកការពិត និងប្រមូលភស្តុតាងប្រឆាំងនឹងពួកគេ៕
