清邁廢氏 Chiang Mai Journey

Name: 清邁廢氏 Chiang Mai Journey
Address: Thapae Road, Chiang Mai, 50200, TH
Telephone: +66828521200

清邁廢氏 - 是兩名移居清邁的親姊妹及兩名泰國籍旅遊KOL創立的旅遊公司及車隊。我們的主要業務是提供清邁/清萊本地遊預訂及酒店飲食推介。牌照號碼 #24/00860

清邁廢氏（Chiang Mai Journey）是兩名移居清邁的親姊妹及兩名泰國籍旅遊KOL創立的旅遊公司及車隊。我們的主要業務是提供清邁/清萊本地遊預訂及酒店飲食推介。藉著我們多年的在地生活經驗，向大家分享清邁/清萊好玩、好吃、好去處。 #清邁包車牌照號碼 #24/00860

WhatsApp：https://wa.me/66947872998
https://www.instagram.com/chiangmaijourney/
LINE：https://line.me/ti/p/RW7w5jj_eU

11/11/2025

[叫GrabFood嘅驚喜發現！一店食勻海南雞飯+脆皮豬肉～]

人太懶，呢排成日叫Grab food，外食次數驟減，不過亦因為咁發掘到唔少平日自己未必會去嘅小店，好似呢間喺古城附近民宅區內嘅超Local海南雞飯店，就有齊遊客去清邁都會想食嘅海南雞飯同脆皮豬肉，兩樣都係水準之上，好啱趕時間嘅遊客可以一次食勻晒～

🍲菜式選擇：
雖然菜單都係好精簡，但除咗有一般海南雞飯店必備嘅海南雞、炸雞、雞肝同雞紅，仲有埋脆皮豬肉同沙爹雞肉串，好適合作為簡餐～

👨🏻‍🍳食物質素：
呢度個海南雞飯係我經常重覆叫嘅菜式，聲稱屬於新加坡馬來西亞風味，雖然食唔出太大分別^^，不過海南雞飯本身無論係雞肉、雞油飯同醬汁都係好食嘅，雞肉厚實、嫩滑唔乾柴，飯粒乾爽唔油膩，雞湯飲落有薑味，我見隔離枱不斷添飲，但我覺得最出色係炸雞，外皮超酥脆，入口有肉汁流出，好食過KFC好多囉^^，建議大家可以點雙併試下～脆皮豬肉肥瘦分明，調味亦唔會過鹹，啱啱炸起個皮脆卜卜，現場食比叫GrabFood更加好味。人多的話可以試埋沙爹雞肉串，係連雞皮一齊烤，比外面一般海南雞飯店用純雞肉好食好多，雞肉厚身嫩滑，香料亦醃製得好夠味，整體嚟講每樣嘢都有水準～

🏡用餐環境：
位置喺古城南面一個民宅區內，外觀完全唔起眼，幾乎無裝修可言，就咁簡單放6-7張枱，但用餐空間寬敞明亮，肉眼所見開放式廚房都都係乾乾淨淨，無冷氣勝在夠通風，唔會太熱太重油煙味～

💰平均消費：
海南雞飯要60銖，脆皮豬肉一碟要159銖，價格比一般Local小店稍為貴少少，但對遊客來講都係好實惠～

📍Chickpea
營業時間：9am-5pm，逢星期三休息
FB：https://www.facebook.com/ggab.ggob
地圖：https://maps.app.goo.gl/9e2S7o9PeK6zdFeS6

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

19/10/2025

[就算唔飲咖啡都要嚟～超好買兼超好影嘅韓系咖啡店]

正如標題講，尼曼路呢間韓系Cafe就算唔飲咖啡都可以去睇下，因為比起咖啡部分，我覺得呢度賣嘅雜貨更加吸引囉～！

店名Fimue喺泰語解作「工藝」，店內所賣嘅都係來自泰國各地包括清邁小型企業及山地部落嘅手工藝品，好似有用天然染料嘅編織品、用珍珠母及水牛等手工雕刻嘅餐具、小鎮生產嘅陶瓷、以傳統方式製作嘅柚木製品等等，店子仲標榜向本地社區支付與其勞動價值相稱嘅合理工資，確保呢啲傳統技可以傳承到下一代，係咪好有良心先，另外店內亦有歐洲進口嘅古董餐具及家具，真係幾多嘢睇㗎～

加分位係貨品陳設方式真係好有Sense，配埋啲道具擺設得好靚好用心，大大增加咗購買慾～話時話，因為部分產品好眼熟，記憶中喺文青藝術村間Enough for Life見過，同老闆娘搭訕發現原來之前係生意夥伴，我自己覺得呢邊貨品種類更多元化，最重要係地點實在太太太方便，好推薦家品控、雜貨控去慢慢睇～

至於咖啡店由老宅改建，裝修帶復古風格，明亮柔和嘅色調搭配木質家具，本身都係一間舒適愜意亦好好坐嘅店，飲品同甜點選項唔算多，英式鬆餅幾好食，招牌Tiramisu特別在點餐後店員會拎住成盤直接喺你桌邊舀落碟，好有儀式感，量超大，味道OK，但我覺得略嫌過於濕潤，記得要搵多個人一齊share，唔係都幾膩下～

📍fimue 피므
營業時間：8am-10pm
FB:
https://www.facebook.com/p/Fimue-coffee-music-social-club-100063491592552/
地圖：https://maps.app.goo.gl/zBXDtGb7DZ8F3MabA

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

20/09/2025

[好食嘅Brunch真係唔嫌多～尼曼又一超人氣早午餐店]

「KLĀY」喺泰文意思解作放鬆，呢間氣氛真係做到好舒適愜意嘅KLĀY cafe，短短兩年間由細舖搬大舖，對比之前我覺得無論食物質素、環境同氛圍確係有提升，位置亦更當眼，值得同大家分享下～

🍳菜式選擇：
有麵包類系列、沙冰碗、沙律、意大利粉、飯類及甜品，每個類別都有幾款可以揀，選項唔算多，但早午餐想食嘅熱門菜式都齊全，亦有純素選項提供，部分菜式融入泰式風味，飲品有超級多選擇～

👩🏻‍🍳食物質素：
大部分食材包括麵包、醬汁、醃菜及用於食物同飲料嘅水果糖漿都係自製，芝士、牛油牛奶同大米秉持永續發展嘅理念，來自清邁本地小型企業，擺盤好靚，用嘅器皿都好靚～我自己最鍾意呢度嘅麵包類系列，「Salmon Benny」嘅自製厚多士好鬆軟，配上濕潤柔軟嘅醃製三文魚、煙韌彈牙嘅Halloumi芝士、蛋白同蛋黃達到完美狀態嘅慢煮半熟蛋，再加少少酸咪咪嘅醃菜中和味道，成個構成好圓滿。法式西多士雖然唔係我喺清邁食過最出色嘅一間，但呢度個楓糖漿無一般店食到咁死甜，其他菜式好似慢煮牛肉泰北蟹膏炒飯同泰式青醬大蝦意大利粉就正常發揮，整體來講都食得過嘅～

🏡用餐環境：
裝修簡約但好有質感，用上清邁最出名嘅工藝品—陶瓷做裝飾，再加上淡雅的色調，成間店無論設計、光線同氛圍我覺得都比舊店出色，店內仲有一個售賣手工陶瓷器皿、香水、精油、護手霜、香薰蠟燭等家居生活產品區域，空氣中瀰漫住陣陣香氣，等上菜時可以去望下～

💰平均收費：
正常尼曼路餐廳價格，連埋飲品每人平均要300-350銖，絕對講唔上平，但環境舒適，品質高，好適合搵個朝早慢吞吞享受一個豐盛嘅早餐～

📍KLĀY cafe
營業時間：星期一 8:30am-6pm、星期二至日 8:30am-8pm
FB：https://www.facebook.com/klaycafechiangmai/
地圖：https://maps.app.goo.gl/4XKqVQmzEtFRqMU16

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

26/08/2025

[等咗兩年終於等到你大嘞～打卡清邁最新茶園]

呢個喺湄安區陶威素彎廟對面、距離清邁市區最近嘅PASSA茶園，係當地一對熱愛品茶嘅夫妻喺兩年前開設，由一開始茶樹光禿禿等到依家終於長大成熟，趁住泰國母親節呢日我哋就帶咗廢老太去實地參觀下～

雖然論佔地面積及規模都比唔上清萊最出名嘅翠峰茶園，但睇得出規劃上頗見用心，附設住宿、咖啡店同餐廳，裝潢採用日式風格，茶園上方建有一條高空走道及360度觀景平台，遊客可以喺山脈環繞嘅茶園內自由參觀。放眼望去，有山有綠樹，風景都唔錯，亦有多角度可以打卡影相，最抵讚係連攝影道具都幫大家準備埋，有色彩繽紛嘅日式遮陽傘同採茶編織籃可以免費借用，好貼心囉！～

至於餐廳同咖啡店都係共用一個Menu，有各式茶飲、蛋糕甜點同泰菜，仲有茶葉沙律、茶葉煎蛋捲等以茶葉入饌嘅特色菜，用餐位置分布喺唔同區域，有一般餐桌亦有日式榻榻米房。大推爆漿綠茶包，用叉輕輕一舀，綠茶餡料好像熔岩咁流出來，甜度恰到好處，炸甜竹筍同炸茶葉沙律都好食，唯獨係個蝦仁炒飯好普通，唔食無損失！不過要留意，每逢星期六日都超級多人，最好安排平日前往，我哋到訪呢日碰巧係泰國母親節，人超多，有心理準備上菜速度比較慢，亦有出錯菜嘅情況，但撇除呢點不失為去湄康蓬村途中一個好唔錯的打卡景點～

📍PASSA ไร่ชาผัสสะ Tea Plantation at Mae On
營業時間：8am-6pm
FB：https://www.facebook.com/passaatmaeon/
地圖：https://maps.app.goo.gl/Le6FavmeuR9Knx1f9

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

06/08/2025

[唔止係網美，帶長者去都好啱㗎～]

喺清邁湄登區嘅天使瀑布公園（Dantewada Land of Angels Waterfall Park）雖然唔係新景點，但開業到依家一直好受遊客歡迎，唔少泰國本地人都會去打卡，因為之前一直未有機會帶廢老太去，趁早排得閒就陪佢去咗一次，計劃緊清邁孝道遊嘅朋友都可以考慮下呢度～

呢個天使瀑布公園以瀑布和花卉園林為主題，佔地極廣，不過好老實講，比起人工造景，我自己更鍾意天然景觀，但去過之後真係不得不讚整體環境非常綠化，好幾座巨大壯觀嘅人工瀑布睇落都好逼真，配合水霧和日光營造出猶如仙境般嘅場景，廢老太呢啲熟齡網美都影得好開心，表示好滿意喎：「個環境好靚，有好多位影位，又唔使行好多路，入場費80銖係抵嘅，不過地面好濕滑，一定要著對防滑嘅鞋。」

另外要讚下園區喺規劃上好用心，有清晰嘅路徑指引，全程只要跟住指示牌繞一圈即可
，設施亦非常齊全，包括有迷你農場（有山羊、兔仔和小雞，可以買食物餵動物，但氣味比較重^^）、戶外兒童遊樂區（太熱，唔見有小朋友玩^^）、紀念品商店同小食攤檔（可看性一般，但大廢竟然有收穫！XD）。附設嘅餐廳舒適好坐，有冷氣，菜式選擇多，有泰菜同西菜供應，以景點餐廳來講水準好唔錯，價格亦合理。唯一就係天使瀑布公園距離市區約45-60分鐘車程，建議連同清邁藍廟、黏黏瀑布等景點結合成一日遊前往～

📍天使瀑布公園 Dantewada Land of Angels Waterfall Park
營業時間：08:00-18:00
FB：https://www.facebook.com/profile.php?id=100063649148356 #
地圖：https://maps.app.goo.gl/yaPnodwSc2WN73Sk7
入場費：80銖/位，5歲以下兒童免費入場

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

24/07/2025

[歐陸風洋房泰菜餐廳～廢老太&friends都會啱食]

今日分享嘅呢間餐廳推薦原因好簡單：如果要同廢老太呢種年紀嘅「大人」出遊，最緊要係坐得舒服又啱食，呢度就符合咗呢兩大條件～

🍲菜式選擇：
菜單超全面，除咗有泰北料理，亦有好多大眾化口味嘅傳統泰菜，好似泰式蒸檸檬鱸魚、腰果炒雞丁、粉絲蝦煲、椰汁雞湯、菠蘿炒飯、蟹肉煎蛋捲、黃咖喱海鮮、椒鹽炒五花肉等等都係廢老太&friends會啱食，素食者都有唔少選擇。另外餐廳亦有牛排、意粉呢類西餐供應，無論係有小朋友同長者嘅家庭又或者第一次去清邁嘅人都適合～

👨🏻‍🍳食物質素：
花園洋房格局嘅泰式餐廳，擺盤好靚好華麗，用料食得出係優質嘅，泰式生蝦比平時食到嘅大隻好多，肉質爽彈，個泰式海鮮汁加咗Wasabi，再配埋酸酸甜甜嘅醃蒜頭，增加咗整體層次風味～冬蔭公酸辣比例平衡，唔會太刺激太嗆喉，飲到有椰青水清甜嘅味道，加椰青肉效果都幾好，廢老太話好滿意～羅勒炒燉牛肉見大大件肉仲擔心會乾柴，但估唔到燜得好嫩腍，真正無牙都食到XD～醬油炒香菇呢個都有驚喜，冬菇口感緊實，帶少少甜味，整體來準菜式水準都好唔錯～

🏡用餐環境：
距離古城同尼曼都唔遠，建築內部採用分層式設計，樓底高低錯落，劃分成好幾個用餐區域，亦有一個好適合大班人聚餐嘅私人包廂～裝修係偏泰味嘅歐陸風，即係洋化得來又睇得出係泰國^^，入口有盞超巨型水晶燈，每張枱、每個角落甚至洗手間都有鮮花裝飾，廢老太呢種熟齡Auntie輩好鍾意，外面個庭院亦布置得好靚，員工服務都貼心周到～

💰平均收費：
以清邁標準來說，價格比一般餐廳偏高，主菜類要300、400銖，埋單另加7%稅金，平均每人500-600銖，對於遊客我覺得係可以接受的，坐得舒服，啱食先係最緊要～

📍Baan Mae Cafe & Restaurant
營業時間：11am–10pm
FB：https://www.facebook.com/Baanmae789 #
地圖：https://maps.app.goo.gl/YU3m8BsqV11VrtbQ8

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

07/07/2025

[夜市區新派泰菜餐廳～好食又好啱遊客食]

雖然可能無人留意到，但都交待下先，呢幾個月少出post人懶就固然啦^^，主要係我同大廢試咗唔少餐廳都覺得好一般，呢日喺夜市區終於搵到間新派泰菜餐廳值得同大家分享下，Yeah～

🍲菜式選擇：
提供改良過嘅新派泰式，成個餐牌連甜品加埋唔夠30款，除咗有柚子沙律、泰式炒河粉、冬陰功、泰式炒通菜、打拋豬、青咖喱雞、蟹肉炒飯、泰北豬肉咖哩呢類好迎合到遊客喜好嘅菜式，亦有餐廳自己創作嘅新菜，飲品方面亦有唔少精釀啤酒同葡萄酒，好配合到外籍食客嘅需求～

👨🏻‍🍳食物質素：
餐廳開業半年就迅速收穫超高好評，試過發現又真係有原因嘅～雖然話擺明做遊客生意，餐牌基本上都係英文，但整體口味上有盡量還原，淨係偏甜呢點就已經好有泰菜風味^^～最驚喜係個脆皮豬肉，外層炸得好酥脆，肉質好似手撕豬肉，唔乾柴，調味本身略鹹，但加咗自製甜橘子醬又啱啱好，青芒果、香茅、紅蔥絲、芫荽等爽口配菜亦發揮咗解膩作用，同平時食到嘅脆皮豬肉好唔同，呢個好有特色～其他菜式好似泰式涼伴蝦沙律、蟹肉炒飯、橘子雞、炸流心蛋同蠔仔奄列都係好食嘅，唯獨係個Scallop Ceviche，吸引我點呢道菜係見有評論話用合成肉，令我超好奇想求證一下^^，個特製泰式海鮮汁本身酸酸辣辣係好味嘅，但嗰幾片帶子就好肯定唔係平時食開嘅日本北海道刺身級，店員話來自中國，口感比魚蛋更有彈性，最大問題係腥味好重，呢個就唔推薦大家叫～

🏡用餐環境：
位置靠近清邁夜市，店面唔大，座位唔夠30個，裝修好雅緻，樓底夠高，坐得好舒服，服務都非常好，上菜速度夠快，我哋專登揀其他遊客行市集嘅周末下午去，人唔多，但如果一大班人最好預先訂位～

💰平均收費：
大部分菜式都係200銖以下，真心唔貴，菜量雖然唔算太大，可以一次過試多幾款都係好事嚟嘅～

📍CHOW CHOW Thai Contemporary Food and Kitchen
營業時間：11:30am–3pm、6pm–10pm，逢星期一休息
FB：https://www.facebook.com/profile.php?id=61569716652267
地圖：https://maps.app.goo.gl/uGWdiiup9siY7tAd7

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

10/06/2025

📣 給準備來清邁的旅人，如果還未訂酒店可以參考我們這個全新製作的清邁新開業酒店&分區酒店推薦～

泰國消費低，出名抵玩，對比起歐洲、日本等很多國家的旅遊城市，清邁住宿可以說是CP值非常高，即使入住高檔的國際連鎖五星級酒店或設計感十足的精品酒店，房價都要比很多地方便宜，住宿類型也相當多元化，由五星級奢華酒店、特色酒店、平價青年旅館、氣氛浪漫的情侶Pool Villa別墅、設有多個臥室的團體Pool Villa別墅以至適合帶孩子入住的親子酒店都一一俱備。我們整理了這份【2025】泰國清邁新開業酒店名單以及各分區酒店推介，無論是初次自助遊清邁、喜歡嘗鮮入住新酒店或是帶小孩的家庭客，都可以選擇到合適的清邁住宿。

🏨 2025 新開幕酒店推介
https://chiangmaijourney.com/chiang_mai_newly_opened_hotels

🏨 Top 10 五星級奢華酒店
https://chiangmaijourney.com/top-10-best-luxury-hotels-in-chiang-mai

🏨 特色酒店推介
https://chiangmaijourney.com/chiang-mai-unique-hotels

🏨 親子酒店推介
https://chiangmaijourney.com/family_friendly_hotels

🏚 Villa 泳池別墅

◎ 市區多房Pool Villa
https://chiangmaijourney.com/family-friendly-chiang-mai-pool-villas

◎ 情侶浪漫Pool Villa
https://chiangmaijourney.com/chiang-mai-villas

🏨 市區高CP值酒店推介

◎ 夜市區
https://chiangmaijourney.com/recommended-hotels-in-chiangmai-night-market

◎ 清邁古城區
https://chiangmaijourney.com/recommended-hotels-in-chiangmai-old-city

◎ 清邁尼曼區
https://chiangmaijourney.com/nimmanareahotels

◎ 清邁河畔區
https://chiangmaijourney.com/recommended-hotels-in-chiangmai-ping-riverside

#清邁飯店推介 #清邁新開業酒店推介 #泰國清邁 #清邁酒店推介 #清邁新酒店推介 #清邁新酒店名單 #清邁酒店 #清邁推介 #清邁古城酒店 #清邁夜市酒店 #清邁河畔酒店 #清邁尼曼酒店 #清邁住宿 #清邁平價酒店 #清邁親子酒店 #清邁親子遊住宿 #2025清邁酒店

09/05/2025

[南邦短打遊ep.6-1：南邦最IGable嘅日本風寺廟～]

《消失咗一年嘅清邁短打遊系列再出現嘞，第六炮係距離清邁兩個鐘車程、好純樸好有老味道嘅南邦府(Lampang)～南邦係繼清萊同清邁之後泰北第三大城，有千年悠久歷史，係一個有故事嘅老城市，我同大廢都超鍾意呢度，淨係今年已經去咗兩次食同Hea。因為路程唔遠，大家可以安排即日返往，如果有時間仲可以玩個兩日一夜㗎～》

泰國每個城市都有地標性嘅寺廟，曼谷有鄭王廟、清邁有素貼寺、清萊有白廟，至於南邦呢，以前就有空中寺廟(呢度呀👉 https://www.facebook.com/chiangmaijourney/posts/2196425387241793 )，不過依家更多泰國人係會專登去佛禪山寺打卡～

呢個南邦最新網紅打卡景點分為地面同山頂兩部分，遊客需要坐收費接駁車上山。佢最大特色係建於山頂嘅區域一邊係傳統泰式風格，另一邊則參照日式寺院建造～事緣寺廟住持喺2013年某晚夢見日本高德院鎌倉大佛降臨喺佛禪山山巔，仲聽到有聲音呼喚佢建造一尊佛像，呢座複製版鎌倉大佛最終喺2021年竣工，銅像高23米、寬14米，高高矗立在山頂，非常壯觀宏偉。

寺廟周邊布置都充滿日式元素，龍貓、地藏小菩薩、鳥居隧道、燈籠、風鈴、繪馬甚至有稻荷狐狸陶瓷，真係有種一秒去咗日本嘅錯覺！大佛下面仲有咖啡店同紀念品店，有周邊產品可以買走。至於山頂另一邊嘅泰式寺廟以古蘭納風格建造，氣氛莊嚴肅穆，視野開闊嘅觀景台係寺廟一大亮點，可以180度俯瞰稻田和山脈嘅秀麗景色，唔少人都專程早起去睇日出同霧海㗎，打算喺南邦兩日一夜嘅朋友可以去體驗一下～

📍佛禪山寺 Wat Prathat Doi Prachan
開放時間：06:30-16:30
FB：https://www.facebook.com/watdoiprajhana
地圖：https://maps.app.goo.gl/wRV9jdj6ajXu719n9

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

10/04/2025

[平河畔私房女廚新餐廳～必試超驚豔Pad Thai]

其實呢，對於全球人去泰國都會食嘅Pad Thai，我自己一直係無感嘅^^，唔抗拒但唔會主動叫，朋友叫咗最多就黐兩啖，呢日無意中俾我食到一個超驚豔嘅Pad Thai～

交待返少少餐廳背景先，呢間「Tub Ping」由女廚P’Koi主理，大廚喺杭東區間私房菜餐廳「Anjakin Villa」每日只接待一枱客，傳聞訂位係要排到一年後，堅誇張！大約半年前P’Koi喺平河畔開設咗呢間新店，私房菜餐廳提供嘅拿手菜都食得到，可以唔使再排餐死，其中就包括我哋一致讚好嘅Pad Thai，我對呢道國民美食都改觀咗～

🍲菜式選擇：
簡介上寫明係「Home cooking with a difference」，所以呢度嘅泰菜同西菜都幾獨特，除咗有私房菜餐廳相同嘅招牌菜之外，亦有大廚P’Koi重新設計嘅新菜式。菜單算精簡，但種類多樣化，有沙律、意粉、肉扒、咖喱、泰式小炒同甜品～

👩🏻‍🍳食物質素：
總括來講水準中上，食得出用料唔差，好似個沙嗲豬扒就超厚身，燒烤前用香料、椰奶和烤花生醃製，入口超多汁，肉鬆軟唔乾硬，醬汁就改良自爪哇沙嗲，有超重花生醬香味，亦食到有黃芥辣嘅味道，勁惹味，廢老太直頭用來撈白飯食^^～咖喱類最出名係牛頰肉青咖喱，但聽聞好鬼辣，喺侍應建議下改為紅咖喱油封鴨，咖喱醬係大廚自己做，味道好香濃，同皮酥肉嫩嘅油封鴨都幾夾，不過咖喱就無侍應講到咁溫和，對我呢種BB辣水平嘅人來講仲係好辣^^，同類人慎點～相比菜單上其他菜式，同行朋友I點嘅Pad Thai算係最平平無奇，估唔到出奇地好食，個Pad Thai醬汁比平日食到嘅黏稠，但又唔會炒到一pat pat，乾濕度恰到好處，每條金邊粉都充分吸收到醬汁醇厚嘅味道，入口甜、酸、鹹均勻，係有被驚豔到，不過帶定頭盔先，有可能係我平時食得少，大家自己去試試比較下^^～

🏡用餐環境：
位置喺Pa Daet區平河沿岸，附近無景點，對遊客來講有少少吊腳，要專登坐車去～氣氛唔錯，有室內和室外兩個用餐區域，內部木系裝修簡潔但雅緻，有鮮花點綴、有充足天然光，睇得出店主係有品味，座位都坐得舒服，好啱hea住食。室外就面向平河景，眼力好可以遠眺魏功甘古城，不過呢排天氣咁熱，要等年尾涼季先掂～

💰平均消費：
中價位餐廳，菜式平均200-300銖，價格同食材品質、味道、擺盤同用餐環境相比，可接受～

📍Tub Ping
營業時間：10am-3pm、5pm-10pm
FB：https://www.facebook.com/profile.php?id=61565116894460
地圖：https://maps.app.goo.gl/Lp8BF2PMjNUj3fjVA

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

22/03/2025

[日常食堂分享～有靈魂嘅家常泰菜小店]

平河畔一間我同大廢不時都會幫襯嘅泰式家常菜餐廳，雖然無名氣加持，亦無打卡位加分，但我自己好認同部分Google評論所講，出品真係贏過唔少清邁米芝蓮推薦餐廳㗎～

🍲菜式選擇：
以家常泰菜為主，有泰北拼盤、青木瓜沙律拼盤、泰北豬肉咖喱、椰漿帕能咖哩、青咖喱三文魚配烤餅、泰式烤雞、烤豬頸肉、炸豬皮炒飯、椰汁雞湯、泰式炒金邊粉等等遊客一定會鍾意嘅經典泰國菜，亦有漢堡、烤豬肋骨、墨西哥牛肉薄餅、沙律及意粉等西式選擇，另外仲有個素食餐單，款式算多～

🧑🏻‍🍳食物質素：
唔係超級驚艷嗰種，但整體都係好好食、無中伏(泰菜only，西餐我自己無乜興趣試^^)，用料新鮮，調味唔會過份重手，辣度可以控制，對我呢類BB辣級數嘅人非常友好～青咖喱同泰北咖喱麵都係每次必食，咖喱膽有自家秘方，味道真係唔同，食落有深度同有層次得多，誇張講係有靈魂嘅咖喱，比很多餐廳都要用心製作，最受歡迎嘅黑蒜叉燒泰北咖喱麵要早去先有，但牛肉都唔差，用嘅係牛𦟌肉，麵條亦好吸汁，至於青咖喱係我食過之中嘅Top 3～另外壓軸係招牌芒果Cheesecake，雖然質感我覺得比較似布甸(？)，但呢點唔重要，重點係好味嘅XD～

🏡用餐環境：
位置喺平河畔最熱鬧嘅Wat Ket地區，即係The Good View Bar & Restaurant附近，兩層高黃色蘭納小屋外面有個種滿綠植嘅花園，分為冷氣房、半開放式及戶外花園三個用餐區域，另一邊有間小小嘅Cafe，環境雅緻舒適，缺點係收8:30pm實在太早，唔太配合到我食晚飯嘅時間XD～

💰平均消費：
菜式大約150-250銖，比街邊檔貴少少，但水準高，環境乾淨企理，飲品一杯都係60-70銖，價格合理～

📍Punn Toh
營業時間：星期一至六 11:30am-8:30pm，逢星期日休息
FB：https://www.facebook.com/punntoh
地圖：https://maps.app.goo.gl/WuVdJC1ofqChKwZv6

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

06/03/2025

[終於唔再係周末先有嘞～尼曼路周五限定新市集]

周末嚟清邁的話會好鬼忙，Jing Jai Market、椰子市集、周六夜市同周日夜市全部都堆晒喺呢兩日舉行，好嘞好嘞，依家開始尼曼路呢邊都有個新市集，等大家星期五晚都有節目～

話說呢個「Nimman 6 Walking Street」其實係回魂版，早喺2020年曾經短暫出現過，可惜無耐之後因為疫情而取消，重生後日期地點都無變，一樣係每逢星期五下午5點至晚上10點喺尼曼路6巷舉行，即係Travelodge Nimman對出位置。各式攤檔由The Nimmana屋苑對出一直延伸至Prasert Land入口處，規劃為飲食區、餐車區、手作雜貨區及二手物品區，號稱加加埋埋有600個攤檔，雖然我去呢日肉眼所見就唔覺有咁多^^，不過以一個新開幕嘅夜市來講算係幾旺場，泰國本地人比遊客仲要多～

行咗兩圈，感覺似係清邁夜市+周日夜市+清邁大學夜市嘅混合體，一手衣物、二手衣物、文創手作、工藝品、首飾樣樣都有，貨品質素就唔算特別精，如果無節目去兜個圈都無妨嘅～最精彩亦最吸引係飲食攤檔，款式超多，價位比清邁夜市稍為平少少，青木瓜沙律、芒果糯米飯、泰式炒金邊粉、烤泰北腸、炭燒豬頸肉、脆炸豬肉、手沖咖啡、緬甸油炸物、泰式蠔仔煎蛋、各式飲品甜點等等等等有齊晒，6:30pm-7:30pm呢段時間特別多人，好多住附近嘅街坊都過來買晚餐，主辦單位喺舞台區設置枱凳俾人坐低一邊聽歌一邊食嘢，不過就要忍受耳膜痛，如果住喺尼曼區建議買走返酒店開餐～

📍Walking Street Nimman Six
營業時間：逢星期五5pm-10pm
FB：https://www.facebook.com/profile.php?id=61573493488352
地圖：https://maps.app.goo.gl/XQnjDXhRHfknf8ZQ6

==========

🚌 清邁/泰北包車行程推介 - (南邦 / 湄康蓬村 / 蒙占山 / Elefin Farm & Cafe大象咖啡廳 / 茵他儂國家公園 / 清道 / 堆沙革 / 清萊 / 金三角 / 象山咖啡村 / 拜鎮
https://chiangmaijourney.com/chiang_mai_chartered_itinerary/

==========

▼Follow us▼
IG: instagram.com/chiangmaijourney/

#清邁 #清邁包車 #清邁美食 #清邁市集 #清邁旅遊 #清邁自由行 #廢氏清邁私生活 #清邁司機 #清邁租車 #清邁自駕 #清邁酒店推介 #清邁酒店 #露營 #清萊 #清萊酒店推介 #清萊酒店 #清萊包車 #清邁露營

ที่อยู่

Thapae Road
Chiang Mai
50200

เบอร์โทรศัพท์

+66828521200

เว็บไซต์

http://www.chiangmaijourney.com/

แจ้งเตือน

รับทราบข่าวสารและโปรโมชั่นของ 清邁廢氏 Chiang Mai Journeyผ่านทางอีเมล์ของคุณ เราจะเก็บข้อมูลของคุณเป็นความลับ คุณสามารถกดยกเลิกการติดตามได้ตลอดเวลา

ติดต่อ ธุรกิจของเรา

ส่งข้อความของคุณถึง 清邁廢氏 Chiang Mai Journey:

ชื่อ:

ที่อยู่อีเมล์:

ข้อความ:

ต้องการให้ธุรกิจของคุณ ธุรกิจ ขึ้นเป็นอันดับหนึ่ง สำนักงานตัวแทนจัดการท่องเที่ยว ใน Chiang Mai?