28/07/2024
Guide ဘဝဇာတ်ကြောင်း တစေ့တစောင်း အပိုင်း (၄)
Guide ရယ်လို့ ဖြစ်လာခဲ့ခြင်း
မှတ်မိသလောက် အချိန်ကလည်း မိုးတွင်းကာလ မြန်မာနိုင်ငံမှာတော့ Low Season ပေါ့ဗျာ… ခရီးသွားဧည့်သည်တွေပါးတဲ့ အချိန် ဘယ်ခရီးစဉ်မှ ရောင်းစရာမရှိတဲ့ အချိန်ပေါ့……
ဒါပေမယ့် ကျွန်တော်တို့ မြန်မာနိုင်ငံ မြေပြင်အနေအထားအရ အောက်ပြည်အောက်ရွာရယ် တောင်ပေါ်ဒေသတွေက မိုးများပြီးတော့ တစ်နေရာကတော့ မိုးတောင်မရှိသလောက်ပါပဲ
ထိုအရပ်ကအညာဒေသ …မိုးအရမ်းနည်းပါတယ် အရိမဒ္ဒနာပူရတစ်ချိန်က တမ္ပဒီပ ရှေးအခါ ပေါက္ကံ ပြည်ရယ်လို့ ခေါ်ဆိုတဲ့ ပုဂံမှာ ရာသီဥတုလေး က သာယာလို့နေပါတယ်
နောက်တစ်ချက် မိုးတွင်းဆို 4star 5star Hotel ကြီးတွေက အပြိုင်အဆိုင်စျေးချတဲ့အချိန်ဆိုတော့ ပုဂံခရီးစဉ်လေး အသက်သွင်းဖို့ စိတ်ကူးဖန်လာတော့တာပါပဲ
ခရီးစဉ်စဆွဲတော့ ပုဂံ-ပုပ္ပါး-စွယ်တော်လေးဆူ
Guide ဘဝ မှာ သမိုင်းကြောင်း အရှင်းပြရဆုံး နေရာဆိုတာ ပုဂံ အစစ်ပါပဲ ရာဇဝင် သမိုင်း ခုနှစ်သက္ကရာဇ်ကစလို့ မြန်မာမင်းတွေရဲ့ အကြောင်းတွေကစလို့ အကုန်လေ့လာရပါတော့တယ်
Tour တော်တော်များကတော့ ပုဂံGuide ခေါ်လိုက်တယ် ဒါပေမယ့်ကျနော်ကတော့ မခေါ်ချင်ဘူး ကိုယ်တိုင်ကိုယ်ကျ ရှင်းပြချင်တာ တစ်ကြောင်း နောက်ပြီး စဉ်းစားကြည့်ရင် ကိုယ်တိုင် ကလည်း Guide ဖြစ်နေပီ မရှင်းပြ မသိရင် Guide မဟုတ်သလိုပဲလေဆိုတော့
ကိုယ်တိုင် တစ်ယောက်ထဲပဲ သွားဖြစ်တယ် ခရီးလေးစထွက်ပြီပေါ့ဗျာ အရင်ဆုံး ပုဂံနယ်ကို ကျနော်အကောင်းဆုံးကြီးစိုးမယ်ဆိုပြီး အတူလက်တွဲလုပ်ကိုင်ရမဲ့ လုပ်ငန်းရှင်တွေ ချိတ်ရတာပေါ့ဗျာ…….
မနက်စာဆို ပိုင်ထန်းတဲလို့ခေါ်တဲ့ဆိုင်မှာ အညာဒေသစာမနက်စာလေးတွေ ရအောင် စီစဉ်တယ်
(ပိုင်ထန်းတဲပိုင်ရှင် ပိုင်အဘကြီးရဲ့သား ကိုချစ်ဦးကိုသတိတောင်ရမိတယ်)
ဟိုတယ်တွေကလည်း မိုးတွင်းဆိုတော့ လူမရှိတော့ Early check in တွေ ပေးတဲ့ အချိန် အခန်း ၂၀ ဆို ၂၀ လုံးပေးတာပေါ့ ကျနော်စလုပ်ခဲ့တဲ့ Hotel တွေဆို Famous 1,2 , Gracious Bagan, Bagan Scene, Bagan Wynn, Bagan Land Mark များလွန်းလို့ မှတ်တောင် မမှတ်မိတော့ဘူး
Hotel ပေးနားပြီးမှ အေးဆေး ပုဂံလည်ကြတာ
Restaurant တွေဆို နာမည်ကြီး Buffet ဆိုင်တွေ အခုတောင်စားချင်လာပြီ
မြို့သစ်ကဆိုရင် မာလာသိင်္ဂီအန်တီမီးဆိုရင် ကျွန်တော်တို့ကို အရမ်းချစ်တာ
နောက် ဦးသီလ , ဘိုထက် (တရုတ်စာဆိုင်),
ရှင်းရှင်းလေး ,ပွင့်မလာ , နှမ်းဖတ်ချဉ် အများကြီး ကျွန်တော်တို့သုံးခဲ့ရတယ်
လက်ပန်းချီဆွဲတဲ့သူတွေဆို ဟိုတယ်ထိ လာဆွဲပေးတယ် ဘုရားမှာ သက်သက် အချိန်ကုန်မှာဆိုးလို့ပေါ့ဗျာ
နောက် တန့်ကြည်တောင်သွားဖို့ စက်လှေ သမားတွေ တောင်တက်ကားသမားတွေက စလို့ လာမိတ်ဆက်ကြတယ် ဗူးဘုရားရောက်ပြီဆိုတာနဲ့ စက်လှေလေးတစ်ခါငှါးရဖို့ အညာလက်ဆောင်တွေနဲ့ မုန့်တွေကထည့်ထည့်ပေးတာ
( အမြဲတမ်း ငှါးအောင်ပေါ့ဗျာ ကိုကျော်နိုင်ဦး ရဲ့ စက်လှေတွေပဲအဓိကသုံးခဲ့တယ်)
သမိုင်းကြောင်းတွေ လိုက်ရှင်းပြရင် Guide လိုရင်ခေါ်ဖို့ လာချိတ်ကြတဲ့ Guide တွေ အများကြီးပေါ့ဗျာ
ဒါပေမယ့်အဲ့အချိန် တစ်ခုသွားစဉ်းစားမိတာ ရုံးမှာပုဂံသမိုင်းအကုန်ရတာ အဲ့တုန်းက ကျွန်တော်တစ်ယောက်ထဲရှိတာထင်တယ် နောက် ကျနော်မအားတာဖြစ်ဖြစ် နောက်ခရီးတစ်ခုရောက်နေတဲ့အခါ ဘယ်သူကို့အစားထိုးရမလဲစဉ်းစားမိတယ်
အဲ့ချိန်မှာ ကျနော်သဘောကျပြီးစိတ်တိုင်းကျတဲ့ Guide တစ်ယောက်ရှာတွေ့ခဲ့တယ် ပုဂံသားရန်နိုင်တဲ့ တော်ပါတယ် သမိုင်းကြောင်းရှင်းပြတာရော ဧည့်သည်ထိန်းတာရော ဂရုစိုက်တာရော သူအကုန် လုပ်ပေးရှာတယ်
နောက် ပုဂံမြို့က ရွှေဝါသိန်းလက်ဆောင် ပစ္စည်းဆိုင် ကျနော်လာရင်ပြာပြာသလဲနဲ့ကိုကြိုရှာတယ်
နောက် ပုန်းရည်ကြီးဆိုင်တွေ ဆိုင်မှာကားထိုးပေးဖို့လာချိတ်ကြတယ် ကျွန်တော်ကလည်း တကယ်ကောင်းတဲ့ဆိုင်မှာထိုးပေးတာမျိုးလေ
နောက်တစ်ခုက ကျနော်ဘယ်တော့မှမလုပ်တဲ့ အကျင့် Guide ဆိုပေမယ့် တစ်ခါမှ % နဲ့ပိုက်ဆံပြန်မတောင်းဘူး ဒေသထွက်လေးတွေ မုန့်လေးတွေ စားစရာ အဝတ်စားအသုံးအဆောင် လေးတွေ လက်ဆောင်ထည့်ပေးရင်ယူတယ်
(ကျနော့်စိတ်ကိုသိတော့ လက်ဆောင်တွေ အများကြီးအမြဲတမ်းရတယ်)
တချို့ဆိုင်တွေကတော့ ကျနော့်ကို သက်သက်ဆိုပြီး စာအိတ်လေးတွေနဲ့ မုန့်ဖိုးထည့်ထည့်ပေးကြတယ် ကိုင်းကျွန်းမှီကျွန်းကိုင်းမှီပေါ့ဗျာ
ကျွန်တော်နဲ့ ချိတ်ဆက်လုပ်ကိုင်တော့ သူတို့ဆိုင် တွေ Hotel တွေ စက်လှေကား စသဖြင့် အကုန်အလုပ်ဖြစ်ကြတော့ နောက်ပိုင်းခြင်းတွေလက်ဆောင်တွေထိ အိမ်အရောက်ပို့ကြတာပေါ့ဗျာ
ပုဂံမှာ နှံ့အောင်လည်ပြီးနောက်ပုပ္ပါးမှာ ဝင်ပြီး အေးဆေးရန်ကုန်ခရီးဆက်ကြသည်ပေါ့
ဒါနဲ့ နောက်အပိုင်းမှာတော့ ပုဂံမှာမျက်ရည်ကျခဲ့ရတဲ့ ခရီးစဉ်လေးတစ်ခု………….
ဆက်လက် ရေးသားပါဦးမည်…..
