الميناء العتيق ببنزرت

10/06/2025

✊واقفين صفّ واحد مع شعب فلسطين المقاوم.
قلوبنا معاكم في كل لحظة صمود، والحقّ ديما ينتصر مهما طال الطريق.


يمكن متابعة تحرك قافلة الصمود لحظة بلحظة من خلال الرابط التالي: https://al-soumoud-convoy.com

05/06/2025

🐑✨ عيدكم مبروك من الميناء العتيق ببنزرت
هنا، العيد يتحسّ… في نظرة البحّارة، في ضحكة طفل، وفي سنة ما زلنا نحيوها رغم الوجيعة.
نفرحوا، نعم… ونذبحوا، نعم… لأنو إحياء شعائر الله من تقوى القلوب.
أما فرحتنا تبقى ناقصة…
💔 على خاطر في فلسطين، فما عباد محرومة حتى من الأمان، من العيد، من الحياة.
دعائنا معاهم، وقلوبنا معاهم، وربّي ينصرهم ويكتب النصر قريب.

#البحارة

29/05/2025

قبل العيد الكبير، الناس الكل تحكي على الكبش…
أما البحّار عينيه في البحر وقلبه مع صغارو يخمّم فيهم:
"كيفاش نوفّر العلوش؟ خليها علي ربي، المدخول على قدّو، والمصروف برشا!"
كي يطلع الفجر، يشدّ طريقه للبحر.
هو والبحر... حكاية قديمة تتعاود كل يوم، تبدأ بصمت وتنتهي بدعاء، يغمّض عينيه ويدعي من أعماق قلبه:
اللهم إنا توكّلنا عليك، اللهم ارزقنا من فضلك رزقًا طيبًا مباركًا، لا فقر بعده، ولا حاجة إلى أحدٍ سواك، وافتح لنا أبواب الخير، وبارك لنا في أرزاقنا وأعمالنا.
ومن هونا تبدأ الرحلة…
رحلة كل يوم، بين الموج والريح، بين الخوف والأمل، رحلة البحّار اللي ما يستسلمش، خاطر وراه صغار يستنّاو، ومرا صابرة وواقفـة معاه في الظل.

✊ تحية لكل رجال البحر
وتحية لكل نساء واقفات في الصمت، بالصبر والدعاء.


#بحّارة_الميناء_العتيق

26/05/2025

اللهم إنّا توكلنا عليك، ولا حول لنا ولا قوة إلا بك، فارزقنا رزقًا طيبًا مباركًا من حيث لا نحتسب.

25/05/2025

رجوع الفرحة بفضل التضامن والرجولية

الحمد لله، إلّي بفضل رحمته، وبفضل وقفة الرجال ، إخواتنا رجعوا لحضن عيلاتهم، والفرحة رجعت لقلوبنا بعد أيّام صعيبة.
هاك اللحظة إلّي تتلمّ فيها العايلة وتتنحّى الغصّة من القلوب، ما تتشراش بمال الدنيا.
الّي يفك كربة على خوه في الدنيا، ربي يفك عليه كرب في الآخرة.
ديما يد وحدة، ديما سند لبعضنا، وربي ما يعاودهاش غصّرة لا لينا ولا لغيرنا.







#بنزرت

24/05/2025