29/04/2024
أبواب مدينة تونس🇹🇳
: مدينة تونس الحالية المعروفة بالمدينة العربي ولا المدينة العتيقة يعود الفضل في بناؤها و تأسيسها للحفصيين الي حكموا تونس بين 1229 -1574 و موش للعثمانيين كيما يظن معظم الناس .. المدينة هذي فيها 24 باب أما ماقعدوا منهم كان 5 بيبان فقط و من أبرزهم :
1 - باب الجزيرة : عل خاطر إهز و إحل على شبه جزيرة الوطن القبلي .
2- باب سيدي عبد السلام : نسبة للولي الصالح سيدي عبد السلام الأسمر 1475-1573، الي يعتبر من أهم علماء الإسلام في القرن 16.
3 - باب سويقة تصغير لكلمة ساقية الي كانت موجودة فيها و يستعملوها الناس لسقي الاشجار و النباتات في المدينة .
4 - باب عليوة تبنى بين 1349-1369 تسمى هكاكة لأنو جاي في بلاصة عالية .
5 - باب بنات تبنى بين 1228 -1249 لأنو السلطان أبو زكريا الحفصي (1223-1249) استبنى بنات عدوه يحي بن غانية الثلاثة بعد ماقتلوا ورباهم في قصر قريب من الباب .
6 - باب المنارة تبنى عام 1276م و تسمى هكاكة نسبة لفانوس كان معلق فيه و يشعل طول الليل لهداية المارة .
7 - باب الجديد تبنى عام 1278 و كان يتسمى باب الحدادة خاطر معظم الحدادة كانوا حوانتهم لاصقة للباب هذا و الباب اتعرض للحرق و الهدم خلال الحرب الأهلية بين 1728 - 1756 و اتعاود تبنى عام 1769 و من وقتها تعرف أكثر باسم الباب الجديد
8 - باب الخضراء تبنى عام 1320 و تسمى هكاكة نسبة للحقول و البساتين إلي كانت تمتد مالباب هذا في اتجاه أريانة و قرطاج
9 - باب سعدون تبنى عام 1350 نسبة لرجل صالح إسمو سيدي بو سعدون،كان يعيش بجنب الباب .
10 - باب العسل تبنى في العهد العثماني نسبة لعائلة بني عسال، وهي عائلة غنية كانت تسكن قرب الباب.
البيبان في جملتهم 24 و كل واحد ليه قصة معينة نذكرو منهم باب البحر / باب القصبة / باب الغدر / باب انتجمي / باب قرطاجنة / باب القرجاني / باب المرقد / باب الفلة / باب العلوج / باب سيدي قاسم / باب سيدي عبد الله الشريف / باب سوق القماش / باب الأقواس .
منقول
