18/08/2026
Mtalii kutoka Uswisi, Yannic Hofmann, mwenye umri wa miaka 27, amekuwa akitumia baiskeli kutalii Afrika kwa takribani miezi mitatu.
Akizungumza na Tanzania Safari Channel Digital, Yannic amesema katika safari yake amepitia Kenya, Uganda na Rwanda kabla ya kuingia Tanzania, akieleza kuwa anapendelea kutumia barabara ndogo za vijijini kuliko barabara kuu.
Amesema baada ya Tanzania, anatarajia kuendelea na safari yake katika nchi nyingine za Afrika, zikiwemo Zimbabwe, Botswana, Namibia, Afrika Kusini na Madagascar.
Yannic amesema sababu kubwa ya kuchagua kutalii Afrika kwa baiskeli ni kutaka kuifahamu Afrika kwa karibu zaidi, kukutana na watu, kuona wanyamapori na mandhari mbalimbali.
Aidha, amesema safari hiyo inalenga pia kubadili baadhi ya mitazamo ambayo watu wengi barani Ulaya wanaweza kuwa nayo kuhusu Afrika.
Amesema uzoefu wake katika safari hiyo umemsaidia kuona kuwa baadhi ya taswira aliyokuwa nayo kuhusu Afrika haikuwa sahihi kwa kila kitu, huku akieleza kuwa baadhi ya watu wenye ukarimu zaidi aliokutana nao ni wale wanaoishi maeneo ya vijijini.
Kuhusu Tanzania, Yannic amesema tayari amejifunza baadhi ya maneno ya Kiswahili, yakiwemo “Asante”, “Karibu” na “Karibu sana”. Pia ametaja chipsi mayai kuwa miongoni mwa vyakula vya Tanzania alivyovipenda.
Safari ya Yannic inaendelea huku akitarajia kutembelea maeneo na nchi mbalimbali za Afrika kwa kutumia baiskeli.
Je, wewe unaweza kujaribu utalii wa aina hii kuichunguza Afrika kwa baiskeli? Au safari ya Yannic imekuacha na maswali mengi kichwani?
