20/09/2026
EJUP AHMETI: KËRKON DORËHEQJEN E DEPUTETËVE QË VOTUAN PRO THEMELIMIT TË SPECIALES 👇
Deputetët e Legjislaturës XI që më 3 gusht 2015 votuan PRO themelimit të Dhomave të Specializuara në Hagë duhet të japin dorëheqje. Është kërkesë për përgjegjësi personale ndaj një vendimi që e morën vetë. Më 3 gusht 2015, 82 deputetë votuan PRO ndryshimeve kushtetuese që i hapën rrugë Speciales.
Sot, pasojat e atij vendimi janë para syve të të gjithëve. Prandaj nuk mund të dalin para qytetarëve sikur kjo histori ka filluar sot. Nuk mund të kërkojnë përgjegjësi nga institucionet, ndërsa përgjegjësinë për vendimin e tyre e lënë jashtë diskutimit.
Kanë pasur vite të tëra për ta mbrojtur qëndrimin e tyre dhe për të shpjeguar pse e dhanë atë votë. Sot kanë mundësinë ta bëjnë të vetmen gjë konkrete që është në dorën e tyre. Të heqin dorë nga mandatet që mbajnë dhe ta marrin mbi vete përgjegjësinë politike për votën e 3 gushtit 2015.
Nuk duhet ta përdorin dhimbjen e këtyre ditëve për ta kthyer protestën në luftë politike. Nëse vërtet mendojnë se vota e tyre e atëhershme i ka shkaktuar dëm Kosovës, duhet të fillojnë nga vetja.
Ta pastrojnë veten fillimisht. Pastaj të flasin për të tjerët.
