12/08/2026
Parada e veshjeve Tradicionale Shqiptare,
09. 08. 2026, edicioni i tretë
Festivali organizohet nga Fondacioni për Gjakovën,
kryetar i fondacionit, Ermal Hasimja.
© Photo: Shkëlzen Rexha / Valed Promotion
Shqiptare
Parada e Veshjeve Tradicionale Shqiptare, 09. 08. 2026
© Photo: Shkëlzen Rexha / Valed Promotion
Parada e Veshjeve Tradicionale Shqiptare Nga zemra e Çarshisë së Vjetër të Gjakovës, u nis një paradë që për disa çaste i bëri rrugët e qytetit të duken si një udhëtim nëpër të gjitha trojet shqiptare. Mbi 65 veshje tradicionale, secila me historinë, ngjyrat dhe veçoritë e trevës së saj, u bënë pjesë e këtij marshimi ceremonial që u përmbyll në Parkun “Ali Podrimja”. Në këtë paradë u bashkuan tre breza, të vegjël, të rinj e të moshuar, të gjithë të veshur me krenari e të buzëqeshur. Ishte një pamje e bukur e trashëgimisë sonë të gjallë: gjyshër pranë nipërve, prindër pranë fëmijëve, e të rinj që ecën me krenari në veshjet që na kanë ardhur nga brezi në brez. Çdo veshje tregonte një histori. Nga Gjirokastra e Çamëria, nga Lezha e Mitrovica, nga Gjakova e treva të tjera shqiptare, parada solli në një vend larminë e jashtëzakonshme të kulturës sonë. Na dallojnë ngjyrat, mënyra e punimit dhe traditat e secilës trevë, por na bashkon e njëjta rrënjë. Kjo nuk ishte vetëm një paradë veshjesh. Ishte një parakalim i kujtesës, identitetit dhe krenarisë sonë, një mënyrë për t’ua treguar brezave të rinj se trashëgimia nuk është vetëm diçka që ruhet në muze, por diçka që vishet, ecën, buzëqesh dhe jeton mes nesh. Mirënjohje të veçantë Një falënderim i përzemërt për të gjithë ata që me përkushtimin dhe dashurinë e tyre bënë të mundur këtë mozaik të bukur të kulturës shqiptare: Arbëror Lizeta – Gjirokastër, për kontributin dhe përfaqësimin e denjë të traditës së Gjirokastrës, duke sjellë me vete një pjesë te madhe të shpirtit të jugut shqiptar, pasuri kombëtare e veshje aq të veçanta. Sali Nuredini – Shoqata Çamëria, Dega Vlorë, për përfaqësimin e Çamërisë dhe për përkushtimin në ruajtjen e kujtesës, veshjeve dhe trashëgimisë së kësaj treve. Drejtoria e Kulturës – Lezhë, për kontributin e çmuar në sjelljen e traditës së Veriut dhe pasurimin e paradës me identitetin e saj të veçantë. Drejtoria e Kulturës – Mitrovicë, për bashkëpunimin dhe përfaqësimin e denjë të kulturës së Kosovës në këtë bashkim të trevave shqiptare. Servete Kastrati- Rahovec , për kontributin e saj të çmuar dhe përfaqësimin me dinjitet të traditës së veshjeve të Kosovës Salloni Tina – Gjakovë, për kujdesin dhe kontributin në përgatitjen e veshjeve të nuseve Gjakovare, duke i dhënë paradës edhe më shumë hijeshi e bukuri. Saime Kabashi – Gjakovë, për përkushtimin, dashurinë dhe kontributin e saj në ruajtjen dhe përcjelljen e veshjeve tradicionale vendase. Faleminderit secilit që eci me ne. Sepse atë ditë nuk ecëm vetëm nëpër rrugët e Gjakovës , por ecëm bashkë nëpër kujtesën e një kombi.
Erisa G, Lipoveci
