21/05/2026
الخلاصة والقول الفصل: هل تركيا بقت بدون فيزا للمصريين في الكروز؟
بقالي فترة شايف هرجلة وجدل كبير على السوشيال ميديا إن المصريين مابقوش محتاجين فيزا لتركيا لو مسافرين سياحة بحرية (كروز). وعشان ننهي الهبد ده ونحط النقط على الحروف علشان بيجيلي عليه يوميا اكتر من 100 سؤال، تعالوا نقول الفكرة ماشية إزاي بالمنطق والقانون.
نصف المعلومة: إيه اللي صح؟ الكلام اللي بيتقال إن القانون التركي بيسمح لركاب السفن البحرية بدخول السواحل التركية بدون فيزا لمدة 72 ساعة.. ده كلام صح ومصدره موثوق.
وقبل ما حد يطلع يقولي: "يا عم أنا سألت شركة الكروز والخارجية التركية أكدوا لي إن المصريين مش محتاجين فيزا".. هقولك: استنى بس، المعلومة مكملتش!
الحقيقة الكاملة: بلدك أولى بقوانينها قبل ما تسأل عن قوانين الدولة اللي أنت رايح ليها، اسأل الأول عن قوانين الدولة اللي أنت خارج منها! لو بلدك (مصر) موافقتش على سفرك من أساسه، يبقى أي تسهيلات في أي دولة تانية في العالم مالهاش أي لزمة ومستحيل تفيدك.
والسؤال هنا: هل الدولة المصرية هتسمحلك تسافر تركيا من غير تصريح أمني؟
لو وافقوا.. مبروك عليك.
لو موافقوش (وده الطبيعي والمطبق).. يبقى مش هتعدي من ميناء الأسكندرية أصلاً.
بالعقل كده وبحسبة بسيطة: ده أنت لو مسافر ترانزيت في مطار تركيا أكتر من 6 ساعات، ومش هتخرج من المطار ولا معاك فيزا، مش هتعرف تطلع من مصر من غير تصريح أمني. فهل يعقل إنك تسافر وتلف 4 مدن تركية وتقعد في كل مدينة 12 ساعة وتتفسح ومحدش يطلب منك تصريح أمني من مصر؟! مش منطقي خالص.
كلمة لوجه الله: يا ريت مش أي حد يسمع كلمة في أي مكان يطلع ينشرها ويعمل بلبلة وهو معندوش خبرة ولا علم بإجراءات المطارات والموانئ. ادرسوا أبعاد الموضوع كاملة قبل ما تفتوا بكلمة، عشان متورطوش الناس وتخسروهم فلوسهم، وقبل كل ده عشان متفقدوش مصداقيتكم.
ولو محتاج تفاصيل الكروز بشكل صحيح ابعتلي وأنا أقولك الصح من غير لف ولا دوران. علشان الحمدلله أحنا الوحيدين في مصر اللي عندنا تجربة سابقة مع كروز أرويا على مدار السنة السابقه, وعارفين كل تفاصيله 😉
