06/04/2026
Yeni hesabatlar miqrasiya edən monarx kəpənəkləri üçün ümid yaradır
WWF-Meksika komandası miqrasiya edən monarx kəpənəyinin populyasiyası və qışlama mühiti ilə bağlı müsbət dəyişiklikləri vurğulayan iki yeni hesabat dərc edib. Bu hesabatlar birlikdə növ üçün ümidverici bir ili əks etdirir: onlardan biri populyasiyada artımı göstərir, digəri isə monarxların qış aylarında koloniyalar şəklində toplandığı ərazilərdə meşə deqradasiyasının azaldığını qeyd edir.
WWF-in birinci tədqiqatına əsasən, alimlər monarxların sayında 64% artım aşkar ediblər. İkinci hesabata görə, 2024-2025 illər ərzində həmin ərazilərdə meşə sahəsi deqradasiya əhəmiyyətli dərəcədə azalıb. Bununla yanaşı, hesabat qanunsuz ağac kəsimi, meşə yanğınları və quraqlıq səbəbindən müəyyən meşə sahələrinin itirildiyini də göstərir. Qeyd edək ki, dünya üzrə hər il milyonlarla ağac və böyük meşə sahələri məhv olur.
Bu hesabatlar göstərir ki, çətinliklərə baxmayaraq, WWF-in mühafizə tədbirləri müsbət nəticələr verir. WWF Meksika hökuməti, yerli icmalar və digər tərəfdaşlarla birlikdə Monarx Kəpənəyi Qoruğunda güclü meşə idarəçiliyini və dayanıqlı turizmi də təşviq edir. Təşkilatımız həmçinin qoruqda meşələrin bərpasına kömək edən tədbirləri dəstəkləyir və regionda yaşayan icmalar üçün iqtisadi imkanlar yaradır. ABŞ-da isə WWF monarxların azalmasının əsas səbəblərindən biri olan neonikotinoid pestisidlərin istifadəsini azaltmağa və Böyük Düzənliklərdə əvvəllər şumlanmış çəmənlikləri yenidən tozlandırıcılar üçün yaşayış mühitinə çevirmək istiqamətində işlər aparır.
Hər il şərqi monarx kəpənəkləri Kanada və ABŞ-dan Meksikanın Miçoakan və Meksika ştatının meşələrində yerləşən qışlama ərazilərinə qədər 4 500 kilometr məsafə qət edirlər. Monarxların külək, yağış və meşələrdə gecə saatlarında tez-tez müşahidə olunan aşağı temperaturdan qorunmaq üçün geniş və sağlam meşə sahələrinə ehtiyacı var.
Foto © naturepl.com / Ingo Arndt / WWF
