Ziaraat Organizers Association of Pakistan-ZOAP.

30/10/2026

ZGOs کے لیے اہم ہدایت
الشِیب بارڈر دوبارہ کھلنے کی سرکاری تصدیق یا عراقی حکام کی جانب سے متبادل زمینی راستے کی باضابطہ اجازت تک زائرین کو اس راستے سے عراق روانہ نہ کیا جائے۔
----------------------------------------------------------------------

حکومتِ پاکستان

وزارتِ مذہبی امور و بین المذاہب ہم آہنگی

اسلام آباد، مورخہ 30 اکتوبر 2026ء

# پریس ریلیز

تمام پاکستانی زائرین اور زیارات گروپ آرگنائزرز (ZGOs) کو اطلاع دی جاتی ہے کہ بغداد میں پاکستانی مشن کی رپورٹ کے مطابق عراق اور ایران کے درمیان واقع الشِیب (Al-Sheeb) بارڈر کراسنگ 21 اکتوبر 2026ء سے بند کر دی گئی ہے، جبکہ مسافروں، گاڑیوں اور تجارتی ٹریفک کی آمدورفت بھی تاحکمِ ثانی معطل کر دی گئی ہے۔

2۔ الشِیب بارڈر کراسنگ، ایران کے راستے عراق جانے والے پاکستانی زائرین کے لیے واحد مجاز زمینی راستہ ہے۔ بارڈر کی بندش کے پیشِ نظر زائرین عراقی حکام کی پیشگی اجازت کے بغیر کسی دوسرے زمینی راستے سے عراق میں داخل نہیں ہو سکتے۔ فی الحال عراق میں داخلے کے لیے بغداد اور نجف کے بین الاقوامی ہوائی اڈے استعمال کیے جا سکتے ہیں۔

3۔ تمام زیارات گروپ آرگنائزرز (ZGOs) کو ہدایت کی جاتی ہے کہ الشِیب بارڈر کراسنگ کے دوبارہ کھلنے کی باضابطہ تصدیق ہونے یا عراقی حکام کی جانب سے کسی متبادل زمینی راستے کی باضابطہ اجازت ملنے تک پاکستانی زائرین کو اس بارڈر کی طرف روانہ نہ کریں۔

تمام زیارت کے خواہش مند افراد کو مشورہ دیا جاتا ہے کہ اپنے سفر کا آغاز کرنے سے پہلے اپنے متعلقہ زیارات گروپ آرگنائزرز سے تازہ ترین سفری انتظامات کی تصدیق ضرور کر لیں اور بند بارڈر کے ذریعے سفر کرنے سے گریز کریں۔

4۔ تمام متعلقہ زیارات گروپ آرگنائزرز اس بات کو یقینی بنائیں کہ ان ہدایات پر سختی سے عمل کیا جائے اور اپنے ساتھ رجسٹرڈ زائرین کو فوری طور پر اس صورتحال سے آگاہ کریں تاکہ انہیں کسی قسم کی پریشانی، راستے میں پھنس جانے یا سفری و انتظامی مشکلات کا سامنا نہ کرنا پڑے۔ وزارت کی جانب سے اس سلسلے میں جاری کردہ مزید ہدایات پر بھی اسی کے مطابق عمل کیا جائے۔

5۔ یہ سرکلر تمام متعلقہ افراد کی اطلاع اور سختی سے تعمیل کے لیے جاری کیا گیا ہے۔

برائے: چیف ایگزیکٹوز، زیارات گروپ آرگنائزرز (ZGOs)

اشعر محمود\
سیکشن آفیسر (زیارات)\
وزارتِ مذہبی امور و بین المذاہب ہم آہنگی\
حکومتِ پاکستان

23/10/2026

ایران، عراق زیارات کے لیے مزید21 زیارت گروپ آرگنائزرز کو رجسٹریشن سرٹیفکیٹ جاری، تعداد 282 ہوگئی

اسلام آباد (23 اکتوبر، 2026) وفاقی وزیر مذہبی امور سردار محمد یوسف نے وزارت مذہبی امور میں منعقدہ تقریب کے دوران مزید 21 زیارت گروپ آرگنائزرز کو رجسٹریشن سرٹیفکیٹ تقسیم کردیے، جس کے بعد ملک میں مجاز زیارت گروپ آرگنائزرز کی تعداد 282 ہوگئی۔

تقریب میں شعبہ دعوۃ و زیارت کے سربراہ جوائنٹ سیکرٹری شہباز مصطفیٰ، ڈپٹی سیکرٹری ڈاکٹر شاہد الرحمن مارتھ، سیکشن افسر اشعر محمود، رانا محمد مجاہد خان اور سید مجاب رضوی اور نئی رجسٹرڈ کمپنیوں کے منتظمین اور نمائندوں نے شرکت کی جنہوں نے سکیورٹی کلیئرنس، سکیورٹی ڈپازٹ اور دیگر لازمی دستاویزات کے تقاضے مکمل کرلیے تھے۔ اس سے قبل 261 کمپنیوں کو رجسٹریشن سرٹیفکیٹس جاری کیے جاچکے ہیں۔

اس موقع پر وفاقی وزیر مذہبی امور سردار محمد یوسف نے نئی رجسٹریشن حاصل کرنے والی کمپنیوں کے نمائندوں کو مبارکباد دیتے ہوئے کہا کہ ایران، عراق اور شام سمیت دیگر مقدس مقامات کی زیارات پر جانے والے پاکستانی زائرین کو بہترین سہولیات کی فراہمی یقینی بنائی جائے۔ انہوں نے کہا کہ زیارت گروپ آرگنائزرز تجربہ کار ہیں، اس لیے انہیں زائرین کی سہولت، حفاظت اور بہتر سفری انتظامات پر خصوصی توجہ دینی چاہیے۔

وفاقی وزیر نے بتایا کہ وزیراعظم کے ویژن کے مطابق وزارت مذہبی امور اور نیشنل آئی ٹی بورڈ کے اشتراک سے زیارت گروپ آرگنائزرز کے لیے مینجمنٹ انفارمیشن سسٹم (MIS) تیار کیا جا رہا ہے، جس کے تحت رجسٹرڈ کمپنیوں کی تفصیلات، معاہدوں اور شکایات کے ازالے کے نظام کو مربوط کیا جائے گا۔ اس نئے نظام کا مقصد زیارات کی شفافیت اور نگرانی کو بہتر بنانا اور زائرین کو فراہم کی جانے والی سہولیات کے معیار کو یقینی بنانا ہے۔

واضح رہے کہ پاکستان سے رجسٹرڈ 282 زیارت گروپ آرگنائزرز ایران، عراق، شام اور دیگر مذہبی مقامات کی زیارات کے لیے پاکستانی زائرین کو خدمات فراہم کریں گے۔

تمام نئے آنے والے ZGOS کو ZOAP کی طرف سے دلی مبارک باد.... اللہ تعالیٰ تمام ZGOS کو زائرین کرام کی بہترین خدمت کرنے اور وطن عزیز کی نیک نامی کے لئے کام کرنے کی توفیق عطاء فرمائے آمین ثم آمین 🤲

22/10/2026

ایران، عراق جانے والے پاکستانی زائرین پروازوں کی پیشگی تصدیق یقینی بنائیں: ترجمان مذہبی امور
اسلام آباد، 22 اکتوبر 2026ء:
وزارتِ مذہبی امور و بین المذاہب ہم آہنگی نے ایران اور عراق جانے والے پاکستانی زائرین اور زیارت گروپ آرگنائزرز کے لیے اہم سفری ایڈوائزری جاری کرتے ہوئے پروازوں کی پیشگی تصدیق اور متبادل سفری انتظامات یقینی بنانے کی ہدایت کی ہے۔
ترجمان نے زائرین کو ہدایت کی ہے کہ روانگی سے قبل ایران یا عراق کے لیے یا دونوں ممالک کے درمیان سفر سے قبل اپنی متعلقہ پروازوں بالخصوص ایرانی پروازوں کی تصدیق ضرور کریں۔ نیز تہران یا مشہد سے نجف کے درمیان فضائی سفر کرنے والے زائرین غیر یقینی پروازوں پر انحصار کرنے سے گریز کریں اور متبادل سفری انتظامات پیشگی یقینی بنائیں۔
ترجمان نے مزید کہا کہ پروازوں کی منسوخی یا کسی ہنگامی صورتحال کے پیش نظر زائرین ایران اور عراق کے درمیان متبادل زمینی یا فضائی سفر اور اضافی قیام و طعام کے اخراجات کے لیے مناسب رقم بھی اپنے پاس رکھیں تاکہ انہیں دورانِ سفر مشکلات کا سامنا نہ کرنا پڑے۔
وزارت نے تمام رجسٹرڈ زیارت گروپ آرگنائزرز (ZGOs) کو بھی ہدایت کی ہے کہ وہ غیر مصدقہ ایرانی پروازوں پر انحصار نہ کریں اور سفر سے قبل اپنے گروپس میں شامل تمام زائرین کو سفری ایڈوائزری سے آگاہ کریں۔
ترجمان مذہبی امور نے زائرین اور زیارت گروپ آرگنائزرز پر زور دیا ہے کہ وہ جاری کردہ ہدایات پر عمل کریں اور اپنے سفر کو محفوظ اور بلا تعطل بنانے کے لیے ضروری احتیاطی تدابیر اختیار کریں۔
ترجمان مذہبی امور کے مطابق یہ ایڈوائزری وزارتِ خارجہ سے موصولہ ہدایات اور بغداد میں پاکستانی سفارت خانے کے مشورے کی روشنی میں جاری کی گئی ہے۔

17/10/2026

17/10/2026

تمام ZGOs کی اطلاع کے لیے عرض ہے کہ ان افراد کا ZOAP کے ساتھ کوئی تعلق نہیں ہے۔ لہٰذا ان کے حوالے سے گزارش ہے کہ انہیں ZOAP کے نام پر کوئی دستاویز فراہم نہ کی جائے۔

شکریہ۔

17/10/2026

**بسم اللہ الرحمٰن الرحیم**

**السلام علیکم ورحمۃ اللہ وبرکاتہ!**

میرے محترم زائرینِ کرام اور تمام رجسٹرڈ زیارت گروپ آرگنائزرز (ZGOs) بھائیو!

آج میں آپ سے ایک اہم بات دل کی گہرائیوں سے کرنا چاہتا ہوں۔

ہم نے **29 اگست 2025ء** کو DGTO آفس سے زیارات آرگنائزرز ایسوسی ایشن آف پاکستان (ZOAP) کی رجسٹریشن کے لیے درخواست فارم حاصل کیا اور دسمبر کے اختتام تک تمام مطلوبہ دستاویزات جمع کرا دیں۔ لیکن اسی دوران ایک دوسرے گروپ کی درخواست اور باہمی اختلافات کے باعث ہماری رجسٹریشن گزشتہ 13 ماہ سے زیرِ التوا ہے۔

اگر ہم سے پہلے کسی دوسرے گروپ نے درخواست دی ہوتی تو ہم اپنی الگ تنظیم کی رجسٹریشن کے لیے درخواست ہی نہ دیتے۔

اس تاخیر کے باعث ہم گزشتہ سال عاشورہ، عرفہ اور اربعین کے حوالے سے وزارتِ مذہبی امور کے ساتھ بیٹھ کر کوئی مشترکہ اور مؤثر پالیسی بنانے میں بھی اپنا کردار ادا نہ کر سکے۔

**میرا واضح پیغام ہے: ہمارا مقصد کسی مذہب، فرقے، زبان یا قومیت کی مخالفت نہیں۔** ہم سب مسلمان، پاکستانی اور ایک اللہ، ایک رسول ﷺ اور ایک قرآن پر ایمان رکھنے والے ہیں۔ زائرین کی خدمت اور زیارات کے روزگار کا حق ہر اُس لائسنس یافتہ ZGO کو حاصل ہے جو وزارتِ مذہبی امور سے لائسنس رکھتا ہے، خواہ وہ پنجابی ہو، پختون، بلوچ، سندھی یا سرائیکی۔

میری ذاتی طور پر نہ کسی عہدے کی خواہش ہے، نہ قیادت کا شوق۔ میرا مقصد صرف زائرین کی خدمت اور ZGOs کے جائز مفادات کا تحفظ ہے۔

تمام ساتھیوں سے گزارش ہے کہ افواہوں اور منفی پروپیگنڈے سے متاثر نہ ہوں۔ اگر آپ ZOAP کے ساتھ کھڑے ہیں تو اصولی طور پر اپنے فیصلے پر ثابت قدم رہیں۔

**ہم چٹان کی طرح متحد ہیں اور ان شاء اللہ متحد رہیں گے!**

مجھے امید ہے کہ آنے والے چند دنوں میں آپ کو ایک بڑی خوشخبری ملے گی، ان شاء اللہ۔

اللہ تعالیٰ ہمارے اتحاد میں برکت عطا فرمائے اور ہمیں زائرین کی خدمت میں کامیاب کرے۔

**پاکستان زندہ باد! ZGO s کا اتحاد پائندہ باد!**

والسلام علیکم ورحمۃ اللہ وبرکاتہ۔

16/10/2026

الحمد للہ ZOAP پر اعتماد کا سلسلہ جاری ہے
کراچی سندھ سے PJP ٹریول اینڈ ٹورز گروپ کے رہنما جناب سید ظفر عباس کی ZOAP کے ساتھ کھڑے ہونے کی اعادہ....
کامیابی ہمارے قدم چومے گی.... ان شاء اللہ
**ZOAP — زیارت کے لیے متحد، خدمت کے لیے پُرعزم**

16/10/2026

جناب محمد مصدق حفیظ اعوان صاحب،
سی ای او، دنیا ایوی ایشن ٹریول اینڈ ٹورز پرائیویٹ لمیٹڈ پنجاب کو سنئیے.....

اس لئے ہم کہتے ہیں،
ہمارا عزم، "زیارت کے شعبے سے وابستہ تمام ساتھیوں کو ایک پلیٹ فارم پر متحد کرتے ہوئے زائرین کے بہتر، محفوظ اور باوقار زیارتی سفر کے لیے مشترکہ کوششیں"

**ZOAP — زیارت کے لیے متحد، خدمت کے لیے پُرعزم**

16/10/2026

یہ ہے زوپ (ZOAP) لاھور پنجاب سے ایک مخلص رہنما، جناب شہزاد احمد خان، جو گلیکسی ٹریولز کے چیف ایگزیکٹو ہیں..... ان کا پیغام تمام زائرین گروپ آرگنائزرز کے نام،
اس لئے ہم کہتے ہیں کہ ہم زائرین کی بہترین خدمت اور ZGOS کی رہنمائی اور مفادات کی تحفظ کے لئے برسرِبیکار ہیں
اور ان شاء اللہ ہم یہ مقدس فریضہ عبادت سمجھ کر سرانجام دیں گے!!